டெங்கு காய்ச்சல் பாதிப்பு அடுத்து வரும் மாதங்களில் அதிகரிக்க வாய்ப்புள்ள நிலையில், மாநிலம் முழுவதும் மருத்துவ முகாம்களை நடத்த அதிகாரிகளுக்கு பொது சுகாதாரத் துறை உத்தரவிட்டுள்ளது.
டெங்கு காய்ச்சலை பரப்பும் ஏடிஸ் வகை கொசுக்கள் மழை மற்றும் குளிர்காலங்களில் அதிகமாக பெருக்கமடைகின்றன. இந்த ஆண்டு மே மாதம் இறுதி வரை தமிழ்நாட்டில் 2,548 பேருக்கு டெங்கு பாதிப்பு ஏற்பட்டுள்ளது. தமிழ்நாட்டில் கடந்த சில தினங்களாக கொரோனா பரவல் அதிகரித்து வரும் அதேவேளையில், மற்றொருபுறம் டெங்கு காய்ச்சல் பரவும் நிலை ஏற்பட்டுள்ளது. தற்போது சென்னை உள்பட தமிழ்நாட்டில் பல பகுதிகளில் பரவலாக மழை பெய்து வருவதால் டெங்கு காய்ச்சல் பரவாமல் இருக்க தடுப்பு நடவடிக்கைகள் எடுக்க மாவட்ட சுகாதார துணை இயக்குநர்களுக்கு பொது சுகாதாரத்துறை இயக்குநர் செல்வவிநாயகம் சுற்றறிக்கை ஒன்றை அனுப்பியுள்ளார்.
அதில், இந்த ஆண்டு சில மாவட்டங்களில் டெங்கு பாதிப்பு பதிவாகியுள்ளது. அடுத்து வரும் மாதங்களில் மழைப்பொழிவு இருக்கும் என்பதால் கொசு ஒழிப்பு நடவடிக்கைகளை விரிவாக மேற்கொள்ள வேண்டும். டெங்கு காய்ச்சல் பாதிப்பு குறித்து தனியார் மற்றும் அரசு மருத்துவமனைகள், மாவட்ட சுகாதார இயக்குநரகத்துக்கு தகவல் அளிப்பதை உறுதி செய்ய வேண்டும்.
அண்டை மாவட்டங்கள் அல்லது மாநிலங்களில் டெங்கு பரவல் அதிகமாக இருக்கும்பட்சத்தில் அதுகுறித்த விவரங்களை மாவட்ட துணை சுகாதார இயக்குநருக்கு தெரிவிக்க வேண்டும். நோய்களை பரப்பும் கொசுக்கள் மற்றும் லார்வா உற்பத்தி குறித்து கண்காணிக்க வேண்டும். வீடுகள், பள்ளிகள், பூங்காக்கள், கல்லூரிகள், பொது இடங்கள் என அனைத்து இடங்களிலும் தனித்தனியே விழிப்புணர்வு நடவடிக்கைகளை மேற்கொள்ள வேண்டும். மழைநீர் தேங்காத வகையில் கழிவுகளை அகற்ற அறிவுறுத்த வேண்டும்.
குடிநீரில் போதிய அளவு குளோரின் கலந்து விநியோகித்தல், நிலவேம்பு குடிநீர் விநியோகித்தல் உள்ளிட்ட நடவடிக்கைகளை முன்னெடுக்க வேண்டும். இவ்வாறு அந்த சுற்றறிக்கையில் அவர் தெரிவித்துள்ளார்.
