டெல்லியில் அடுத்தாண்டு ஜனவரி 1ம் தேதி வரை பட்டாசு விற்கவும், வெடிக்கவும் தடை விதித்து அம்மாநில அரசு அறிவித்துள்ளது.
இந்தியாவில் மக்கள் தொகை அதிகம் உள்ள நகரங்களில் கடந்த சில ஆண்டுகளாக காற்று மாசு அதிகரித்த வண்ணம் இருக்கிறது. அதிகபட்சமாக தலைநகர் டெல்லி காற்று மாசுவால் திணறி வருகிறது. அங்கு கடந்த சில ஆண்டுகளாகவே காற்றின் தரம் மிக மிக மோசமான நிலையில் இருந்து வருகிறது.
காற்றின் மாசுபாடு காரணமாக கடந்த சில மாதங்களுக்கு முன்பு அங்கு பள்ளி, கல்லூரிகளுக்கு விடுமுறை அளிக்கப்பட்டது. டெல்லியில் காற்றுமாசை கட்டுப்படுத்த மாநில நிர்வாகம் உடனடி நடவடிக்கைகளை மேற்கொள்ள வேண்டும் என்று உச்சநீதிமன்றம் உத்தவிட்டிருந்தது. இதையடுத்து காற்றின் மாசை குறைக்க வாகன பயன்பாட்டை குறைக்க வேண்டும் என்றும், அதிகமாக பொதுக்போக்குவரத்தை மக்கள் பயன்படுத்த வேண்டும் என்று பல்வேறு கட்டுப்பாடுகளை விதித்து. இதன் காரணமாக டெல்லியில் கடந்த நான்கு ஆண்டுகளாக தீபாவளி பண்டிகை சமயத்தில் பட்டாசுகள் வெடிக்க தடை அமலில் இருந்து வருகிறது.
இந்த சூழலில் நாடு முழுவதும் அக்டோபர் 24-ம் தேதி தீபாவளி பண்டிகை கொண்டாடப்பட இருக்கிறது. இந்நிலையில் தலைநகர் டெல்லியில் பட்டாசுகளை விற்கவும், வெடிக்கவு வரும் 2023ம் ஆண்டு ஜனவரி 1-ம் தேதி வரை தடை விதித்து அம்மாநில சுற்றுச்சூழல் துறை அமைச்சர் கோபால்ராய் உத்தரவிட்டுள்ளார்.
இதுதொடர்பாக அவர் தனது ட்விட்டர் பதவில், டெல்லியில் இந்த முறை ஆன்லைன் பட்டாசு விற்பனைக்கும், நேரடி விற்பனைக்கும் தடை விதிக்கப்படுகிறது. இந்த கட்டுப்பாடு ஜனவரி 1, 2023 வரை அமலில் இருக்கும். தடையை கடுமையாக அமல்படுத்த டெல்லி போலீஸ், டெல்லி மாசுக் கட்டுப்பாட்டுக் குழு மற்றும் வருவாய் துறையுடன் இணைந்து செயல் திட்டம் வகுக்கப்படும். டெல்லியில் கடந்த ஆண்டை போல் மாசு அபாயத்தில் இருந்து மக்களை காப்பாற்றும் வகையில், இந்த முறையும் அனைத்து வகையான பட்டாசுகளின் உற்பத்தி, சேமிப்பு, விற்பனை மற்றும் பயன்பாடு முற்றிலும் தடை செய்யப்பட்டுகிறது என்று பதிவிட்டுள்ளார்.
