மகாராஷ்டிரா, டெல்லி உள்ளிட்ட 19 மாநிலங்களில், கொரோனா தொற்று பாதிப்பு எண்ணிக்கை குறைந்துள்ளதாக, மத்திய சுகாதாரத்துறை அமைச்சகம் தெரிவித்துள்ளது.
இதுதொடர்பாக மத்திய சுகாதாரத்துறை அமைச்சகம் வெளியிட்டுள்ள பட்டியலில்,
மகாராஷ்டிரா, உத்தரப்பிரதேசம், ஆந்திரா, டெல்லி, ராஜஸ்தான் ஆகிய மாநிலங்களில், தினசரி தொற்று எண்ணிக்கை குறைந்து வருவதாகத் தெரிவித்துள்ளது.
ஹரியானா, சட்டீஸ்கர், பீகார், குஜராத் உள்ளிட்ட மாநிலங்களிலும் பாதிப்பு குறைந்துள்ளதாக தெரிவிக்கப்பட்டுள்ளது.
மத்திய பிரதேசம், உத்தரகாண்ட், ஜார்கண்ட் உள்ளிட்ட மாநிலங்களில் தினசரி தொற்று எண்ணிக்கை குறைந்துள்ளதாக குறிப்பிட்டுள்ள சுகாதாரத்துறை அமைச்சகம், தெலங்கானா, சண்டிகர், லடாக், டையூ-டாமன் ஆகிய மாநிலங்களிலும் குறைந்து வருவதாகத் தெரிவித்துள்ளது. லட்சத்தீவு, அந்தமான் நிக்கோபர் தீவுகளிலும் பாதிப்பு குறைந்துள்ளதாக சுட்டிக்காட்டியுள்ள அமைச்சகம், கர்நாடகா, கேரளா, தமிழ்நாடு, புதுச்சேரி உள்ளிட்ட தென் மாநிலங்களில் தினசரி பாதிப்பு அதிகரித்து வருவதாகவும் தெரிவித்துள்ளது.
மேற்குவங்கம், ஒடிசா, பஞ்சாப், அசாம் உள்ளிட்ட மாநிலங்களுடன் ஜம்மு காஷ்மீர், கோவா, ஹிமாச்சல் பிரதேசம் ஆகிய மாநிலங்களிலும் தொற்று எண்ணிக்கை அதிகரித்து வருகிறது என்றும் மணிப்பூர், மேகாலயா, திரிபுரா, நாகலாந்து, அருணாச்சல பிரதேச மாநிலங்களிலும் தினசரி பாதிப்பு அதிகரித்து வருவதாகவும் சுகாதாரத்துறை அமைச்சகம் எச்சரித்துள்ளது.
13 மாநிலங்களில் 1 லட்சத்துக்கும் அதிகமான பாதிப்பும், 6 மாநிலங்களில் 50 ஆயிரம் முதல் 1 லட்சம் வரையிலான பாதிப்பும் தினசரி பதிவாவதாக தெரிவித்துள்ள சுகாதாரத்துறை, 17 மாநிலங்களில் நாளொன்றுக்கு 50 ஆயிரம் வரை தொற்று பதிவாவதாக தெரிவித்துள்ளது.
