கடந்த டிசம்பர் மாதம் சில்லறை விற்பனை விலை அடிப்படையிலான பணவீக்கம் 5.72 சதவீதமாக குறைந்துள்ளது.
சில்லறை பணவீக்கத்தை 4 சதவீதத்தில் வைக்க வேண்டும் என ரிசர்வ் வங்கிக்கு இலக்கு நிர்ணயிக்கப்பட்டுள்ளது. மேலும் இதில் இரண்டு சதவீதம் கூடுதலாகவோ அல்லது இரண்டு சதவீதம் குறைவாகவோ வைத்துக் கொள்ளலாம் என்ற தளர்வும் வழங்கப்பட்டிருக்கிறது. தற்போது சில்லறை பணவீக்கம் 6 சதவீதத்துக்குள் வந்துள்ளது. காய்கறிகளின் விலை குறைந்ததே சில்லறை பணவீக்கம் குறைந்ததற்கு காரணமாக கூறப்படுகிறது.
கடந்த நவம்பர் மாதம் இந்த பணவீக்கம் 5.88 சதவீதமாக இருந்தது. இதுவே கடந்த 2021ம் ஆண்டு டிசம்பர் மாதம் சில்லறை பணவீக்கம் 5.66 சதவீதமாக இருந்தது குறிப்பிடத்தக்கது.
உணவு பொருள் அடிப்படையிலான பணவீக்கம் கடந்த டிசம்பர் மாதம் 4.19 சதவீதமாக குறைந்துள்ளது. கடந்த நவம்பர் மாதம் இந்த பணவீக்கம் 4.67 சதவீதமாக இருந்தது குறிப்பிடத்தக்கது.
2023-ம் ஆண்டில் சில்லறை பணவீக்கம் 6.7 சதவீதமாக இருக்கும் என கடந்த டிசம்பர் மாதம் நடைபெற்ற நிதிக் கொள்கை கூட்டத்தில் கணிக்கப்பட்டது. உள்நாட்டில் உணவுப் பொருட்களின் விலையை கட்டுக்குள் வைக்க பல்வேறு உணவுப் பொருட்களின் ஏற்றுமதிக்கு மத்திய அரசு கட்டுப்பாடு விதித்துள்ளது.
