‘மைக்ரோசாப்ட்’ நிறுவனர் பில்கேட்ஸும் அவர் மனைவி மெலிண்டாவும் சட்டப்படி பிரிந்துவிட்டதாக செய்திகள் வெளியாகியுள்ளன.
அமெரிக்காவைச் சேர்ந்த பிரபல கம்ப்யூட்டர் மென்பொருள் தயாரிப்பு நிறுவனம் மைக்ரோசாஃப்ட். இதன் நிறுவனர் பில்கேட்ஸ் (65). இவர் மனைவி மெலிண்டா (56). இவர்கள் கடந்த மே மாதம் விவாகரத்து செய்யப் போவதாக அறிவித்திருந்தனர். 27 ஆண்டுகளாக கணவன், மனைவியாக வாழ்ந்த இவர்களின் திடீர் அறிவிப்பு பரபரப்பை ஏற்படுத்தி இருந்தது.
இந்நிலையில் இவர்களுக்கு வாஷிங்டனின் கிங் கவுண்டி நீதிமன்றம் இப்போது சட்டப்படி விவகாரத்து வழங்கி இருக்கிறது. வாஷிங்டன் நகர வழக்கப்படி, விவகாரத்து கோரி நீதிமன்றத்துக்கு சென்றால் 90 நாட்களுக்கு பிறகே அதிகாரப்பூர்வமாக வாங்கப்படும். அதன்படி இப்போது வழங்கப்பட்டுள்ளது.
உலகின் பெரும் பணக்காரரான பில்கேட்சின் சொத்து மதிப்பு 10 லட்சத்து 95 ஆயிரம் கோடி ரூபாயாக, விவாகரத்துக்கு முன் இருந்தது. விவாகரத்து ஆனாலும் பில் அண்ட் மெலிண்டா அறக்கட்டளையில் இணைந்து செயல்பட உள்ளதாக இருவரும் தெரிவித்துள்ளனர். பில்கேட்ஸும் மெலிண்டாவும் காதலித்து 1994 ஆண்டு ஹவாய் தீவில் திருமணம் செய்துகொண்டனர்.
