நிலுவையில் உள்ள காவிரி நீரைப் பெற உச்சநீதிமன்றத்தில் தமிழக அரசு இன்று மனு தாக்கல் செய்ய உள்ளது. இந்த நிலையில் வாதங்களை முன்வைக்கத் தமிழ்நாடு அரசு தயாராக உள்ளதாக புது தில்லியில் நீர்வளத்துறை செயலாளர் பிரசாந்த் வடநேரே தெரிவித்துள்ளார்.
உச்ச நீதிமன்றத்தில் இன்று விசாரணைக்கு வரவுள்ள காவிரி நீர் தொடர்பான வழக்குக்காக, மாநில அரசின் ஆயத்தப் பணிகளை ஒருங்கிணைக்கத் தமிழ்நாடு அரசின் நீர்வளத் துறைச் செயலாளர் இன்று டெல்லி சென்றுள்ளார். அப்போது அவர் தமிழக அரசு சார்பில் உச்சநீதிமன்றத்தில் முன்வைக்கப்பட உள்ள வாதங்கள் குறித்து குறிப்பிட்டார்.
இதுகுறித்து அவர் தெரிவித்ததாவது, “நடப்புப் பாசன ஆண்டான 2026–2027-ல், காவிரி நீர் மேலாண்மை ஆணையத்தின் (CWMA) எட்டு கூட்டங்கள் இதுவரை நடைபெற்றுள்ளன. இருப்பினும், 07.10.2026 நிலவரப்படி, தமிழ்நாட்டிற்குக் கிடைக்க வேண்டிய காவிரி நீரில் 15 டி.எம்.சி. (TMC) பற்றாக்குறை உள்ளது.
தமிழ்நாடு அரசின் தொடர்ச்சியான மற்றும் உறுதியான முயற்சிகளின் விளைவாக, நிலுவையில் இருந்த காவிரி நீர் பற்றாக்குறையானது 12.08.2026-ல் இருந்த 21 டி.எம்.சி.-யிலிருந்து, 07.10.2026-ல் 15 டி.எம்.சி.-யாகக் குறைந்துள்ளது. தற்போது, மீதமுள்ள நிலுவைத் தொகையைப் பெறுவதற்கான உரிய உத்தரவுகளைப் பிறப்பிக்குமாறு மாநில அரசு உச்ச நீதிமன்றத்தில் வலியுறுத்தி வருகிறது.
08.10.2026 அன்று நடைபெற்ற தனது 59-வது கூட்டத்தில், காவிரி நீர் மேலாண்மை ஆணையம் கர்நாடக அரசுக்கு ஒரு உத்தரவைப் பிறப்பித்தது. அதன்படி, 09.10.2026 முதல் அடுத்த 15 நாட்களுக்குத் தமிழ்நாடு எல்லையில் உள்ள பிலிகுண்டுலுவில் 3,000 கன அடி (cusecs) நீர் வந்து சேர்வதை உறுதி செய்யுமாறு ஆணையம் அறிவுறுத்தியது. இருப்பினும், கர்நாடகா இந்த உத்தரவைச் செயல்படுத்தவில்லை” என்று அவர் தெரிவித்தார்.
