முக்கியச் செய்திகள் உலகம் கட்டுரைகள் தமிழகம் செய்திகள் Health

தரமற்ற சானிட்டரி நாப்கின்களால் பேராபத்து : திரும்பப் பெறுமா நிறுவனங்கள்?


சுகிதா சாரங்கராஜ்

கட்டுரையாளர்

இந்தியாவில் விற்பனை ஆகும் 10 வகையான முன்னணி சானிட்டரி நாப்கின்களில்  உள்ள  ரசாயன பொருட்கள்,  புற்றுநோய், குழந்தையின்மை, சக்கரை நோய், சிறுநீரகம் செயலிழப்பது உள்ளிட்ட பேராபத்தான நோய்களை உண்டாக்குகின்றன என்ற அதிர்ச்சி  ஆய்வறிக்கையை வெளியிட்டுள்ளது டெல்லியை தலைமையிடமாக கொண்டு செயல்படும் தன்னார்வ தொண்டு நிறுவனம் . 
இந்தியாவில் அதிகளவில் விற்கப்படும் நாப்கின்களை சோதித்து “ Wrapped in Secrecy” என்ற தலைப்பில் அந்த ஆய்வறிக்கையை தன்னார்வ தொண்டு நிறுவனம் வெளியிட்டுள்ளது. அதாவது நாப்கின்கள்  பல வகையான ரசாயன வேதிப் பொருட்கள் மூலம் தயாரிக்கப்படுகின்றன. அதிக நேரம் ஈரப்பதத்தை உறிஞ்சும் தன்மையுள்ள phthaletes மற்றும் ஈரப்பதத்தை  ஆவியாக்கும் Volatile Organic Compounds (VOC)  கரிம சேர்மங்களின் தடயங்கள் இருப்பதை ஆராய்ச்சியாளர்கள் கண்டுபிடித்துள்ளனர். இந்த ரசாயனங்கள் புற்றுநோய் செல்களை உருவாக்கும் திறன் கொண்டவைகளாக உள்ளது  என்பது ஆய்வில் தெரிய வந்துள்ளது.
சோதனைக்கு எடுத்துக் கொள்ளப்பட்ட 10 முன்னணி பிராண்டு  நாப்கின்களில்  8  செயற்கை மூலப்பொருட்கள் மூலம் தயாரிக்கப்பட்டவை, மற்ற 2 பிராண்டுகள் இயற்கை முறையில் சுத்தமான பருத்தியினால் செய்யப்பட்ட நாப்கின்கள் என்று சந்தையில் விற்கப்படுபவை . அனைத்திலுமே இத்தகைய ரசாயனக் கூறுகள் இருந்தன என்பது கூடுதல் அதிர்ச்சியை அளித்திருக்கிறது.  
பெண்கள் பயன்படுத்தும் இத்தகைய சானிட்டரி நாப்கின்களில் உள்ள ரசாயனங்களால்  பெண்களின் கருப்பை பலவீனமடைவதோடு அதிகளவில் கருப்பையில் வலி ஏற்பட்டு உயர் ரத்த அழுத்தமும் ஏற்படுகிறது. அது மட்டுமின்றி கருவுறுவதில்  சிக்கல், நீரிழிவு நோய் மற்றும் சிறுநீரக பாதிப்பு  உள்ளிட்ட பல எதிர்விளைவுகள்  இந்த நாப்கின்களில்  உள்ள ரசாயனங்கள் ஏற்படுத்துகின்றன. நாப்கின்கள் குறித்த இந்த அறிக்கை வந்த பிறகு டேம்பூன்(Tampons) களை பயன்படுத்தலாம்  என்றும் மென்சுரல் கப்களை பயன்படுத்தலாம் என்றும் அவை தான் மாற்று என்பது போன்ற பல பரிந்துரைகள் முன் வைக்கப்படுகின்றன.
ஆனால்  அமெரிக்காவில் 2020 ம் ஆண்டு  வெளியிடப்பட்ட ஆய்வறிக்கைகளில் நாப்கின்கள் மட்டுமல்லாது பெண் சுகாதாரத்தை பேணும் அனைத்து வகையான பொருட்களையும் கணக்கில் கொண்டு சோதனைக்கு உட்படுத்தினர். அவை பெண்களின் பிறப்புறுப்புகளை சுத்தம் செய்ய பயன்படுத்தும் பொருட்கள் , அதிகளவில் வெள்ளைப்படுதலுக்கு ஆளாகும் பெண்கள்   பயன்படுத்தும் பேண்டி லைனர்கள், டேம்பூன்கள்  அனைத்திலுமே  ஆபத்தை விளைவிக்கின்ற ரசாயனங்கள் உள்ளன என்பதை அந்த அறிக்கை வெளிச்சம் போட்டு காண்பித்தது. அமெரிக்காவின்  ஆய்வறிக்கை தான்  அனைத்து நாடுகளிலும் பெண்கள் சுகாதாரம் பேணும் தயாரிப்பு பொருட்கள் குறித்த ஆய்வுக்கு முன்னுதாரணமாக எடுத்துக் கொள்ளப்படுகின்றன.
2017 ம் ஆண்டு தென் கொரியாவில் பெண்கள் அமைப்புகள் ஒன்று சேர்ந்து  நாப்கின்கள் தயாரிக்கும் நிறுவனங்கள் மீது பெண்களின்  சுகாதாரத்தை ,பாதுகாப்பை உறுதிப்படுத்த வேண்டும் என்று வழக்கு தொடர்ந்தன. அந்த வழக்கின் தீர்ப்பு அடிப்படையில் பெண்களுக்கு பக்கவிளைவுகளை ஏற்படுத்தும் முன்னணி நாப்கின் நிறுவனங்கள் தங்களது பொருட்களை சந்தையிலிருந்து திரும்பப் பெற்றன. சமீபத்தில் இந்தியாவில் டவ் ஷாம்பூ நிறுவனமானது அவர்கள் ஷாம்பூ தயாரிப்புகளில் உள்ள ரசாயனங்கள் புற்றுநோய் உண்டாக்க கூடியதாக உள்ளன என்று  அந்நிறுவனம் சந்தைகளில் இருந்த தங்களது ஷாம்பூ பொருட்களை திரும்பப் பெற்றன. அதே போன்று இந்த அறிக்கையில் சுட்டிக் காட்டப்பட்டுள்ள அல்லது சோதனைக்கு உட்படுத்திய  நாப்கின் நிறுவனங்கள் தங்களது பொருட்களை சந்தையில் இருந்து திரும்ப பெறுவது தான் சரியானதாக இருக்கும் .
உலகம் முழுவதும் நாப்கின் போன்ற பெண்கள் சுகாதாரம் பேணும் பொருட்களின்  தயாரிப்புகளுக்கான சட்டம் வலுவானதாக இல்லை . அமெரிக்காவில் உணவு மற்றும் ரசாயன கட்டுப்பாடு தர நிர்ணய நிறுவனம் இத்தகைய பொருட்களுக்கான சோதனை, கண்காணிப்பு கட்டாயமல்ல என்பதாக உள்ளது.  பிரான்ஸ், ஆஸ்திரேலியா மற்றும் சீனாவில் தற்போது தான் கொஞ்சம் விதிகள் கடுமையாக்கப்பட்டு இத்தகைய தயாரிப்புகள் தொடர் சோதனைக்கு உட்படுத்தப்படுகின்றன.  ஐரோப்பிய யூனியன் மற்றும் தென் கொரியாவில்  சட்ட ரீதியாக பல கட்டுப்பாடுகளை இத்தகைய பொருட்கள் தயாரிக்கும் நிறுவனங்கள் மேற்கொள்கின்றன.
உதராணமாக , ஐரோப்பிய நாடுகளில் ஈரப்பதத்தை உறிஞ்சும் phthalates ன் அளவு  அதிகபட்சமாக 0.1 % வரை தான் இருக்க வேண்டும் என்பது உள்ளிட்ட பல்வேறு கட்டுப்பாடுகள் விதிக்கப்பட்டுள்ளன. தென்கொரியாவின் phthalates பயன்படுத்தவே தடை விதிக்கப்பட்டுள்ளது. இந்தியாவில் இத்தகைய பொருட்களை தயாரிக்க இந்திய தர நிர்ணய சான்றிதழ் வழங்குவதோடு சரி, நாப்கின்களில் ஈரப்பதத்தை  உறிஞ்சும் தன்மை மற்றும் நாப்கின்களில் பயன்படுத்தப்படும் செயற்கை இழைகளின் தன்மை ஆகியவற்றை மட்டுமே தரநிர்ணயம் செய்கின்றன.  ரசாயன கட்டுப்பாடுகள் , அவற்றை பயன்படுத்தும் அளவு தொடர்பாக  எந்த சட்டமும் வலியுறுத்தவில்லை.
இந்த ஆய்வறிக்கையை வெளியிட்ட தன்னார்வ தொண்டு நிறுவனமே முன்வைக்கும் முக்கியமான கோரிக்கையானது , இரண்டு ரசாயனங்களை மட்டுமே சோதனைக்கு உட்கொண்டதாகவும் நாப்கின்களில் உள்ள மற்ற ரசாயனங்களை சோதனை செய்ய அரசு முன் வர வேண்டும் என்பதாகும். கூடவே பெண்கள் சுகாதாரம் பேணும் பொருட்கள் தயாரிப்புகளுக்கு கடுமையான சட்டம் மற்றும் விதிகளை உருவாக்கி இத்தகைய பொருட்களின் தரத்தை மேம்படுத்துவதோடு தொடர்ந்து சந்தையில் விற்பனைக்கு வரும் பொருட்களை கண்காணித்து அவற்றின் தரத்தை சோதிக்க வேண்டும் .
இந்த ஆய்வறிக்கைக்கு பிறகு பெண்களுக்கே ஒரு குழப்பம் வருகிறது . வழக்கமாக மாதவிடாய் நாட்களில் வரும் உளவியல், உடல் ரீதியான பிரச்னைகளோடு இப்போது நாப்கின் குறித்த பிரச்னையும் சேர்ந்துகொண்டுள்ளது. நாம் பயன்படுத்தும் நாப்கின் தரமானதா ? எந்த நாப்கினை பயன்படுத்துவது சிறந்தது ? நாப்கினுக்கு மாற்று என்று சொல்லப்படும் பொருட்களை பயன்படுத்தலாமா ? என்று அடுக்கடுக்கான சந்தேகங்கள், கேள்விகள் உள்ளன. இவற்றிற்கெல்லாம் மருத்துவர்கள் அவரவர் அனுபவத்தில் பல்வேறு மாற்று கருத்துகளை, மருந்துகளை பரிந்துரைத்தாலும் பெண்களின் சுகாதாரம் பேணும் பொருட்களின் தரம் சார்ந்த சந்தேகங்களுக்கு விடை அளிக்க வேண்டியது அரசின் கடமையாகும் .
இந்தியாவில் சானிட்டரி நாப்கின்களை இன்னும் பயன்படுத்தாத பெண்கள் இருக்கிறார்கள். இப்போது தான் போதிய விழிப்புணர்வு ஏற்படுத்தப்பட்டு கிராமங்களுக்கு சானிட்டரி நாப்கின்கள் போய் சேர்ந்திருக்கின்றன. இன்றைக்கும் சில குடும்ப பெண்கள் மாதம் நாப்கின்கள் வாங்குவதற்கான செலவைக்கூட செய்ய முடியாத நிலையில் உள்ளனர். அவர்கள் இத்தகைய பொருட்களை வாங்குவதற்கு பதிலாக சுகாதாரமற்ற முறையில் பழைய துணிகளை பயன்படுத்துவதாலும், அதனை  மீண்டும் மீண்டும் பயன்படுத்தும் போது ஏற்படும் உடல் உபாதைகள் குறித்தும்  தொடர்ந்து இங்கே விழிப்புணர்வுகள் ஏற்படுத்தப்பட்டு,  நாப்கின்களுக்கு இப்போது தான் பெண்கள் மாறி இருக்கிறார்கள் . அத்தகைய  பெண்களை மீண்டும் அச்சத்திற்கும், குழப்பத்திற்கும் ஆளாக்கி இருக்கிறது இந்த ஆய்வறிக்கை. அதனை சரி செய்ய வேண்டியது அரசின் கடமை. அதனால் உடனடியாக சந்தைகளில் விற்கப்படும் இத்தகைய பொருட்களை சோதனை செய்து தரமற்ற பொருட்களை சந்தையிலிருந்து சம்மந்தப்பட்ட நிறுவனங்களை திரும்பப்பெற வைக்க வேண்டும். ஏனெனில்  பெண்களுக்கு சுகாதாரமான வாழ்வியலை வழங்க வேண்டியது அரசின் கடமை.
  • சுகிதா சாரங்கராஜ்

இந்த கட்டுரை தொடர்பான வீடியோ செய்தி – சானிட்டரி நாப்கின் – புற்றுநோய் அபாயம்?

சமீபத்திய செய்திகளையும், ட்ரெண்டிங் செய்திகளையும், அறிய News7 Tamil Express App – ஐ தரவிறக்கம் செய்யுங்கள்.
Advertisement:
SHARE

Related posts

அனுமதியின்றி போராட்டம்: வைகோ மீதான வழக்கு ரத்து

G SaravanaKumar

முதலமைச்சரின் அபுதாபி பயணமும், தலைவர்களின் வாழ்த்தும்

G SaravanaKumar

நாயை கொடூரமாக கொன்ற இளைஞர் கைது!

Niruban Chakkaaravarthi