இந்தியாவின் தூய்மையான நகரமாக நவி மும்பை தேர்வு!

இந்தியாவின் நகர்ப்புற தூய்மை நிலையை மதிப்பிடும் மத்திய அரசின் ஸ்வச் சர்வேக்ஷன் 2025-26 தரவரிசை முடிவுகள் வெளியாகியுள்ளன. இதில் நவி மும்பை நாட்டின் தூய்மையான நகரமாகத் தேர்வு செய்யப்பட்டுள்ளது. கடந்த 8 ஆண்டுகளாகத் தொடர்ந்து முதலிடத்தில் இருந்து வந்த மத்தியப் பிரதேசத்தின் இந்தூர், இந்த முறை வேறு பிரிவில் மதிப்பிடப்பட்டுள்ளது. குடியரசுத் தலைவர் திரௌபதி முர்மு வெற்றி பெற்ற நகரங்களுக்கான விருதுகளை வழங்கினார்.

இந்தூர் 8 ஆண்டு சாதனைக்கு முற்றுப்புள்ளி!

ஸ்வச் சர்வேக்ஷன் தரவரிசையில் கடந்த 8 ஆண்டுகளாகத் தொடர்ந்து முதலிடத்தைப் பிடித்து வந்த இந்தூர், இந்த முறை அந்தப் பிரிவில் இடம்பெறவில்லை. புதிதாக அறிமுகப்படுத்தப்பட்ட ‘ஸ்வச் ஷெஹர் ஜோடி’ (Swachh Shehar Jodi) திட்டத்தின் கீழ், வழிகாட்டும் நகரங்கள் (Mentor City) பிரிவில் இந்தூர் தனது கூட்டாளர் நகரமான தேபால்பூருடன் இணைந்து இரண்டாவது இடத்தைப் பிடித்துள்ளது.

இந்தப் பிரிவில் அகமதாபாத் தனது கூட்டாளர் நகரமான சனந்துடன் இணைந்து முதலிடத்தைப் பிடித்துள்ளது. திருப்பதி தனது கூட்டாளர் நகரமான குப்பத்துடன் இணைந்து மூன்றாவது இடத்தைப் பெற்றுள்ளது. இந்த ஆண்டு நடைபெற்ற தூய்மை ஆய்வில் நாடு முழுவதும் 4,700-க்கும் மேற்பட்ட நகர்ப்புற உள்ளாட்சி அமைப்புகள் பங்கேற்றன.

பல்வேறு பிரிவுகளில் முதலிடம் பிடித்த நகரங்கள்!

10 லட்சத்திற்கும் அதிகமான மக்கள் தொகை கொண்ட நகரங்கள்: கிரேட்டர் விசாகப்பட்டினம் முதலிடம் பிடித்துள்ளது.

3 லட்சம் முதல் 10 லட்சம் வரை மக்கள் தொகை கொண்ட நகரங்கள்: உஜ்ஜைன் முதலிடத்தைப் பெற்றுள்ளது.

நதிக்கரை நகரங்கள்: மத்தியப் பிரதேசத்தின் ரேவா முதலிடத்தையும், பிலாஸ்பூர் இரண்டாவது இடத்தையும், வாரணாசி மூன்றாவது இடத்தையும் பிடித்துள்ளன.

கடலோர நகரங்கள்: ஒடிசாவின் பூரி முதலிடத்தையும், கேரளாவின் ஆலப்புழா இரண்டாவது இடத்தையும், மகாராஷ்டிராவின் ரத்னகிரி மூன்றாவது இடத்தையும் பிடித்துள்ளன.

இமயமலை நகரங்கள்: உத்தராகண்டின் ருத்ரபூர் முதலிடத்தையும், ஜம்மு இரண்டாவது இடத்தையும், ஷோபியான் மூன்றாவது இடத்தையும் பிடித்துள்ளன.

சிறிய நகரங்களிலும் தூய்மை தரவரிசை!

50,000 முதல் 3 லட்சம் வரை மக்கள் தொகை கொண்ட நகரங்கள் பிரிவில் மத்தியப் பிரதேசத்தின் தேவாஸ் முதலிடத்தையும், புதுடெல்லி நகராட்சி கவுன்சில் இரண்டாவது இடத்தையும், மத்தியப் பிரதேசத்தின் சாகர் மூன்றாவது இடத்தையும் பிடித்துள்ளன.

20,000 முதல் 50,000 வரை மக்கள் தொகை கொண்ட நகரங்கள் பிரிவில் மகாராஷ்டிராவின் வீடா முதலிடத்தையும், ஒடிசாவின் அஸ்கா இரண்டாவது இடத்தையும், கோவாவின் பனாஜி மூன்றாவது இடத்தையும் பிடித்துள்ளன.

இந்த ஆண்டின் ஸ்வச் சர்வேக்ஷன் போட்டி, ‘ஸ்வச்‌தா கி நயீ பெஹல் – படாயேன் ஹாத், கரேன் சஃபாய் சாத்’ (தூய்மைக்கான ஒரு புதிய முன்னெடுப்பு – கைகோர்ப்போம், இணைந்து தூய்மைப்படுத்துவோம்) என்ற கருப்பொருளின் அடிப்படையில் நடத்தப்பட்டது.

3,000-க்கும் மேற்பட்ட மதிப்பீட்டாளர்கள் ஆய்வு!

இந்த ஆய்வுக்காக நாடு முழுவதும் 3,000-க்கும் மேற்பட்ட பயிற்சி பெற்ற மதிப்பீட்டாளர்கள் நேரடியாகச் சென்று ஆய்வுகளை மேற்கொண்டனர். நிகழ்நேர GPS கண்காணிப்பு முறையும் இதற்குப் பயன்படுத்தப்பட்டது. ஆதாரங்களைச் சமர்ப்பிப்பது முதல் அவற்றைச் சரிபார்ப்பது வரை முழு மதிப்பீட்டுப் பணிகளும் டிஜிட்டல் முறையில் மேற்கொள்ளப்பட்டதாகவும், வெளிப்படைத்தன்மையுடன் ஒவ்வொரு கட்டத்திலும் தரச் சோதனைகள் நடத்தப்பட்டதாகவும் மத்திய வீட்டுவசதி மற்றும் நகர்ப்புற விவகாரங்கள் அமைச்சகம் தெரிவித்துள்ளது. மேலும், 2024-25 மற்றும் 2025-26 தூய்மை ஆய்வுகளுக்கு இடையில் வழிகாட்டுதல் பெற்ற நகரங்களின் செயல்பாடுகளில் குறிப்பிடத்தக்க முன்னேற்றம் ஏற்பட்டுள்ளதாகவும் அமைச்சகம் குறிப்பிட்டுள்ளது.

வெளிப்படையான தூய்மை: 48 சதவீதத்திலிருந்து 70 சதவீதமாக உயர்வு.

வீடு வீடாகக் குப்பை சேகரிப்பு: 52 சதவீதத்திலிருந்து 74 சதவீதமாக உயர்வு.

குப்பைகளைத் தரம் பிரித்தல்: 16 சதவீதத்திலிருந்து 30 சதவீதமாக உயர்வு.

சுகாதார வசதிகளைப் பெறுதல்: 11 சதவீதத்திலிருந்து 38 சதவீதமாக உயர்வு.

பயன்படுத்தப்பட்ட நீர் மேலாண்மை: 32 சதவீதத்திலிருந்து 53 சதவீதமாக உயர்வு.

தூய்மை குறித்த விழிப்புணர்வு: 48 சதவீதத்திலிருந்து 66 சதவீதமாக உயர்வு.

இவ்வாறு, வழிகாட்டும் நகரங்களின் ஒத்துழைப்புடன் தூய்மை தொடர்பான பல்வேறு அம்சங்களில் முன்னேற்றம் ஏற்பட்டுள்ளதாக மத்திய அரசு தெரிவித்துள்ளது.