பெண்களுக்கான தேசியக் கொள்கை வரைவு ஏற்றுக் கொள்ளப்பட்டதா என்று எம்.பி. வில்சன் எழுப்பிய கேள்விக்கு ஒன்றிய அமைச்சர் ஸ்மிருதி ராணி பதில் அளித்துள்ளார்.
2019ஆம் ஆண்டு தாக்கல் செய்யப்பட்ட பெண்களுக்கான தேசியக் கொள்கை வரைவு ஏற்றுக் கொள்ளப்பட்டதா?. கொள்கை வரைவானது பாதிக்கப்பட்டவர்களுக்கு ஆதரவை வழங்குவதில் குறைபாட்டுடன் இருக்கிறதா?. அங்கன்வாடி பணியாளர்களுக்கு வழங்கப்படும் மதிப்பூதியத்தை அமைச்சகம் உயர்த்துகிறதா? என்று எம்.பி. வில்சன் நாடாளுமன்றத்தில் கேள்வி எழுப்பியிருந்தார். இந்த கேள்விகளுக்கு ஒன்றிய அமைச்சர் ஸ்மிருதி ராணி பதில் அளித்துள்ளார்.
அவர் அளித்துள்ள பதிலில், பெண்களின் சமூக, கல்வி, பொருளாதார மற்றும் அரசியல் அதிகாரமளிக்கும் வகையில், அவர்களின் பிரச்சினைகளை நிவர்த்தி செய்ய பல்வேறு திட்டங்கள் மற்றும் சட்டங்கள் மூலம் அரசாங்கம் பல்வேறு நடவடிக்கைகளை எடுத்து வருகிறது. அந்த வகையில் பெண்களின் பாதுகாப்பு, பாதுகாப்பு மற்றும் அதிகாரமளித்தல் ஆகியவற்றிற்கான குடைத் திட்டத்தை ‘மிஷன் சக்தி’ எனும் ஒருங்கிணைந்த பெண்கள் அதிகாரமளிக்கும் திட்டமாக அரசு செயல்படுத்தியுள்ளது.
2001 ஆம் ஆண்டிலிருந்து பெண்களுக்கான தேசியக் கொள்கை ஏற்கனவே நடைமுறையில் உள்ளது. பெண்கள் மற்றும் குழந்தைகள் மேம்பாட்டு அமைச்சகம் 2016 ஆம் ஆண்டுக்கான பெண்களுக்கான தேசியக் கொள்கை வரைவைத் தயாரித்திருந்தது, பெண்களுக்கு அதிகாரம் என்பது பிரச்னையாகவே இருப்பதால் அதை இறுதி செய்ய முடியவில்லை. பெண்கள் தொடர்பான சட்டக் கொள்கைகள், திட்டங்களை விரிவாக மதிப்பாய்வு செய்ய வேண்டி உள்ளது. இருப்பினும், பெண்களுக்கு அதிகாரம் அளிப்பதில் அரசாங்கத்தின் முன்னுரிமைகள் மீது எந்தவிதமான தாக்கமும் இல்லை. கொள்கைகள் மற்றும் திட்டங்களை அவ்வப்போது திருத்துவதற்கு அரசாங்கம் தகுந்த நடவடிக்கை எடுக்கிறது.
மேலும், அங்கன்வாடி பணியாளர்கள் மற்றும் அங்கன்வாடி உதவியாளர்கள், கெளரவப் பணியாளர்கள் ஆகியோருக்கு மாதாமாதம் அரசு முடிவின்படி அவ்வப்போது மதிப்பூதியம் வழங்கப்படுகிறது. கடைசியாக 01.10.2018 அன்று அங்கன்வாடி பணியாளர்களுக்கு ரூ. 3,000 முதல் ரூ. 4,500 வரையும், அங்கன்வாடி ஊழியர்களுக்கு ரூ. 2,250 முதல் ரூ. 3,500 வரையும், அங்கன்வாடி உதவியாளர்களுக்கு ரூ. 1,500 முதல் ரூ. 2,250 வரையும் மதிப்பூதியம் மேம்படுத்தப்பட்டது. அங்கன்வாடி உதவியாளர்களுக்கு மாதம் ரூ. 250 மற்றும் அங்கன்வாடி பணியாளர்களுக்கு ரூ. 500 ஊக்கத்தொகையாக வழங்கப்படுகிறது எனத் தெரிவிக்கப்பட்டுள்ளது.
-ம.பவித்ரா
