‘சம்பல் மசூதி கணக்கெடுப்பு வன்முறை’ என இணையத்தில் வைரலாகிவரும் வீடியோ உண்மையா?

This news Fact Checked by ‘India Today’

உத்தரபிரதேசத்தின் சம்பல் மாவட்டத்தில் மசூதி கணக்கெடுப்புக்கு எதிரான போராட்டங்கள் குறித்த வீடியோ ஒன்று வைரலாகி வருகிறது. இதுகுறித்த உண்மை சரிபார்ப்பை காணலாம்.

நவம்பர் 24 அன்று உத்தரபிரதேசத்தின் சம்பல் மாவட்டத்தில் மசூதி கணக்கெடுப்புக்கு எதிரான போராட்டங்கள் வன்முறையாக மாறியது. இதுவரை குறைந்தது 4 பேர் கொல்லப்பட்டதாகவும், டஜன் கணக்கில் காயமடைந்துள்ளதாகவும் கூறப்படுகிறது.

நவம்பர் 24 அன்று காலை, நீதிமன்றத்தால் நியமிக்கப்பட்ட வக்கீல்கள் குழு ஷாஹி ஜமா மஸ்ஜிதை அணுகி, அந்த இடத்தில் ஒரு கோயிலை இடித்து முகலாயர் கால மசூதி கட்டப்பட்டதாக கூறி மனு ஒன்று அளிக்கப்பட்டது. இதனைத்தொடர்ந்து, ஆய்வுக்காக மசூதி கணக்கெடுப்புக்கு அணுகினர். இதனால், அப்பகுதி முஸ்லிம்கள் போராட்டத்தில் ஈடுபட்டதால், போலீசாருடன் மோதல் ஏற்பட்டது.

போராட்டக்காரர்கள் மீது சம்பல் போலீசார் தடியடி நடத்தியதாகக் கூறப்படும் வீடியோ தற்போது வைரலாகி வருகிறது.

வைரல் கிளிப்பில், ஒரு பெரிய குழு மக்கள் ஒரு பாதையில் காவல்துறையினரால் தாக்கப்படுவதை காணலாம். பலர் ஸ்கல் கேப் அணிந்திருப்பதைக் காணலாம். இந்த வீடியோவை பகிர்ந்த ஒரு ட்விட்டர் (எக்ஸ்) பயனர், “யோகி ஜியின் போலீஸ் மீண்டும் வடிவம் பெற்றது. இந்த அமைதி முட்டாள்களை சமாளிக்க இதுதான் வழி #SambalJamaMasjid.” என பதிவிட்டிருந்தார். பதிவின் காப்பகத்தை இங்கே காணலாம்.

இதுகுறித்த இந்தியா டுடே உண்மைச் சரிபார்ப்பின் போது, வைரலான பதிவு சமீபத்தியது அல்ல என்று கண்டறியப்பட்டது. மேலும், வைரலான பதிவு கோரக்பூரில் இருந்து டிசம்பர் 2019 அன்று CAA எதிர்ப்பு போராட்டக்காரர்கள் மீது போலீசார் தடியடி நடத்தியதைக் காட்டுகிறது எனவும் தெளிவானது.

உண்மை சரிபார்ப்பு:

வைரல் கிளிப்பில் இருந்து கீஃப்ரேம்களின் தலைகீழ் படத் தேடல் செய்ததில், மார்ச் 2020 இல் யூடியூப் சேனலால் வெளியிடப்பட்ட அதே வீடியோ கிடைத்தது. இது சம்பாலில் நடந்த சமீபத்திய மோதல்களில் இருந்து இல்லை என்பதைத் தெளிவுபடுத்தியது.

வீடியோவில், பல கடைகளும் அவற்றின் பெயர்களும் பலகைகளில் எழுதியிருப்பது கவனம் பெற்றது. கூகுள் மேப்ஸில் இந்தப் பெயர்கள் தேடப்பட்டது. அப்போது, வீடியோ உத்தரப் பிரதேசத்தின் கோரக்பூர் மாவட்டத்தைச் சேர்ந்தது எனவும், இது சம்பாலில் இருந்து 650 கிமீ தொலைவில் உள்ளது என கண்டறியப்பட்டது. கூகுள் மேப்பில் காணப்படுவது போல், இந்த பகுதி கோரக்பூரில் உள்ள நகாஸ் சௌக் ஆகும். வைரல் கிளிப்பில் காணப்படும் ஒரு கடையின் ஒப்பீடு மற்றும் Google Maps Street View ஆகியவற்றை கீழே காணலாம்.

இந்தக் குறிப்பைப் பயன்படுத்தி, அதே சம்பவத்தின் வைரல் கிளிப் மற்றும் பிற வீடியோக்கள் அடங்கிய பல செய்தி அறிக்கைகள் கிடைத்தன. லைவ் ஹிந்துஸ்தானில் டிசம்பர் 20, 2019 இன் அறிக்கையின்படி, கோரக்பூரில் உள்ள முஸ்லிம்கள் குடியுரிமை (திருத்தம்) சட்டம் மற்றும் குடிமக்களுக்கான தேசியப் பதிவேடு ஆகியவற்றுக்கு எதிராக போராட்டம் நடத்தினர். அறிக்கையின்படி, கோரக்பூர் உட்பட உத்தரபிரதேசத்தின் பல மாவட்டங்களில் இந்த போராட்டங்கள் வன்முறையாக மாறியது, இதன் விளைவாக போலீசார் மக்கள் மீது தடியடி நடத்தினர்.

அதேபோல், டிசம்பர் 2019 முதல் UPTak இல் ஒரு வீடியோ அறிக்கை வைரல் கிளிப்பின் அதே காட்சிகளைக் கொண்டுள்ளது. லைவ் ஹிந்துஸ்தான் இந்தச் சம்பவம் கோரக்பூரின் நகாஸ் சௌக்கில் நடந்ததாகக் கூறியது.

சம்பாலில், நவம்பர் 24 அன்று குறைந்தது 4 பேர் இறந்தனர். ஆனால், போராட்டக்காரர்கள் மீது துப்பாக்கிச் சூடு நடத்தியதை காவல்துறை மறுத்தது. போராட்டக்காரர்கள் பயன்படுத்தியதாகக் கூறப்படும் நாட்டுத் துப்பாக்கிகளால் மேற்கொள்ளப்பட்ட துப்பாக்கிச் சூடுதான் மரணங்களுக்குக் காரணம் என்று அந்த அறிக்கையில் குறிப்பிடப்பட்டிருந்தது.

முடிவு:

சம்பாலில் இருந்து பல மோதல்களின் வீடியோக்கள் வெளிவந்தாலும், 2019-ல் எடுக்கப்பட்ட இந்த வீடியோ சம்பால் வன்முறையைக் காட்டவில்லை என்பது தெளிவாகிறது.

Note : This story was originally published by ‘IndiaToday’ and translated by ‘News7 Tamil’ as part of the Shakti Collective.