இந்திய விமானப் பாதுகாப்பை ஆய்வு செய்யும் அமெரிக்கக் குழு!

இந்தியாவின் விமானப் போக்குவரத்துத் துறையில் பாதுகாப்பு விதிமுறைகள் எவ்வாறு நடைமுறைப்படுத்தப்படுகின்றன என்பதை ஆய்வு செய்வதற்காக அமெரிக்காவின் பெடரல் ஏவியேஷன் அட்மினிஸ்ட்ரேஷன் (FAA) குழு இந்தியா வரவுள்ளது.நவம்பர் 16 முதல் 20-ஆம் தேதி வரை இந்தியாவில் தங்கியிருக்கும் இந்தக் குழு, இந்திய விமானப் போக்குவரத்து இயக்குநரகத்தின் (Directorate General of Civil Aviation – DGCA) செயல்பாடுகளை ஆய்வு செய்ய உள்ளது. சர்வதேச விமானப் பாதுகாப்புத் தரங்களுக்கு ஏற்ப விமானப் போக்குவரத்தை ஒழுங்குபடுத்துவதற்குத் தேவையான சட்டக் கட்டமைப்பு, பயிற்சி பெற்ற பணியாளர்கள் மற்றும் நிறுவன ரீதியிலான செயல்திறன் ஆகியவை இந்தியாவிடம் உள்ளனவா என்பது குறித்து மதிப்பீடு செய்யப்படும்.

இந்த ஆய்வுக்காக அமெரிக்கக் குழு எழுப்பியுள்ள சுமார் 200 கேள்விகளுக்குப் பதிலளிக்க DGCA தயாராகி வருவதாகத் தகவல்கள் தெரிவிக்கின்றன. FAA-வின் சர்வதேச விமானப் பாதுகாப்பு மதிப்பீட்டுத் திட்டத்தின் (International Aviation Safety Assessment – IASA) கீழ் இந்தியா பெற்றுள்ள Category 1 அந்தஸ்தைத் தக்கவைத்துக் கொள்வதே இந்த ஆய்வின் முக்கிய நோக்கங்களில் ஒன்றாகும். கடந்த 2014-ஆம் ஆண்டு இந்த அந்தஸ்தை இழந்த இந்தியா, 2015-ஆம் ஆண்டு மீண்டும் பெற்றது.

அமெரிக்கக் குழு எதையெல்லாம் ஆய்வு செய்யும்?

சர்வதேச விமானப் போக்குவரத்துக்கான ஐக்கிய நாடுகள் சபையின் சிறப்பு அமைப்பான சர்வதேச சிவில் விமானப் போக்குவரத்து அமைப்பு (ICAO) வகுத்துள்ள பாதுகாப்புத் தரங்களை இந்தியா முறையாகப் பின்பற்றுகிறதா என்பதை FAA மதிப்பீடு செய்யும். இதற்காக விமானப் பாதுகாப்பு மேற்பார்வை தொடர்பான 8 முக்கிய அம்சங்கள் ஆய்வு செய்யப்படும்.

அவை:

• விமானப் போக்குவரத்துக்கான அடிப்படைச் சட்டங்கள்.
• சிவில் விமானப் போக்குவரத்தை நிர்வகிக்கும் விதிமுறைகள்.
• விமானப் போக்குவரத்து ஒழுங்குமுறை அமைப்பின் கட்டமைப்பு.
• பாதுகாப்பு ஆய்வுப் பணிகளில் ஈடுபடும் அதிகாரிகளின் தொழில்நுட்பத் தகுதி.
• ஆய்வாளர்களுக்குத் தேவையான தொழில்நுட்ப வழிகாட்டுதல்கள், கையேடுகள் மற்றும் பயிற்சிகள்.
• விமானப் பணியாளர்களுக்கு உரிமம் வழங்கும் நடைமுறைகள்.
• விமானங்களுக்குச் சான்றிதழ் வழங்குதல் மற்றும் விமான நிறுவனங்களைக் கண்காணித்தல்.
• பாதுகாப்பு விதிமீறல்களைக் கண்டறிந்து, அவற்றைச் சரிசெய்வதற்கான நடவடிக்கைகளை மேற்கொள்ளும் திறன்.

இந்த ஆய்வு குறிப்பிட்ட விமானங்கள் அல்லது விமான நிறுவனங்களை மட்டும் சார்ந்ததல்ல. ஒட்டுமொத்த விமானப் போக்குவரத்துத் துறையையும் பாதுகாப்பு விதிகளுக்கு உட்பட்டு இயக்குவதற்கான ஒழுங்குமுறை அமைப்பின் செயல்திறனை மதிப்பிடுவதே இதன் நோக்கமாகும்.

இந்தியாவுக்கு Category 1 அந்தஸ்து ஏன் முக்கியம்?

FAA வழங்கும் IASA திட்டத்தின் கீழ் Category 1 அந்தஸ்து பெறுவது என்பது, ஒரு நாட்டின் விமானப் போக்குவரத்து ஒழுங்குமுறை அமைப்பு ICAO-வின் பாதுகாப்பு மேற்பார்வைத் தரங்களுக்கு இணங்கச் செயல்படுகிறது என்பதைக் குறிக்கிறது. இந்த அந்தஸ்து இருப்பதால், இந்திய விமான நிறுவனங்கள் அமெரிக்காவுக்கான விமானச் சேவைகளைத் தங்களது சொந்த விமானங்கள் மூலம் விரிவுபடுத்தவும், அமெரிக்க விமான நிறுவனங்களுடன் கோட்ஷேர் (Codeshare) ஒப்பந்தங்களில் ஈடுபடவும் வாய்ப்பு கிடைக்கிறது. இதற்குப் பிற தொடர்புடைய விதிமுறைகளும் பொருந்தும்.

ஒருவேளை Category 1 அந்தஸ்து குறைக்கப்பட்டு Category 2 நிலைக்குத் தள்ளப்பட்டால், இந்திய விமான நிறுவனங்கள் அமெரிக்காவுக்கான புதிய சேவைகளை விரிவுபடுத்துவதில் கட்டுப்பாடுகளை எதிர்கொள்ள நேரிடும். ஏற்கெனவே இயக்கப்படும் விமானச் சேவைகளும் கூடுதல் கண்காணிப்புக்கு உட்படுத்தப்படலாம். இந்தியாவில் பயணிகள் எண்ணிக்கை, விமானங்களின் எண்ணிக்கை மற்றும் சர்வதேச விமானப் போக்குவரத்து தொடர்ந்து அதிகரித்து வரும் நிலையில், சர்வதேச அளவில் அங்கீகரிக்கப்பட்ட பாதுகாப்புத் தரங்களைப் பராமரிப்பது மிகவும் அவசியமாகக் கருதப்படுகிறது.

2014-ல் Category 2 அந்தஸ்துக்குக் குறைக்கப்பட்ட இந்தியா!

இதற்கு முன்பும் இந்தியா இதுபோன்ற FAA ஆய்வில் சவால்களை எதிர்கொண்டுள்ளது. கடந்த 2014-ஆம் ஆண்டு ஜனவரி மாதம், இந்திய விமானப் போக்குவரத்து இயக்குநரகத்தின் பாதுகாப்பு மேற்பார்வையில் குறைபாடுகள் இருப்பதாகக் கூறி, இந்தியாவின் அந்தஸ்தை Category 1-ல் இருந்து Category 2-ஆக FAA குறைத்தது. அப்போது போதுமான எண்ணிக்கையில் தகுதிபெற்ற விமானச் செயல்பாட்டு ஆய்வாளர்கள் இல்லாதது, தொழில்நுட்பப் பயிற்சியில் குறைபாடுகள் மற்றும் விமானப் பாதுகாப்பு ஆய்வு நடைமுறைகளில் இருந்த போதாமைகள் உள்ளிட்டவை முக்கியக் காரணங்களாகச் சுட்டிக்காட்டப்பட்டன.

இதனால் இந்திய விமான நிறுவனங்கள் ஏற்கெனவே இயக்கி வந்த அமெரிக்க விமானச் சேவைகளைத் தொடர அனுமதிக்கப்பட்டாலும், அவற்றை விரிவுபடுத்தவோ அல்லது மாற்றங்களைச் செய்யவோ முடியாத நிலை ஏற்பட்டது. இதையடுத்து, DGCA-வின் தொழில்நுட்பப் பணியாளர்களின் எண்ணிக்கையை அதிகரித்தல் உள்ளிட்ட பல்வேறு சீர்திருத்த நடவடிக்கைகளை இந்தியா மேற்கொண்டது. தொடர்ந்து நடத்தப்பட்ட மறுமதிப்பீட்டுக்குப் பிறகு, 2015-ஆம் ஆண்டு ஏப்ரல் மாதம் இந்தியாவுக்கு மீண்டும் Category 1 அந்தஸ்தை FAA வழங்கியது. அதன்பிறகு நடைபெற்ற மதிப்பீடுகளிலும் இந்தியா இந்த அந்தஸ்தைத் தக்கவைத்துள்ளது.

ஆய்வுக்கு முன்பாக இந்தியா மேற்கொண்டுள்ள முன்னேற்பாடுகள்!

அமெரிக்கக் குழுவின் வருகையை முன்னிட்டு இந்திய விமானப் போக்குவரத்து இயக்குநரகம் பல்வேறு முன்னேற்பாடுகளை மேற்கொண்டு வருகிறது. இதன் ஒரு பகுதியாக, ஏர் இந்தியா, இண்டிகோ, ஆகாசா ஏர் மற்றும் ஸ்பைஸ்ஜெட் உள்ளிட்ட இந்திய விமான நிறுவனங்களில் பலகட்ட பாதுகாப்பு ஆய்வுகளை DGCA நடத்தியுள்ளதாகத் தகவல்கள் தெரிவிக்கின்றன. மேலும், அமெரிக்கக் குழுவின் ஆய்வுக்கு முன்னதாக இறுதிக்கட்ட ஆய்வுகளும் மேற்கொள்ளப்பட்டு, கண்டறியப்பட்ட குறைபாடுகளைச் சரிசெய்வதற்கான நடவடிக்கைகள் எடுக்கப்பட்டு வருவதாகக் கூறப்படுகிறது.

விமானப் பாதுகாப்பு தொடர்பான கையேடுகள், விதிமுறைகள் மற்றும் தொழில்நுட்ப நடைமுறைகள் அனைத்தும் ICAO தரங்களுக்கு ஏற்ப உள்ளனவா என்பதும் மறுஆய்வு செய்யப்படுகிறது. குறிப்பாக, போதுமான தொழில்நுட்பப் பணியாளர்கள், ஆய்வுத் திறன் மற்றும் பாதுகாப்புக் குறைபாடுகளைக் கண்டறிந்து அவற்றைச் சரிசெய்வதற்கான நடவடிக்கைகள் ஆகியவற்றை இந்தியா நிரூபிக்க வேண்டியிருக்கும்.

Category 2-ஆகக் குறைக்கப்பட்டால் என்ன பாதிப்பு?

இந்தியாவின் Category 1 அந்தஸ்து குறைக்கப்பட்டு Category 2-ஆக மாற்றப்பட்டால், இந்திய விமானப் போக்குவரத்துத் துறையின் சர்வதேச விரிவாக்கத் திட்டங்களுக்குப் பின்னடைவு ஏற்படலாம். குறிப்பாக, அமெரிக்காவுக்கான விமானச் சேவைகளை விரிவுபடுத்துவதில் இந்திய விமான நிறுவனங்களுக்குக் கட்டுப்பாடுகள் விதிக்கப்படலாம். ஏற்கெனவே செயல்பட்டு வரும் விமானச் சேவைகளும் கூடுதல் கண்காணிப்புக்கு உட்படுத்தப்பட வாய்ப்புள்ளது. அமெரிக்க விமான நிறுவனங்களுடனான கோட்ஷேர் ஒப்பந்தங்களிலும் பாதிப்புகள் ஏற்படக்கூடும். மேலும், இந்தியாவின் விமானப் பாதுகாப்பு ஒழுங்குமுறை அமைப்பு மீதான சர்வதேச நம்பிக்கையும் பாதிக்கப்படலாம். இருப்பினும், Category 2 அந்தஸ்து என்பது இந்தியாவில் செயல்படும் அனைத்து விமான நிறுவனங்களும் பாதுகாப்பற்றவை என்று அறிவிப்பதற்குச் சமமானது அல்ல.

ஏனெனில், FAA-வின் IASA மதிப்பீடு என்பது தனிப்பட்ட விமான நிறுவனங்களின் பாதுகாப்புத் தரத்தை மதிப்பிடுவது அல்ல. மாறாக, ஒரு நாட்டின் விமானப் போக்குவரத்து ஒழுங்குமுறை அமைப்பு பாதுகாப்பு அபாயங்களைக் கண்டறிந்து, விமான நிறுவனங்களைக் கண்காணித்து, குறைபாடுகளைச் சரிசெய்யும் அளவுக்குத் திறனுடன் செயல்படுகிறதா என்பதையே மதிப்பிடுகிறது. எனவே, நாளை இந்தியா வரும் அமெரிக்கக் குழுவின் இந்த ஆய்வு, இந்தியாவின் விமானப் போக்குவரத்துத் துறையின் எதிர்கால வளர்ச்சி மற்றும் சர்வதேச நம்பகத்தன்மை ஆகியவற்றில் முக்கியத்துவம் வாய்ந்ததாகப் பார்க்கப்படுகிறது.