சென்னையில் தொடர்ந்து நான்காவது நாளாக சின்ன வெங்காயம் ரூ.120-க்கு விற்பனையாவதால் பொதுமக்கள் அதிருப்தி அடைந்துள்ளனர்.
சென்னை கோயம்பேடு சந்தையில் காய்கறிகளின் வரத்தைப் பொறுத்து விலையில் ஏற்ற இறக்கம் காணப்படுவது வழக்கம். அந்த வகையில், கடந்த வாரத்தை விட இந்த வாரம் காய்கறிகளின் விலை உயர்ந்துள்ளது. வரத்து குறைவு காரணமாக வெங்காயத்தின் விலை ஏற்றத்துடன் காணப்படுகிறது.
கோயம்பேடு மொத்த விற்பனை சந்தையில் சின்ன வெங்காயம், முதல் ரகம் கடந்த வாரம் 60 ரூபாய்க்கும், இரண்டாம் ரகம் 80 முதல் 90 ரூபாய் வரையும் விற்பனை செய்யப்பட்டது. இந்நிலையில் இந்த வாரம், சின்ன வெங்காயத்தின் விலை 60 ரூபாய் அதிகரித்து, 120 ரூபாய்க்கும், சில்லறை விற்பனையில் 130 ரூபாய்க்கும் விற்பனை செய்யப்படுகிறது. தொடர்ந்து நான்காவது நாளாக சின்ன வெங்காயம் ரூ.120-க்கு விற்பனை செய்யப்படுவதால் பொதுமக்கள் அதிருப்தி அடைந்துள்ளனர்.
இதையும் படியுங்கள் : “நாங்கள் தவறவிட்டுவிட்டோம்..!” – தென்னாப்பிரிக்காவுடனான போட்டிக்கு பின் பாபர் ஆசம் பேட்டி
அதேபோல் பெரிய வெங்காயம் கடந்த வாரத்தை விட 10 ரூபாய் அதிகரித்து மொத்த விற்பனையில் 50 ரூபாய்க்கும், சில்லறை விற்பனையில் 60 ரூபாய்க்கும் விற்பனை செய்யப்படுகிறது. வடகிழக்கு பருவமழை தொடங்கி உள்ள நிலையில், வரத்து குறைவின் காரணமாகவும், தீபாவளி பண்டிகை நெருங்கி வருவதாலும் விலையேற்றம் தொடரும் என வியாபாரிகள் தகவல் தெரிவிக்கின்றனர். வெளி சந்தைகளில் சின்ன வெங்காயம் கிலோ 140 முதல் 160 ரூபாய் வரை விற்பனை செய்யப்பட்டு வருவது குறிப்பிடத்தக்கது.
