தனுஷ் நடிக்கும் ராயன் திரைப்படத்தின் இசை வெளியீட்டு விழா குறித்த அப்டேட் வெளியாகியுள்ளது.
தனுஷ் நடிப்பில், அருண் மாதேஸ்வரன் இயக்கத்தில் வெளியான ‘கேப்டன் மில்லர்’ திரைப்படம் மக்களிடையே கலவையான வரவேற்பை பெற்றது. இதனை தொடர்ந்து தனுஷின் 50-வது படமாக உருவாகும் ‘ராயன்’ திரைப்படத்தை சன் பிக்சர்ஸ் நிறுவனம் தயாரிக்கிறது. தனுஷ் இயக்கி நடிக்கும் இப்படத்தில் துஷாரா விஜயன், சந்தீப் கிஷன், காளிதாஸ் ஜெயராம், எஸ்.ஜே.சூர்யா, அபர்ணா பாலமுரளி ஆகியோர் நடிக்கின்றனர்.
இந்த திரைப்படம் வடசென்னையை கதைக்களமாக கொண்டு உருவாகி வருவதாக கூறப்படுகிறது. படத்திற்கு ஏ.ஆர்.ரஹ்மான் இசையமைக்கிறார். படத்தின் ஃபர்ஸ்ட் லுக் போஸ்டர், புத்தாண்டை முன்னிட்டு வெளியான புதிய போஸ்டர் ஆகியவை நல்ல வரவேற்பைப் பெற்றன. தொடர்ந்து, படத்தின் முதல் பாடலான ‘அடங்காத அசுரன்’ வெளியாகி தனுஷின் ரசிகர்களை கொண்டாட்டத்தில் ஆழ்த்தியது. இந்த திரைப்படம் வரும் ஜூன் 13-ம் தேதி வெளியாகும் என அறிவிக்கப்பட்டது.
இதனிடையே ராயன் படத்தின் இசை வெளியீட்டு விழா பற்றிய அறிவிப்பு வெளியாகியுள்ளது. தனுஷின் 50-வது படம் என்பதால் மிக பிரமாண்டமாக இந்த விழாவை நடத்த திட்டமிடப்பட்டுள்ளது. ஜூன் 1-ம் தேதி இந்த இசை வெளியீட்டு விழாவை நடத்த திட்டமிட்டுள்ளதாகவும், அதுமட்டுமின்றி தனுஷை வைத்து படம் இயக்கிய இயக்குநர்கள் அனைவரையும் விழாவிற்கு அழைத்து கௌரவிக்கவும் முடிவு செய்துள்ளதாக கூறப்படுகிறது.
மேலும் ஏ.ஆர்.ரஹ்மானின் இசை கச்சேரி உள்ளிட்ட பல்வேறு சிறப்பான சர்ப்ரைஸ்களும் ரசிகர்களுக்கு காத்திருப்பதாக சினிமா வட்டார தகவல்கள் தெரிவிக்கின்றன.
