காரை மறித்து கொலை வழக்கில் தொடர்புடைய நபரை மர்ம கும்பல் ஒன்று வெட்டி படுகொலை, செய்துள்ள சம்பவம் அப்பகுதியில் பரபரப்பை ஏற்படுத்தியுள்ளது.
சிவகங்கை மாவட்டம் கீழ வாணியங்குடி பகுதியைச் சேர்ந்தவர் மருதுபாண்டி, இவரும் V.புதுக்குளம் கிராமத்தை சேர்ந்த சரவணன் என்பவரும் நண்பர்கள். இவர்கள் மீது சிவகங்கை காவல் நிலையத்தில் கொலை வழக்குகள் நிலுவையில் உள்ளன. இந்நிலையில், மருதுபாண்டி மற்றும் சரவணன் உட்பட 4 பேர் சிவகங்கையில் இருந்து, V.புதுக்குளம் கிராமத்திற்கு காரில் சென்றுக் கொண்டிருந்தனர்.
V.புதுக்குளம் கிராமத்திற்கு அருகில் சென்ற போது, அதே வழியில் எதிர் திசையில் மற்றொரு காரில் வந்த கும்பல் ஒன்று, மருதுபாண்டி மற்றும் சரவணன் வந்த காரை வழி மறித்தது. காரில் இருந்து இறங்கிய அந்த கும்பல், அவர்கள் வைத்திருந்த அரிவாலை எடுத்து மருதுபாண்டி, சரவணன் ஆகியோரை சரமாறியாக வெட்டியது. இதில் மருதுபாண்டி சம்பவ இடத்திலேயே துடிதுடித்து பலியானார்.
சற்று நேரத்தில் அந்த மர்ம கும்பல் சம்பவ இடத்தில் இருந்து தப்பிச் சென்றது. இது குறித்து தகவல் அறிந்த, மானாமதுரை சிப்காட் போலிசார், சம்பவ இடத்திற்கு வந்தனர். வெட்டுப்பட்டு இறந்து கிடந்த பாண்டியின் உடலை மீட்டு உடற்கூராய்விற்காக சிவகங்கை அரசு மருத்துவமனைக்கு அனுப்பி வைத்தனர்.
அண்மைச் செய்தி: காட்டு யானையை துப்பாக்கியால் சுட்டுக்கொன்ற விவசாயி
மேலும் பலத்த காயமடைந்த உயிருக்கு போராடிக்கொண்டிருந்த சரவணனை மீட்டு சிவகங்கை அரசு மருத்துவமனையில் சிகிச்சை அளித்து, மதுரை தனியார் மருத்துவமனைக்கு அனுப்பி வைத்தனர். இந்த கொலை சம்பவத்தில் ஈடுபட்டவர்கள் யார் என்றும் எதற்காக கொலை செய்தனர் என்றும் முன்விரோதம் காரணமா அல்லது வேறு ஏதும் பிரச்னையா என்பது குறித்தும் பலவேறு கோணங்களில் விசாரணையை தீவிரப்படுத்தியுள்ளனர் காவல்துறையினர். மேலும் கொலையாளிகளை தீவிரமாக தேடிவருகின்றனர்.
சமீபத்திய செய்திகளையும், ட்ரெண்டிங் செய்திகளையும், அறிய News7 Tamil Express App – ஐ தரவிறக்கம் செய்யுங்கள்.
