“சவால்களை எதிர்கொள்வதே என் இயல்பு!” – பிரதமர் மோடி!

“எனது இயல்பே சவால்களை எதிர்கொள்வதுதான்; ஒரு சவாலுக்குப் பதிலடி கொடுக்காமல் என்னால் இருக்க முடியாது” என ஐஐடி காரக்பூர் நிறுவனத்தின் 75-வது ஆண்டு விழாவில் பிரதமர் நரேந்திர மோடி தெரிவித்துள்ளார்.

மேற்கு வங்க மாநிலத்தில் உள்ள ஐஐடி காரக்பூர் நிறுவனம் தொடங்கப்பட்டு 75 ஆண்டுகள் நிறைவடைந்துள்ளன. இதையொட்டி நடைபெற்ற பவள விழா கொண்டாட்டத்தில் பிரதமர் நரேந்திர மோடி நவம்பர் 21 – சனிக்கிழமை கலந்து கொண்டு உரையாற்றினார். அப்போது, இந்தியாவின் வளர்ச்சியில் கல்வி நிறுவனங்களின் பங்களிப்பு, சவால்களை எதிர்கொள்ளும் மனப்பான்மை மற்றும் ஐஐடி காரக்பூரின் வரலாற்றுச் சிறப்பு குறித்து பேசினார்.

சவால்களை எதிர்கொள்வதே எனது இயல்பு – பிரதமர் மோடி!

விழாவில் பேசிய பிரதமர் மோடி, சவால்களை எதிர்கொள்வதில் தனக்கு இருக்கும் உறுதியை வெளிப்படுத்தினார். இதுகுறித்து அவர் பேசுகையில், “எனது இயல்பிலேயே ஒரு சவாலுக்குச் சவால் விடுக்காமல் என்னால் இருக்க முடியாது” என்று தெரிவித்தார். சிரமங்களையும் சவால்களையும் கண்டு பின்வாங்காமல் அவற்றை எதிர்கொண்டு முன்னேற வேண்டும் என்ற தனது அணுகுமுறையையும் அவர் எடுத்துரைத்தார்.

சுதந்திரப் போராட்ட வீரர்கள் அடைக்கப்பட்ட இடத்தில் ஐஐடி!

ஐஐடி காரக்பூரின் வரலாற்றை நினைவுகூர்ந்த பிரதமர், இந்த நிறுவனம் அமைந்துள்ள இடம் ஒரு காலத்தில் சுதந்திரப் போராட்ட வீரர்களை அடைத்து வைக்கும் தடுப்பு முகாமாக இருந்தது என்று குறிப்பிட்டார். இதுகுறித்து அவர் கூறுகையில், “வங்காளத்தின் மண் சிந்தனைகளை வளர்த்தெடுத்த இடமாகவும், தேசிய இயக்கங்களின் தொட்டிலாகவும் திகழ்கிறது. சுதந்திரப் போராட்ட வீரர்கள் ஒரு காலத்தில் அடைத்து வைக்கப்பட்டிருந்த இடத்தில்தான் இந்த நிறுவனம் அமைந்துள்ளது.

அந்த முகாமில் அடைத்து வைக்கப்பட்டிருந்த சுதந்திரப் போராட்ட வீரர்கள் எதைப் பற்றிப் பேசியிருப்பார்கள், நாள் முழுவதும் என்ன சிந்தித்திருப்பார்கள் என்று கற்பனை செய்து பாருங்கள். அவர்களின் வாழ்க்கை, சிந்தனைகள் மற்றும் செயல்பாடுகளின் எதிரொலி இன்றும் இந்தச் சூழலில் நிலவுகிறது. அது இன்றைய மாணவர்களுக்கு வழிகாட்டும் மந்திரமாகத் தொடர்ந்து உத்வேகம் அளித்து வருகிறது” என்று தெரிவித்தார். மேலும், பல ஆண்டுகளுக்கு முன்பு இதே தடுப்பு முகாம்கள் சுயாட்சி வேண்டும் என்று விரும்பிய இந்தியர்களின் அசைக்க முடியாத மனவலிமையையும் துணிச்சலையும் கண்டதாகக் குறிப்பிட்டார்.

இந்தியாவின் வளர்ச்சியில் ஐஐடி காரக்பூரின் பங்கு!

தொடர்ந்து பேசிய பிரதமர் மோடி, “பல தசாப்தங்களுக்கு முன்பு, இதே தடுப்பு முகாம்கள் சுயாட்சிக்காக ஏங்கிய, இந்தியா மிக உயர்ந்த நிலையை அடைய வேண்டும் என்று கனவு கண்ட இந்தியர்களின் அசைக்க முடியாத மனவலிமையையும் துணிச்சலையும் கண்டன. இன்று அதே இடத்தில் உருமாற்றம் பெற்று புத்துயிர் பெற்றுள்ள நமது ஐஐடி நிறுவனம் அமைந்துள்ளது. இங்கு இளம் திறமைகள் வளர்க்கப்படுகின்றன. அவர்களின் கண்டுபிடிப்புகளும் சிந்தனைகளும் இந்தியாவைத் தற்சார்பு நாடாக மாற்றுவதற்கான உந்து சக்தியாகத் திகழ்கின்றன” என்று தெரிவித்தார்.

தொழில்நுட்ப வளர்ச்சியில் ஐஐடி பட்டதாரிகளின் பங்களிப்பு!

ஐஐடி காரக்பூர் தொடங்கப்பட்ட காலத்தில் இந்தியா சுதந்திரம் பெற்ற ஆரம்ப ஆண்டுகளில் இருந்ததாகவும், அப்போது நாட்டில் முதல் பொதுத்தேர்தல்கூட நடைபெறவில்லை என்றும் பிரதமர் மோடி குறிப்பிட்டார். அந்தக் காலகட்டத்தில் இந்தியாவின் தொழில்துறையையும் உள்கட்டமைப்பையும் கட்டமைக்கப் பொறியாளர்கள் தேவைப்பட்டனர். நாட்டின் அறிவியல் திறன்கள் விரிவடைந்தபோது, இந்த நிறுவனத்தின் பட்டதாரிகள் விண்வெளி மற்றும் அணுசக்தித் திட்டங்களின் முன்னேற்றத்திற்குப் பங்களித்தனர்.

அதன்பிறகு தகவல் தொழில்நுட்பத் துறையின் வளர்ச்சிக் காலம் தொடங்கியது. உலகப் பொருளாதாரத்தில் புதிய வாய்ப்புகள் உருவானபோது, ஐஐடி காரக்பூர் பட்டதாரிகள் இந்தியாவின் மென்பொருள் துறையை வலுப்படுத்தியதுடன், உலகின் மிகப்பெரிய நிறுவனங்கள் சிலவற்றையும் வழிநடத்தும் நிலையை அடைந்தனர். ஒவ்வொரு காலகட்டத்திலும் நாட்டைக் கட்டமைக்கும் தனது பொறுப்பை நிறைவேற்றுவதில் இந்த நிறுவனம் முன்னணியில் இருந்து வருவதாகவும் பிரதமர் பாராட்டினார்.

நினைவு நாணயத்தை வெளியிட்ட பிரதமர்!

ஐஐடி காரக்பூர் நிறுவனத்தின் 75-வது ஆண்டு விழாவையொட்டி, அதன் பவள விழாவைக் குறிக்கும் வகையில் சிறப்பு நினைவு நாணயம் ஒன்றையும் பிரதமர் நரேந்திர மோடி வெளியிட்டார்.

சமீபத்திய செய்திகளையும், ட்ரெண்டிங் செய்திகளையும், அறிய News7 Tamil Express App – ஐ தரவிறக்கம் செய்யுங்கள்.