தமிழ்நாட்டில் தடை செய்யப்பட்ட பிளாஸ்டிக் பொருட்களை உற்பத்தி செய்யும் தொழிற்சாலைகள் குறித்து தகவல் அளிப்பவர்களுக்கு வெகுமதி அளிக்கப்படும் என மாசு கட்டுப்பாட்டு வாரியம் அறிவித்துள்ளது.
ஒரு முறை பயன்படுத்தித் தூக்கி எறியப்படும் பிளாஸ்டிக் பொருட்கள் தயாரிக்கப்படுவதும்; சேமித்து வைப்பதும், விநியோகிப்பதும், போக்குவரத்து செய்வதும், விற்பதும், உபயோகிப்பதும் தடை செய்யப்பட்டுள்ளன. தமிழ்நாடு மாசு கட்டுப்பாடு வாரியம் ஆய்வுகள் மற்றும் புகார்களின் அடிப்படையில் தடை செய்யப்பட்ட பிளாஸ்டிக் உற்பத்தி செய்யும் தொழிற்சாலைகளைக் கண்டறிந்து மூடுதல் உத்தரவுகளைப் பிறப்பித்து வருகிறது.
இருப்பினும் குடியிருப்பு வணிக நிறுவனங்களுக்குள் ஒரு சிறிய இடத்தில் சட்டவிரோதமாக செயல்படும் இத்தகைய தடை செய்யப்பட்ட பிளாஸ்டிக் உற்பத்தியாளர்களை அடையாளம் காண்பது கடினமாக உள்ளது. இந்த உற்பத்தியாளர்களில் பெரும்பாலானவர்கள்,எந்த அரசுத் துறைகளிடமும் முறையான பதிவு மற்றும் அனுமதி இல்லாமல் தற்காலிகமாக செயல்பட்டு வருகின்றன. எனவே சுற்றுச்சூழல் மீது அக்கறை கொண்ட பொதுமக்கள் மற்றும் தடை செய்யப்பட்ட பிளாஸ்டிக் பொருட்களை உற்பத்தி செய்யும் தொழில் நிறுவனங்களுக்கு அருகில் குடியிருப்பவர்கள், சட்டவிரோதமாக இயங்கும் அத்தொழிற்சாலைகள் குறித்த தகவலைத் தமிழ்நாடு மாசு கட்டுப்பாடு வாரியத்திடம் தெரிவிக்குமாறு கேட்டுக்கொண்டனர்.
புகார்களை மின்னஞ்சல், கடிதம், தொலைபேசி அழைப்புகள் மற்றும் வாட்ஸ் அப் மூலம் பதிவு செய்யலாம். மேலும் புகார் அளிப்பவர்கள் தங்கள் பெயர், முகவரி மற்றும் தொலைபேசி எண் முதலியவற்றை அளிக்குமாறு கேட்டுக்கொள்ளப்படுகிறார்கள். எனவே இது உண்மைக்குப் புறம்பான தகவல்களைக் கொடுப்பதைத் தடுக்க முடிவதாக அதிகாரிகள் தெரிவித்துள்ளனர்.
மேலும் சுற்றுச்சூழல் மீது அக்கறை கொண்ட பொதுமக்களுக்கு, அவர்களின் பங்களிப்பிற்காகப் பாராட்டும் வெகுமதியும் அளிக்கப்படும் என்றும் தகவல் தெரிவிப்பவர்களின் ரகசியத் தன்மை கண்டிப்பாகப் பராமரிக்கப்படும் என்றும் தெரிவித்துள்ளனர்.
