ஈரான் மீது அமெரிக்கா மற்றும் இஸ்ரேல் ராணுவம் கடந்த 28-ந்தேதி கூட்டு ராணுவ தாக்குதலை நடத்தியது. இந்த தாக்குதலில் ஈரான் நாட்டின் உச்சபட்ச தலைவர் அயத்துல்லா அலி காமேனி கொல்லப்பட்டார்.
இதனை தொடர்ந்து அமெரிக்கா, இஸ்ரேல் மற்றும் வளைகுடா பிராந்தியத்தில் உள்ள அதன் நட்பு நாடுகள் மீது ஈரான் போர் அறிவித்து தாக்குதல் நடத்தி வருகிறது. மேலும் ஹார்முஸ் நீரிணையும் மூடப்பட்டது.
இந்த நிலையில் இன்று செய்தியாளர்களை சந்தித்த இங்கிலாந்துப் பிரதமர் கீர் ஸ்டார்மர் கூறியதாவது,
“மத்திய கிழக்கில் நிலவும் மோதல் தற்போது இரண்டாவது மாதத்தில் அடியெடுத்து வைத்துள்ளது. பதற்றத்தைத் தணிக்கவும் அமைதியை நிலைநாட்டவும் நாங்கள் துரித கதியில் பணியாற்றி வந்தாலும், இந்தப் போரின் தாக்கம் நமது நாட்டின் எதிர்காலத்தைப் பாதிக்கும் என்பது இப்போது தெளிவாகியுள்ளது.
எனவே, இந்தப் புயல் எவ்வளவுதான் சீற்றத்துடன் வீசினாலும், அதைத் தாங்கி நிற்கும் நிலையில் நாம் உறுதியாக உள்ளோம் என்று பிரிட்டிஷ் மக்களுக்கு இன்று நான் உறுதியளிக்க விரும்புகிறேன்.
இந்த சூழலிலிருந்து மீண்டு, இன்னும் வலிமையான, இன்னும் பாதுகாப்பான ஒரு தேசமாக உருவெடுப்பதற்கான ஒரு நீண்டகாலத் திட்டம் எங்களிடம் உள்ளது. முதலாவதாக, இதை நான் மீண்டும் ஒருமுறை தெளிவுபடுத்த விரும்புகிறேன். இது நமது போர் அல்ல. இந்த மோதலுக்குள் நாம் இழுத்துச் செல்லப்பட மாட்டோம். அது நமது தேசிய நலனுக்கு உகந்ததல்ல.
மேலும், இங்கிலாந்தில் நிலவும் வாழ்க்கைச் செலவுச் சுமையைச் சமாளிக்க நாம் வழங்கக்கூடிய மிகவும் பயனுள்ள ஆதரவு என்னவென்றால், மத்திய கிழக்கில் பதற்றத்தைத் தணிக்கவும், எரிசக்திப் போக்குவரத்திற்கு மிக முக்கியத்துவம் வாய்ந்த பாதையாகத் திகழும் ‘ஹோர்முஸ் நீரிணையை’ மீண்டும் திறக்கவும் நாம் அழுத்தம் கொடுப்பதே ஆகும்”
இவ்வாறு அவர் தெரிவித்துள்ளார்.
