ஸ்டாப் செலக்சன் தேர்வுக்கு விண்ணப்பிக்கும் இணையதளத்தில் ஏற்பட்டுள்ள தொழில்நுட்ப பிரச்னை தொடர்பாக அதன் இயக்குநருக்கு சு.வெங்கடேசன் எம்.பி. கடிதம் எழுதியுள்ளார்.
மல்டி டாஸ்கிங் (நான் டெக்னிக்கல்) ஸ்டாப் மற்றும் ஹவில்தார் (சி.பி.ஐ.சி & சி.பி என்) பதவிகளுக்கான ஸ்டாப் செலக்சன் கமிசன் தேர்வுகளுக்கான ஆன்லைன் விண்ணப்பங்கள் பெறப்பட்டு வருகின்றன. ஆனால் இந்த இணையதளத்தில் ஏற்பட்டுள்ள தொழில்நுட்ப கோளாறு காரணமாக பலர் நேற்று விண்ணப்பிக்க முடியாத நிலை ஏற்பட்டுள்ளது.
இதையும் படிக்கவும்: பிலிப்பைன்ஸில் பயங்கர நிலநடுக்கம்: ரிக்டர் அளவுகோலில் 6.1ஆக பதிவு
இதுகுறித்து மதுரை எம்பி சு.வெங்கடேசன் ஸ்டாப் செலக்சன் கமிஷன் இயக்குநருக்கு கடிதம் எழுதியுள்ளார். அந்த கடிதத்தில், மல்டி டாஸ்கிங் (நான் டெக்னிக்கல்) ஸ்டாப் மற்றும் ஹவில்தார் (சி. பி.ஐ.சி & சி.பி என்) பதவிகளுக்கான ஸ்டாப் செலக்சன் கமிசன் தேர்வுகளுக்கான ஆன்லைன் விண்ணப்பங்கள் பெறப்பட்டு வருகின்றன.
இந்த தேர்விற்கான விண்ணப்பிப்பதற்கான கடைசித் தேதி 17.02.2023 ஆகும். ஆனால் நேற்று (15.02.2023) அதற்கான இணைய தளம் தொழிநுட்ப பிரச்சினை காரணமாக இயங்கவில்லை. இந்த தொழில்நுட்ப பிரச்சினை இன்று சரியாகுமா என தெரியவில்லை. பல விண்ணப்பதாரர்கள் என்னைத் தொடர்பு கொண்டு இதில் தலையிட்டு தீர்வுக்கு உதவுமாறு கேட்டுக் கொண்டார்கள். ஸ்டாப் செலக்சன் கமிஷனுக்கும் இத்தகைய புகார்கள் நேரடியாக சென்றிருக்கும்.
எனவே உடனே இணையதளத்தை சரி செய்து ஆன் லைன் விண்ணப்பங்களை பதிவு செய்ய ஏற்பாடுகளை செய்ய வேண்டும். கடைசி தேதி நெருங்கும் வேளையில் இப்படி தொழில்நுட்ப பிரச்சினைகள் குறுக்கிட்டு இருப்பதால் நேர இழப்பை ஈடு கட்டும் வகையில் விண்ணப்ப கடைசி தேதியை நீட்டிக்க வேண்டும். இதற்கு தீர்வு விரைவில் காணப்படுமென்று நம்புகிறேன் என்று கடிதத்தில் தெரிவித்துள்ளார்.
