எஜமான், தளபதி, மன்னன், படிக்காதவன், வேலைக்காரன் உள்பட பல ரஜினிகாந்த் படங்களுக்கு இசைஞானி இளையராஜா இசை அமைத்துள்ளார். இவர்கள் இருவரும் நீண்ட நண்பர்களாகவும் இருந்து வருகின்றனர்.
இருவரின் கூட்டணியில் வெளியான படங்களில் இடம்பெற்ற பல பாடல்கள் சூப்பர் ஹிட்டாகின. இன்றைய கால இளைஞர்களையும் அந்தப் பாடல்கள் கவரும் வகையில் இருக்கின்றன. இந்நிலையில், சென்னை போயஸ்கார்டன் வீட்டில் நடிகர் ரஜினிகாந்தை, இளையராஜா இன்று காலை சந்தித்தார். இருவரும் நீண்ட நேரம் மனம் விட்டு பேசினர். இளையராஜா விடைபெறும்போது, ‘சாமி ஏதாவது வேலை இருக்குதா’ என்று ரஜினிகாந்த் விசாரிக்க, ‘‘என் பிறந்தநாளை முன்னிட்டு ஜூன் 2ம் தேதி கோவையில் நடக்கும் இசை நிகழ்ச்சிக்காக ரிகர்சல் நடந்துகொண்டிருக்கிறது. அங்கே செல்கிறேன்’ என இளையராஜா கூறியுள்ளார். ‘‘அப்படியா..நானும் அங்கே வருகிறேன்’’ என்று ஆர்வமான ரஜினிகாந்த், தனது காரிலேயே இளையராஜாவை அழைத்துச் சென்றார். ஸ்டூடியோவில் அந்த நிகழ்ச்சி தொடர்பான ரிகர்சல் பணிகளையும், சில பாடல்களையும் ஆர்வமாக ரசித்து கேட்டார் ரஜினிகாந்த்.
இரண்டு மூன்று பாடல்களுக்கு கைதட்டி தனது மகிழ்ச்சியை தெரிவித்த ரஜினிகாந்த், பின்னர், இளையராஜாவிடம் இருந்து விடைபெற்றார். முன்னதாக, இளையராஜாவை ரஜினிகாந்தின் மகள் ஐஸ்வர்யாவும் கடந்த மாதம் சந்தித்தார் என்பது குறிப்பிடத்தக்கது.
