ஈரோட்டில்அதிமுக பொதுச்செயலாளர் எடப்பாடி பழனிசாமி செய்தியாளர்களை சந்தித்து பேசினார். அப்போது அவர் கூறியதாவது:-
“தமிழகத்தில் சட்டம்-ஒழுங்கு சீர்குலைவு குறித்து நான் ஏற்கனவே தொலைக்காட்சிகள், பத்திரிகைகள் மற்றும் அறிக்கைகள் வாயிலாகப் பலமுறை சுட்டிக்காட்டியுள்ளேன். சட்டமன்றத்திலும் இது குறித்துப் பேசியுள்ளேன்.
இந்த அரசாங்கம் அமைந்ததிலிருந்து இன்றுவரை கொலை, கொள்ளை, திருட்டு, வழிப்பறி ஆகியவை தொடர்ந்து நடைபெற்றுக் கொண்டிருக்கின்றன. எவ்வளவு முறை தட்டி எழுப்பினாலும், இந்த அரசாங்கம் கும்பகர்ணனைப் போலத் தூங்கிக் கொண்டிருக்கிறது. சட்டம்-ஒழுங்கைப் பாதுகாப்பதற்குத் திராணியற்ற அரசாங்கமாக இது இருப்பதால், மாநிலத்தில் சட்டம்-ஒழுங்கு முற்றிலுமாகச் சீர்குலைந்து, மக்கள் வாழத் தகுதியற்ற சூழல் ஏற்பட்டுள்ளது. முதலமைச்சர் இதில் தனி கவனம் செலுத்தி சட்டம்-ஒழுங்கைப் பாதுகாக்க நடவடிக்கை எடுக்க வேண்டும்” என்று அவர் கூறினார்.
முன்னதாக, நம்பிக்கை இல்லா தீர்மானம் குறித்து எதிர்க்கட்சிகளுக்கு இன்னும் எண்ணம் இல்லை என செங்கோட்டையன் கூறியது குறித்து செய்தியாளர்கள் எழுப்பிய கேள்விக்குப் பதிலளித்த அவர், “பொது வெளியில் பேசக் கூடாது, பொதுவெளியில் எதைப் பேச வேண்டும், எதைப் பேசக் கூடாது என்று இருக்கிறது; உரிய சூழல் வரும்போது அனைத்து ஊடக நண்பர்களையும் அழைத்துத் தெளிவாகப் பதிலளிக்கிறேன்” என்றார்.
