பிரதமர் நரேந்திர மோடி வரும் 16ஆம் தேதி இரண்டு நாள் பயணமாக பிலிப்பைன்ஸ் செல்கிறார். அங்கு நடைபெற உள்ள 23-வது ஆசியான் (ASEAN) – இந்தியா உச்சி மாநாடு மற்றும் 21-வது கிழக்காசிய உச்சி மாநாட்டில் அவர் பங்கேற்க உள்ளார்.
இதுகுறித்து டெல்லியில் செய்தியாளர்களிடம் பேசிய வெளியுறவுத்துறை அமைச்சகத்தின் கிழக்காசியப் பிரிவு செயலாளர் ருத்ரேந்திர டாண்டன், பிரதமரின் இந்தப் பயணம் இந்தியா மற்றும் ஆசியான்(ASEAN) நாடுகளுக்கு இடையிலான உறவை மேலும் வலுப்படுத்தும் என்றார்.
மேலும், ஆசியான் அமைப்பின் 11 உறுப்பு நாடுகளுடனும் இந்தியா வலுவான இருதரப்பு உறவுகளைக் கொண்டுள்ளதாகவும், ஆசியான் பிராந்திய அமைப்புடனான உறவு இந்தியாவின் ‘கிழக்கு நோக்கிய செயல்பாட்டுக் கொள்கை’ (Act East Policy)யின் முக்கிய அம்சமாக இருப்பதாகவும் தெரிவித்தார்.
மணிலா செல்லும் பிரதமர் மோடிக்கு பிலிப்பைன்ஸ் அதிபர் விருந்தளிக்க உள்ளார். இதைத் தொடர்ந்து அடுத்த நாள் நடைபெறும் ஆசியான் – இந்தியா உச்சி மாநாடு மற்றும் கிழக்காசிய உச்சி மாநாட்டில் பிரதமர் பங்கேற்க உள்ளார்.
கடந்த ஆறு தசாப்தங்களாக ஆசியான் அமைப்பு ஒரு வலுவான பிராந்திய அமைப்பாக வளர்ந்துள்ளதாகவும், உறுப்பு நாடுகளுக்கு இடையிலான பொருளாதார ஒத்துழைப்பை மேம்படுத்துவதில் முக்கியப் பங்காற்றி வருவதாகவும் டாண்டன் குறிப்பிட்டார்.
மேலும், பிராந்தியத்தில் அமைதி, நிலைத்தன்மை மற்றும் பொருளாதார வளர்ச்சியை மேம்படுத்தும் சக்தியாக ஆசியான் அமைப்பு விளங்கி வருவதாகவும் அவர் தெரிவித்தார்.
இந்தியாவுக்கும் ஆசியான் நாடுகளுக்கும் இடையிலான வர்த்தகம் தற்போது சுமார் 122 பில்லியன் அமெரிக்க டாலராக உள்ளது. ஆசியான் நாடுகளுடனான கூட்டு உறவையும், தனிப்பட்ட நாடுகளுடனான இருதரப்பு உறவையும் வலுப்படுத்துவது இரு தரப்புக்கும் பயனளிக்கும் என இந்தியா நம்புவதாக அவர் கூறினார்.
