கோவையில் ‘வீ தி லீடர்ஸ்’ அமைப்பின் நிறுவனர் அண்ணாமலை செய்தியாளர்களை சந்தித்து பேசினார். அப்போது அவர் கூறியதாவது:
கள்ளக்குறிச்சி கலெக்டர் விவகாரம் ஒரு பெரிய மர்ம புதிராக தொடர்ந்து கொண்டிருக்கிறது. அரசு நிகழ்ச்சிகளில் கள்ளக்குறிச்சி கலெக்டர் பங்கேற்காமல் இருப்பதை பார்க்கிறோம்.
ஒரு மாவட்ட கலெக்டராக பெண் இருப்பதே பெருமை. அவருக்கு ஆளும் கட்சியை சேர்ந்த எம்.எல்.ஏ., யாரேனும் பிரச்னை ஏற்படுத்தியிருந்தால், முதல்வர் தாமாக முன்வந்து விளக்கம் அளிக்க வேண்டும். சம்பந்தப்பட்ட எம்.எல்.ஏ., மோசமான குறுஞ்செய்தி அனுப்பினாரா இல்லையா என்பது எளிய கேள்வி. அனுப்பியிருந்தால் நடவடிக்கை எடுங்கள்; இல்லையெனில் அதை வெளிப்படையாக கூறுங்கள். எல்லா விஷயங்களையும் மூடி மறைத்தால் அரசு மீது மக்களுக்கு நம்பிக்கையின்மை ஏற்படும். ஐ.ஏ.எஸ்., அதிகாரிகள் சங்கமும் இது குறித்து மவுனம் கலைக்க வேண்டும்.
மாற்றத்தை விரும்பி 35 சதவீத மக்கள் தமிழக வெற்றிக் கழகத்திற்கு வாக்களித்து ஆட்சியில் அமர வைத்துள்ளனர். ஆனால், தீபாவளியையொட்டி இரண்டு நாட்களில் 441 கோடி ரூபாய்க்கு டாஸ்மாக் மது விற்பனை நடந்துள்ளது. தீபாவளி அன்று 15 முதல் 17 கொலைகள் வரை நடந்துள்ளன. முந்தைய ஆட்சியை குறை சொல்வதை விட்டுவிட்டு, காவல்துறையில் சீர்திருத்தம் கொண்டு வர வேண்டும். தீபாவளிக்கு முன்பே ரவுடிகள் மீது முன்னெச்சரிக்கை நடவடிக்கை எடுத்திருக்கலாம். சிறையிலிருந்து கைதிகள் தப்பியோடும் சம்பவங்களும் அதிகரித்துள்ளன. உள்துறை பொறுப்பை வகிக்கும் முதல்வர் இதில் சுதாரித்துக் கொண்டு வேகமாக களத்தில் இறங்க வேண்டும்.
ஆட்சி பொறுப்பேற்று ஆறு மாதங்கள் முடிந்துள்ள நிலையில், ஆட்சியின் நிறை குறைகள் குறித்து ஓராண்டு நிறைவடைந்த பிறகே முழுமையாக பேசுவோம். அதற்குள் எதிர்க்கட்சிகள் பேரம் பேசி எம்.எல்.ஏ.,க்களை இழுத்து நம்பிக்கையில்லா தீர்மானம் கொண்டு வர முயற்சித்தால், அது எதிர்க்கட்சிகளுக்கே பின்னடைவாக அமையும். ஏற்கனவே இடைத்தேர்தல் குழப்பங்கள் உள்ள நிலையில், மக்கள் வாக்களித்த ஆட்சிக்கு ஓராண்டு காலமாவது தார்மீக அவகாசம் வழங்க வேண்டும்.
சோனியா காந்தி எழுதிய ‘பிலாங்கிங்’ என்ற சுயசரிதை புத்தகத்தை தற்போது படித்து வருகிறேன். மாற்று சித்தாந்தம் கொண்ட தலைவராக இருந்தாலும், 1984 சீக்கியர் கலவரம், அவசரநிலை பிரகடனம், 2004-ல் பிரதமர் பதவியை ஏற்காதது மற்றும் இரண்டு முறை புற்றுநோயிலிருந்து மீண்டது உள்ளிட்ட பல முக்கிய நிகழ்வுகளை அவர் அதில் பதிவு செய்துள்ளார். அதில் கருத்து வேறுபாடுகள் இருந்தாலும், அவரது பார்வையை அறிந்து கொள்ள அனைவரும் படிக்க வேண்டிய முக்கியமான புத்தகம் அது.
இவ்வாறு அண்ணாமலை கூறினார்.
