சென்னை கிண்டி பன்னோக்கு உயர்சிறப்பு மருத்துவமனையின் திறப்பு விழா, குடியரசுத்தலைவரின் பணிகள் காரணமாக தள்ளிவைக்கப்பட்டுள்ளது.
முதலமைச்சர் மு.க.ஸ்டாலினின் அழைப்பினை ஏற்று சென்னை கிண்டியில் ரூ.230 கோடி மதிப்பீட்டில் கட்டப்பட்டுள்ள பன்னோக்கு உயர்சிறப்பு மருத்துவமனையை ஜூன் 5 ஆம் தேதி குடியரசுத் தலைவர் திரெளபதி முர்மு திறந்து வைக்கவுள்ளதாக தமிழ்நாடு அரசு முன்னர் அறிவித்திருந்தது.
அதேபோல், நந்தனம் ஒய்.எம்.சி.ஏ. மைதானத்தில் நடைபெறவுள்ள கருணாநிதி நூற்றாண்டு தொடக்க விழாவிலும் குடியரசுத் தலைவர் திரெளபதி முர்மு கலந்து கொள்ளவுள்ளதாகவும் தெரிவிக்கப்பட்டிருந்தது.
இதையும் படியுங்கள் : புதிய நாடாளுமன்ற கட்டடத்தில் இடம்பெறும் தமிழ்நாட்டின் ‘செங்கோல்’ – சிறப்புகள் என்ன?
இந்நிலையில், குடியரசுத் தலைவரின் வேறு பணிகள் காரணமாக ஜூன் 5 ஆம் தேதி அவர் தமிழ்நாடு வருவதில் தடங்கல் ஏற்பட்டுள்ளது. அதனால் கிண்டி பன்னோக்கு உயர்சிறப்பு மருத்துவமனையின் திறப்பு விழா ஜூன் 5 ஆம் தேதிக்குப் பதில், குடியரசுத் தலைவர் அளிக்கும் வேறொரு நாளில் நடைபெறும் என்று தமிழ்நாடு அரசின் உயர் அலுவலர்கள் நியூஸ் 7 தமிழுக்கு தெரிவித்துள்ளனர்.
