தமிழகத்தில் மதுராந்தகம் மற்றும் தாராபுரம் ஆகிய தொகுதிகளில் வருகின்ற அக். 6-ஆம் தேதி இடைத்தேர்தல் நடைபெற உள்ளது. இந்தத் தேர்தலில் தவெக, திமுக, அதிமுக, இடதுசாரிகள் மற்றும் நாம் தமிழர் என 5 முனைப் போட்டி நிலவுகிறது. அந்தந்தக் கட்சித் தலைவர்கள் தங்களது வேட்பாளர்களை ஆதரித்து தீவிரப் பிரச்சாரத்தில் ஈடுபட்டுள்ளனர். அந்த வகையில், முதலமைச்சர் விஜயும் தவெக வேட்பாளர்களை ஆதரித்து தீவிர வாக்கு சேகரிப்பில் ஈடுபட்டுவருகிறார்.
தாராபுரம் தொகுதியில் மதச்சார்பற்ற சமூகநீதி வெற்றிக்கூட்டணி வேட்பாளர் மரகதம் குமரவேலை ஆதரித்து செப். 25-ஆம் தேதி முதலமைச்சர் விஜய் பரப்புரையில் ஈடுபட்டார். இதனைத் தொடர்ந்து, நேற்று கூட்டணிக் கட்சித் தலைவர்களான திருமாவளவன், வைகோ, மாணிக்கம் தாகூர் உள்ளிட்டோர் தவெக வேட்பாளரை ஆதரித்து வாக்கு சேகரிப்பில் ஈடுபட்டனர்.
இந்த நிலையில், இன்று முதலமைச்சர் விஜய் தவெக வேட்பாளர் மரகதம் குமரவேலை ஆதரித்து மதுராந்தகம் தொகுதியில் ரோடு ஷோ மேற்கொண்டு வாக்கு சேகரித்தார். அவர் தொகுதி முழுவதும் கிட்டத்தட்ட 40 இடங்களுக்குச் சென்று வாக்கு சேகரித்தார். ரோடு ஷோ சென்ற முதலமைச்சர் விஜய்க்கு தவெக தொண்டர்கள் மற்றும் பொதுமக்கள் சாலையின் இருபுறமும் திரண்டு மலர்கள் தூவியும் பரிசுகள் வழங்கியும்உற்சாக வரவேற்பு அளித்தனர்.
இந்த ரோடு ஷோவின்போது எல். எண்டத்தூர் பகுதியில் முதலமைச்சர் விஜய் டீ கடை பெஞ்சில் அமர்ந்து முதியவருடன் டீ குடித்து வாக்கு சேகரித்தார்.
இதனைத்தொடர்ந்து வயலில் இறங்கிச்சென்று மேய்ச்சலில் ஈடுபட்ட இருந்த பெண்களிடம் வாக்கு சேகரித்தார். மேலும் ராமாபுரம் பகுதியில் விவசாயிகளை சந்தித்து வாக்கு சேகரித்து முதல்வர் விவசாயிகளின் டிராக்டரை ஓட்டினார்.
செம்பூண்டி பகுதியில் மாற்றுத்திறனாளிகளை சந்தித்து வாக்கு சேகரித்த முதலமைச்சர் விஜய் தொடர்ந்து மேல்மருவத்தூர் ஆதிபராசக்தி சித்தர் பீடத்துக்குச் சென்று தரிசனம் செய்தார். இரவாகியும் தொடர்ந்து 4 மணி நேரம் ரோடு ஷோ மேற்கொண்டு வாக்கு சேகரித்தார்.
