‘நியூஸ் கிளிக்’ இணையதள நிறுவனர் பிரபீர் புரகாயஸ்தாவின் கைது நடவடிக்கை சட்டவிரோதமானது என அறிவித்து கைது நடவடிக்கையை ரத்து செய்து விடுதலை செய்ய உச்சநீதிமன்றம் உத்தரவிட்டுள்ளது.
கடந்த ஆண்டு மத்திய அமைச்சர் அனுராக் தாக்கூர், “2 ஆண்டுகளுக்கு முன்னர் இந்தியாவுக்கு எதிரான பிரசாரத்தை நியூஸ் கிளிக் நிறுவனம் தொடங்கியது. வெளிநாட்டில் இருந்து ஆதரவைப் பெற்று இந்த பிரசாரத்தை தொடங்கி இருக்கிறது. அமெரிக்காவை சேர்ந்த நெவில்ராய் சிங்காம், நியூஸ் க்ளிக் இணையதளத்துக்கு நிதி உதவி செய்கிறது” என பகிரங்கமாக குற்றம்சாட்டினார்.
தொடர்ந்து, நியூஸ் கிளிக் செய்தி இணைய தள நிறுவனமானது வெளிநாட்டில் இருந்து சட்டவிரோதமாக பணம் பெற்றதாக கூறி வழக்கு தொடரப்பட்டது. இந்த வழக்கில், சீனாவுக்கு ஆதரவாக செய்திகளை வெளியிடவே வெளிநாடுகளில் இருந்து இந்தப் பணம் பெறப்பட்டதாக குறிப்பிடப்பட்டது. எனவே, சட்டவிரோத பணப் பரிமாற்றம் தொடர்பாக அமலாக்கத்துறை வழக்கு பதிவு செய்தது. மேலும் டெல்லியில் 30க்கும் மேற்பட்ட இடங்களில் சோதனை நடத்தப்பட்டது.
இந்த சோதனைகளின் போது மார்க்சிஸ்ட் கம்யூனிஸ்ட் கட்சியின் பொதுச் செயலாளர் சீதாராம் யெச்சூரி வீட்டில் தங்கி இருந்த செய்தியாளர் ஒருவரும் விசாரணைக்கு உட்படுத்தப்பட்டார். அவரிடம் இருந்த செல்போன், லேப்டாப் ஆகியவையும் பறிமுதல் செய்யபட்டன. அத்துடன் நியூஸ் க்ளிக் செய்தி இணையதளத்தின் நிறுவனர் பிர்பீர் புர்காயஸ்தா மற்றும் அந்நிறுவனத்தை சேர்ந்த அமித் சக்கரவர்த்தி ஆகியோர் கடந்த அக்டோபர் மாதம் கைது செய்யப்பட்டனர். இவர்கள் மீது தேசத்துரோக வழக்கான “ஊபா” (UAPA)-ன் கீழ் வழக்குகள் பதிவு செய்யப்பட்டன.
இந்த சோதனை மற்றும் கைது நடவடிக்கைகள் பெரும் சர்ச்சையாக வெடித்தன. இந்த நடவடிக்கைக்கு “இந்தியா” கூட்டணி தலைவர்கள் கடும் கண்டனம் தெரிவித்திருந்தனர்.
இதனிடையே தமது கைது நடவடிக்கைக்கு எதிராக பிர்பீர் புர்காயஸ்தா உச்சநீதிமன்றத்தில் வழக்குத் தொடர்ந்தார். இந்த வழக்கை விசாரித்த உச்சநீதிமன்றம், பிர்பீர் புர்காயஸ்தாவை கைது செய்தது சட்டவிரோதம் என்றும் அவரை உடனே விடுதலை செய்ய அதிரடியாக உத்தரவிட்டது.
