நடிகர் விஜய் மற்றும் வெங்கட் பிரபு கூட்டணியில் கடைசியாக வெளியான கோட் திரைப்படம் ரூ.450 கோடிக்கு மேல் வசூல் செய்தது. இதனை தொடர்ந்து விஜய், ஹெச் வினோத் இயக்கத்தில் ஜனநாயகன் படத்தில் நடித்துள்ளார். அரசியல் கட்சி ஆரம்பித்திருக்கும் விஜயின் கடைசி படம் என்பதால் இப்படத்திற்கு எக்கச்சக்க எதிர்பார்ப்பு உள்ளது.
இப்படத்தில் விஜயுடன் பூஜா ஹெக்டே, பிரேமலூ புகழ் மமிதா பைஜூ, பாபி தியோல், கெளதம் மேனன், பிரியாமணி, நரேன் ஆகியோர் முக்கிய கதாபாத்திரத்தில் நடித்துள்ளனர். இப்படத்திற்கு அனிருத் இசையமைத்துள்ளார். இப்படம் பொங்கல் பண்டிகையை முன்னிட்டு வரும் ஜனவரி 9 அன்று வெளியாகும் என்று அறிவிக்கப்பட்டுள்ளது. மேலும் ‘ஜனநாயகன்’ படத்தின் இசை வெளியீட்டு விழா மலேசியாவின் கோலாலம்பூரில் வரும் டிசம்பர் 27ம் தேதி நடைபெறவுள்ளது.
சமீபத்தில் வெளியான ஜனநாயகன் படத்தின், தளபதி கச்சேரி பாடல் ரசிகர்கள் மத்தியில் நல்ல வரவேற்பை பெற்றது. இதனை தொடர்ந்து இப்படத்தின் இரண்டாவது பாடலுக்கான அப்டேட்டை படக்குழு வெளியிட்டுள்ளது. அதன் படி ஜனநாயகன் திரைப்படத்தின் இரண்டாவது பாடல் வரும் டிசம்பர் 18 தேதி வெளியாகும் என்று அறிவிக்கப்பட்டுள்ளது.
