ரசிகர்கள் மத்தியில் மிகவும் எதிர்பார்ப்பை ஏற்படுத்தியுள்ள தனுஷின் நானே வருவேன் படத்தைப் பற்றிய ஒரு சுவாரசிய தகவலைத் தான் தற்போது காண இருக்கிறோம்.
தனுஷ் தற்போது நடித்துவரும் நானே வருவேன் திரைப்படம் ரசிகர்கள் மத்தியில் மிகவும் எதிர்பார்க்கப்படும் படங்களில் ஒன்றாகும். மேலும் அவரது சகோதரரும் திரைப்பட இயக்குநருமான செல்வ ராகவனால் இயக்கத்தில் உருவாகிவருவதால் இப்படத்தின் மீதான எதிர்பார்ப்பு மேலும் அதிகரித்துள்ளது.
பாலிவுட் நடிகை எல்லி அவ்ராமும் தமிழில் அறிமுகமாகிறார். இப்படத்தை வி கிரியேஷன் சார்பில் கலைப்புலி எஸ் தாணு தயாரித்துள்ளார், ஓம் பிரகாஷ் ஒளிப்பதிவு செய்துள்ள இப்படத்திற்கு யுவன் ஷங்கர் ராஜா இசையமைத்துள்ளார். மேலும் செல்வராகவனும் ஒரு முக்கிய வேடத்தில் நடிப்பது குறிப்பிடத்தக்கது.
இதற்கு முன்பு இருவரும் துள்ளுவதோ இளமை, கண்டு கொண்டேன், புதுப்பேட்டை, மயக்கம் என்ன ஆகிய படங்கள் இவர்கள் கூட்டணியில் வெளியாகி ரசிகர்களைக் கவர்ந்த நிலையில் தற்போது நானே வருவேன் படம் என்னவாக இருக்கும் என்ற கேள்வி அனைவரிடமும் எழுந்துள்ளது.
இந்நிலையில் இப்படத்தின் முதல் சிங்கிள் பாடலான ‘வீரா சூரா’ யுவனின் குரலில் வெளியாகி ரசிகர்களிடம் பெரும் வரவேற்பைப் பெற்று வரும் நிலையில், படத்தின் டீசர் வெளியாகி இணையத்தில் வைரலாகி வருகிறது.
சுமார் 2 மணி நேரம் 15 நிமிடங்கள் ஓடக்கூடிய இந்த படத்திற்குத் தனிக்கைக் குழு யு/ஏ சான்றிதழை அளித்துள்ளது. இத்திரைப்படம் மணிரத்னத்தின் பொன்னியின் செல்வன் திரைப்படத்துடன் மோதவுள்ளது. பொன்னியின் செல்வன் திரைப்படம் செப்டம்பர் 30, அன்று திரையரங்குகளில் திரையிடத் திட்டமிடப்பட்டுள்ள நிலையில், நானே வருவேன் திரைப்படம் ஒரு நாள் முன்னதாக அதாவது செப்டம்பர் 29ஆம் தேதி வெளியாகும் என்ற தகவல் கோலிவுட் வட்டாரத்தில் பரவிவருகிறது.
