டெல்லியின் ஜந்தர் மந்தர் பகுதியில் இனி போராட்டங்களுக்குத் தடை – டெல்லி காவல்துறை!

மத்திய உள்துறை அமைச்சகம் அமைத்த குழுவின் பரிந்துரைகளின் அடிப்படையில், போராட்டங்கள் மற்றும் ஆர்ப்பாட்டங்களை நடத்துவதற்கான இடமாக இருந்த ஜந்தர் மந்தர் அறிவிக்கப்பட்ட பட்டியலில் இருந்து நீக்கப்பட்டுள்ளது.

இதற்குப் பதிலாக, டெல்லியில் ராம்லீலா மைதானம், புராரி மைதானம் மற்றும் கிழக்கு டெல்லியில் உள்ள சிபிடி மைதானம் ஆகிய 3 இடங்கள் போராட்டங்கள் மற்றும் ஆர்ப்பாட்டங்களை நடத்துவதற்கான புதிய இடங்களாக அறிவிக்கப்பட்டுள்ளன.

குடிமக்கள் தங்களது போராட்ட உரிமையைப் பயன்படுத்துவதற்கு ஏற்ற மாற்று இடங்களை ஆய்வு செய்வதற்காக மத்திய உள்துறை அமைச்சகம் ஒரு குழுவை அமைத்திருந்தது. அந்தக் குழுவின் பரிந்துரைகளின் அடிப்படையில் இந்த மாற்றம் மேற்கொள்ளப்பட்டுள்ளது.

புதியதாக அறிவிக்கப்பட்டுள்ள 3 இடங்களிலும் போராட்டங்கள் மற்றும் ஆர்ப்பாட்டங்களை நடத்துவதற்கான விரிவான, திருத்தப்பட்ட நிலையான செயல்பாட்டு நடைமுறைகள் (SOP) தனியாக வெளியிடப்படும் என்று டெல்லி காவல் ஆணையர் அனுராக் குமார் வெளியிட்ட அறிவிப்பில் தெரிவிக்கப்பட்டுள்ளது.

மேலும், இந்த உத்தரவு 2022 ஏப்ரல் 28-ம் தேதி வெளியிடப்பட்ட முந்தைய நிலையான உத்தரவு எண் L&O/48/22-ல் பகுதியளவு திருத்தம் செய்வதாகவும் குறிப்பிடப்பட்டுள்ளது.