ஹைதராபாத் மக்களவைத் தொகுதிக்கான பாஜக வேட்பாளர் மாதவி லதா, முஸ்லிம் பெண்களின் ஹிஜாப்பை அகற்றச் சொல்லி வாக்காளர் அடையாள அட்டையை ஒப்பிட்டு சரிபார்த்தது சர்ச்சையாகியுள்ளது.
ஹைதராபாத் மக்களவைத் தொகுதிக்கான வாக்குப்பதிவு இன்று காலை 7 மணிக்கு தொடங்கியது. இந்த தொகுதிக்குள்பட்ட வாக்குச்சாவடிகளை பார்வையிட்ட பாஜக வேட்பாளர் மாதவி லதா, முஸ்லிம் பெண்களின் ஹிஜாப்பை அகற்றச் சொல்லி வாக்காளர் அடையாள அட்டையை ஒப்பிட்டு சரி பார்த்தார். மேலும், ஹைதராபாத் தொகுதிக்குள்பட்ட ஆசம்பூரில் உள்ள வாக்குச்சாவடி எண் 122-ஐ பார்வையிட்ட மாதவி லதா, வாக்காளர் பட்டியலில் முரண்பாடுகள் இருப்பதாகக் குற்றம்சாட்டினார்.
இது குறித்து மாதவி லதா கூறுகையில், “காவல் துறையினர் மிகவும் மந்தமாக இருப்பது போல் தோன்றுகிறது, அவர்கள் சுறுசுறுப்பாக இல்லை. அவர்கள் எதையும் சரிபார்க்கவில்லை. மூத்த குடிமக்கள் வாக்காளர்கள் இங்கு வருகிறார்கள், ஆனால் அவர்களின் பெயர்கள் பட்டியலில் இருந்து நீக்கப்பட்டுள்ளன. அவர்களில் சிலர் கோஷாமஹாலில் வசிப்பவர்கள், ஆனால் அவர்களின் பெயர்கள் ரங்காரெட்டி பட்டியலில் உள்ளன” என்று கூறினார்.
பாஜக வேட்பாளர் மாதவி லதா வாக்காளர் அடையாள அட்டைகளை சரிபார்க்கும் விடியோ குறித்து செய்தியாளர்களின் கேள்விக்கு பதிலளித்த தெலங்கானா முதல்வர் ரேவந்த் ரெட்டி, “நான் (விடியோவை) பார்க்கவில்லை, ஆனால் பாஜக முஸ்லிம் வாக்குகளை பிளவுபடுத்த முயற்சிக்கிறது, ஆனால் இந்த பிரச்னைகள் அனைத்தும் அசாதுதீன் ஒவைசிக்கு உதவும். இதனால் பாஜகவுக்கு எந்தப் பலனும் இல்லை” என்றார்.
ஹைதராபாத் தொகுதியில் ஏஐஎம்ஐஎம் வேட்பாளர் அசாதுதீன் ஓவைசி, காங்கிரஸ் வேட்பாளர் முகமது வலியுல்லா சமீர், பிஆர்எஸ் வேட்பாளர் கடம் ஸ்ரீநிவாஸ் யாதவ் ஆகியோரை எதிர்த்து பாஜக சார்பில் மாதவி போட்டியிடுகிறார்.
