சேலத்தில் சமையல் எரிவாயு சிலிண்டர்களை குடோனில் பதுக்கி வைத்து கள்ளச் சந்தையில் விற்பனை செய்து வந்த தந்தை, மகனை போலீஸார் கைது செய்தனர்.
சேலம், அன்னதானப்பட்டி கேட்டுக்காடு பகுதியில் குடோன் ஒன்றில் ஏராளமான எரிவாயு சிலிண்டர்கள் பதுக்கி வைக்கப்பட்டு இருப்பதாக அன்னதானப்பட்டி போலீஸாருக்கு ரகசிய தகவல் கிடைத்துள்ளது. இதனையடுத்து குடோன் உரிமையாளர்களான மாணிக்கம் மற்றும் அவரது மகன் சங்கர் ஆகியோரிடம் அன்னதானப்பட்டி போலீஸார் விசாரணை மேற்கொண்டனர்.
குடோனில் சோதனை நடத்தியதில் ஏராளமான எரிவாயு சிலிண்டர்கள் பதுக்கி வைக்கப்பட்டு இருப்பது தெரியவந்தது. இதுகுறித்து காவல் துறையினர் சார்பில் சேலம் மாவட்ட உணவுப் பொருள் கடத்தல் தடுப்பு பிரிவினருக்கு தகவல் அளிக்கப்பட்டது. இந்த தகவலின் அடிப்படையில் உணவுப் பொருள் கடத்தல் தடுப்பு பிரிவு ஆய்வாளர் ரேணுகா தேவி தலைமையிலான குழுவினர் சம்பவ இடத்திற்கு வந்து சோதனை நடத்தினர்.
காவல் துறையினர் மற்றும் உணவுப் பொருள் கடத்தல் தடுப்பு பிரிவினர் நடத்திய விசாரணையில் பிரபல நிறுவனங்களைச் சேர்ந்த சமையல் எரிவாயு சிலிண்டர்கள் மற்றும் வணிக பயன்பாட்டு சிலிண்டர்கள் மற்றும் காலி சிலிண்டர்களை மாணிக்கம் மற்றும் அவரது மகன் சங்கர் பதுக்கி வைத்து கள்ளச் சந்தையில் விற்பனை செய்வது கண்டுபிடிக்கப்பட்டது.
மேலும் ஒரு சிலிண்டரில் இருந்து மற்றொரு சிலிண்டருக்கு எரிவாயுவை மாற்றிக் கொடுப்பதும் தெரியவந்துள்ளது. இதனையடுத்து உணவுப் பொருள் கடத்தல் தடுப்பு பிரிவினர் அளித்த தகவலின் பெயரில் மாணிக்கம் மற்றும் அவரது மகன் சங்கர் ஆகியோரை அன்னதானப்பட்டி போலீஸார் கைது செய்தனர். அவர்களது குடோனில் பதுக்கி வைக்கப்பட்டிருந்த 200 எரிவாயு சிலிண்டர்களும் பறிமுதல் செய்யப்பட்டன.
கள்ளச் சந்தையில் விற்பனை செய்ய இத்தனை எரிவாயு சிலிண்டர்கள் இவர்களுக்கு கிடைத்தது எப்படி, இவர்களோடு எந்தெந்த முகவர்கள் தொடர்பில் உள்ளனர் என்பது குறித்தும் உணவுப் பொருள் கடத்தல் தடுப்பு பிரிவினர் விசாரணை மேற்கொண்டு வருகின்றனர்.
-ம.பவித்ரா
