நடிகர் கார்த்தியின் பிறந்த நாளை முன்னிட்டு, ‘ஜோக்கர்’ பட ராஜு முருகன் இயக்கத்தில் உருவாகி வரும் ‘ஜப்பான்’ படம் தீபாவளிக்கு வெளியாகும் என்று படக்குழு அதிகாரப்பூர்வமாக அறிவித்துள்ளது.
தமிழ் சினிமாவில் முன்னணி நடிகர்களில் ஒருவராக வலம் வருபவர் கார்த்தி. முதல் படமான பருத்திவீரனில் ஆரம்பித்து சமீபத்தில் வெளியான பொன்னியின் செல்வன் வரை தனது படங்களில் வெவ்வேறு விதமான கதாபாத்திரங்களை ஏற்று அவரது ரசிகர்களை குதூகலப்படுத்தி வருகிறார். அந்த வகையில் இவர் நடிப்பில் கடந்தாண்டு மூன்று படங்கள் அடுத்தடுத்து வெளியாகி மிகப்பெரிய வெற்றி பெற்றது. இயக்குனர் மணிரத்னம் இயக்கத்தில் வெளியான ‘பொன்னியின் செல்வன்’ படத்தில் விக்ரம், ஜெயம் ரவியுடன் இணைந்து வந்தியத்தேவன் கதாபாத்திரத்தில் நடித்திருந்த கார்த்தியின் நடிப்பு ரசிகர்கள் மத்தியில் வரவேற்பை பெற்றது. அதுமட்டுமின்றி ‘பொன்னியின் செல்வன்’ இரண்டாம் பாகமும் சமீபத்தில் வெளியாகி பாக்ஸ் ஆபிஸில் வசூல் சாதனை படைத்தது.
இதனை தொடர்ந்து தற்போது குக்கூ, ஜோக்கர், ஜிப்ஸி உள்ளிட்ட படங்களை இயக்கி வெற்றிபெற்ற இயக்குனரான ராஜு முருகனின் இயக்கத்தில், ஜப்பான் படத்தில் நடித்து வருகிறார் கார்த்தி. கார்த்தியுடன் அனு இமானுவேல், இயக்குநர் விஜய் மில்டன் மற்றும் தெலுங்கு நடிகர் சுனில் ஆகியோர் முக்கியக் கதாபாத்திரத்தில் நடிக்கின்றனர். கார்த்தி தனது 25வது படமான ஜப்பான் தமிழ், மலையாளம், கன்னடம் மற்றும் தெலுங்கு உள்ளிட்ட நான்கு மொழிகளில் வெளியாக உள்ளது. ஜி.வி.பிரகாஷ் இசையமைக்கும் இப்படத்தினை ட்ரீம் வாரியர்ஸ் பிக்சர்ஸ் நிறுவனம் தயாரித்து வருகிறது. இதன் படப்பிடிப்பு தற்போது விறுவிறுப்பாக நடந்து வருகிறது.
இன்று நடிகர் கார்த்தி தனது 46-வது பிறந்த நாளை கொண்டாடும் நிலையில் , அவரது ரசிகர்களுக்கு விருந்தளிக்கும் விதமாக இப்படத்தின் அப்டேட் வெளியாகியுள்ளது. இது தொடர்பாக ட்ரீம் வாரியர்ஸ் பிக்சர்ஸ் நிறுவனம் தனது ட்விட்டர் பக்கத்தில் வெளியிட்டுள்ள அறிவிப்பில், ‘ஜப்பான்’ படத்தின் இன்றோ வீடியோவை வெளியிட்டு, ரிலீஸ் தேதியையும் அதிகாரப்பூர்வமாக அறிவித்துள்ளது. மேலும் ஆற்றல் மிக்க நடிகரும், பல்துறை கலைஞருமான நடிகர் கார்த்திக்குக்கு பிறந்த நாள் வாழ்த்துகள் எனவும் கூறியுள்ளது.
இந்த இனிய நாளில், எங்களது திரைப்படமான ஜப்பான் இந்த தீபாவளிக்கு ஒளிரச் செய்ய தயாராக உள்ளது என்பதை அறிவிப்பதில் மகிழ்ச்சி அடைவதாக ட்ரீம் வாரியர்ஸ் பிக்சர்ஸ் நிறுவனம் தெரிவித்துள்ளது. தமிழ்நாட்டில் நடைபெற்ற ஒரு உண்மை சம்பவத்தை மையமாக கொண்டு உருவாகி வரும் ‘ஜப்பான்’ படத்திற்காக கார்த்தியின் ரசிகர்கள் ஆர்வமுடன் காத்திருக்கின்றனர்.
- பி.ஜேம்ஸ் லிசா
