வங்கதேசத்தின் டாக்காவில் உள்ள தேசிய மைதானத்தில் நவம்பர் 17 – செவ்வாய்க்கிழமை நடைபெற்ற 2026-ம் ஆண்டுக்கான தெற்காசிய கால்பந்து சாம்பியன்ஷிப் தொடரின் இறுதிப்போட்டியில் இந்தியா – பாகிஸ்தான் அணிகள் மோதின. 6 அணிகள் பங்கேற்ற இந்தத் தொடரின் இறுதிப்போட்டி மிகுந்த எதிர்பார்ப்பை ஏற்படுத்தியிருந்தது. பரபரப்பாக நடைபெற்ற இந்த ஆட்டத்தின் முதல் பாதியில் பாகிஸ்தான் அணி ஆதிக்கம் செலுத்தியது. இருப்பினும், இரண்டாவது பாதியில் 10 வீரர்களுடன் விளையாட வேண்டிய நிலைக்குத் தள்ளப்பட்டதால் அந்த அணியின் வெற்றி வாய்ப்பு கேள்விக்குறியானது. இதனைச் சாதகமாகப் பயன்படுத்திக்கொண்ட இந்திய அணி கடைசி நேரத்தில் 2 கோல்களை அடித்து வெற்றியைத் தனதாக்கியது.
முதல் பாதியில் முன்னிலை பெற்ற பாகிஸ்தான்!
இந்திய அணிக்கு எதிரான முதல் லீக் போட்டியில் 3-2 என்ற கோல் கணக்கில் தோல்வியடைந்த பாகிஸ்தான், இறுதிப்போட்டியில் கூடுதல் பலத்துடன் களமிறங்கியது. குறிப்பாக, அணியின் முக்கிய வீரர்களான அப்துல் சமத் அர்ஷத், அப்துல்லா இக்பால் ஆகியோரின் வருகை பாகிஸ்தான் அணிக்கு உத்வேகத்தை அளித்தது. போட்டியின் முதல் பாதியில் பாகிஸ்தான் அணி சிறப்பாக விளையாடி இந்திய அணியின் கோல் முயற்சிகளைத் தடுத்தது. 18-வது நிமிடத்தில் மெக்கீல் அப்துல்லா கோல் அடிக்க முயன்றபோதும், இந்திய கோல் கீப்பர் அர்ஷ் அன்வர் ஷேக் அதனைத் தடுத்தார்.
இதற்குப் பதிலடி கொடுக்கும் வகையில் 34-வது நிமிடத்தில் இந்திய வீரர் ரிக்கி ஷபாங் கோல் அடிக்க முயன்றார். ஆனால், பாகிஸ்தான் கோல் கீப்பர் யூசுப் பட் சிறப்பாகச் செயல்பட்டு கோல் வாய்ப்பைத் தடுத்தார். முதல் பாதியின் கடைசி நிமிடங்களில் ஜுனைத் ஷா அடித்த பந்தை இந்திய வீரர் கைமின்தாங் லுங்டிம் தவறுதலாகத் தடுக்க முயன்றபோது, அது அலம்கீர் கானிடம் சென்றது. இதனைச் சரியாகப் பயன்படுத்திய அவர், பந்தை வலைக்குள் செலுத்தி பாகிஸ்தான் அணிக்கு 1-0 என்ற முன்னிலையைப் பெற்றுத் தந்தார்.
சிவப்பு அட்டையால் மாறிய ஆட்டம்!
இரண்டாவது பாதியிலும் பாகிஸ்தான் அணி உற்சாகத்துடன் விளையாடியது. ஆனால், போட்டியின் 60-வது நிமிடத்தில் ஜுனைத் ஷா செய்த தவறான ஆட்டம் அந்த அணிக்குப் பெரும் பின்னடைவை ஏற்படுத்தியது. இந்திய வீரர் பிரிசன் பெர்னாண்டஸை உயர்த்திய காலால் கடுமையாகத் தாக்கியதற்காக VAR ஆய்வுக்குப் பிறகு அவருக்கு சிவப்பு அட்டை வழங்கப்பட்டது. இதனால் பாகிஸ்தான் அணி 10 வீரர்களுடன் விளையாட வேண்டிய நிலை ஏற்பட்டது. இதனைத் தொடர்ந்து சில நொடிகளிலேயே இந்திய அணி பதிலடி கொடுத்தது. லுங்டிம் அனுப்பிய கிராஸ் பந்தை மேக்கார்டன் நிக்சன் தட்டிக்கொடுக்க, இளம் வீரர் சுஹைல் பட் அதனை கோலாக மாற்றினார். இதனால் ஆட்டம் 1-1 என்ற சமநிலையை எட்டியது.
கடைசி நிமிடத்தில் வெற்றியை உறுதி செய்த இந்தியா!
இதன்பிறகு தொடர்ந்து தாக்குதல் ஆட்டத்தை வெளிப்படுத்திய இந்திய அணி, ஆட்டத்தின் 88-வது நிமிடத்தில் வெற்றிக்கான கோலை அடித்தது. மாற்று வீரராகக் களமிறங்கிய அப்துல் ரபீஹ் அடித்த துல்லியமான கார்னர் பந்தை சந்தீப் மண்டி தலையால் முட்டி கோல் அடித்தார். பந்து தரையில் பட்டு மேலே எழுந்தபோது, அதனைத் தடுக்க முயன்ற பாகிஸ்தான் கோல் கீப்பர் யூசுப் பட் தவறவிட்டார். இதனால் பந்து வலைக்குள் சென்றது. இதன்மூலம் இந்திய அணி 2-1 என்ற கோல் கணக்கில் வெற்றி பெற்று தெற்காசிய கால்பந்து சாம்பியன்ஷிப் பட்டத்தைக் கைப்பற்றியது.
தொடர்ந்து 3-வது முறையாக சாம்பியன்; 10-வது பட்டம் வென்ற இந்தியா!
சிறப்பான ஆட்டத்தை வெளிப்படுத்திய இந்திய அணி தொடர்ந்து மூன்றாவது முறையாக SAFF சாம்பியன்ஷிப் பட்டத்தை வென்று புதிய வரலாறு படைத்துள்ளது. இதன்மூலம் SAFF சாம்பியன்ஷிப் வரலாற்றில் இந்தியா இதுவரை மொத்தம் 10 முறை சாம்பியன் பட்டம் வென்றுள்ளது. 1993, 1997, 1999, 2005, 2009, 2011, 2015, 2021, 2023 மற்றும் 2026 ஆகிய ஆண்டுகளில் இந்தியா பட்டம் வென்றுள்ளது. மறுபுறம், முதல் முறையாக SAFF சாம்பியன்ஷிப் இறுதிப்போட்டிக்கு முன்னேறிய பாகிஸ்தான் அணி பட்டம் வெல்லும் வாய்ப்பை இழந்தது. கடைசியாக 1991-ம் ஆண்டு தெற்காசிய விளையாட்டுப் போட்டியில் தங்கப் பதக்கம் வென்ற பாகிஸ்தான் கால்பந்து அணி, நீண்ட காலமாகத் தொடரும் தனது கோப்பை வறட்சியை முடிவுக்குக் கொண்டுவரும் வாய்ப்பை மீண்டும் தவறவிட்டது.




