This News Fact Checked by ‘India Today’
உக்ரைன் மீதான ரஷ்ய படையெடுப்பு மூன்று ஆண்டுகளுக்கு மேலாக நீடித்து வருகிறது. சமீபத்தில் உக்ரைன் அதிபர் விளாடிமிர் ஜெலென்ஸ்கியுடன் ஓவல் அலுவலகத்தில் சந்தித்த அமெரிக்க அதிபர் டொனால்ட் டிரம்ப் சர்ச்சைக்குரிய வகையில் பேசியது உலகையே அதிர்ச்சிக்குள்ளாக்கியது. உக்ரைனுக்கு அமெரிக்க உதவி வழங்குவது குறித்த அமெரிக்க அதிபரின் நிலைப்பாடு ரகசியமாக இல்லை. ஜோ பைடனின் கட்டளையின் கீழ் அமெரிக்கா உக்ரைனுக்கு 300 பில்லியன் டாலருக்கும் அதிகமாக செலவிட்டதாக அவர் அடிக்கடி கூறி வருகிறார் .
இந்த நிலையில் போர் மண்டலம் போன்ற ஒரு இடத்தில் உக்ரேனிய பெண் சிப்பாய் ஒருவர் மேக்கப் போடுவதைக் காட்டும் ஒரு வீடியோ தற்போது வைரலாகி வருகிறது. இந்த வீடியோவைப் பகிர்ந்த பயனர்கள் ஒரு நெருக்கடி நிலையில் அமெரிக்காவிடமிருந்து பணம் பெறுவதற்காக நடிகரை பயன்படுத்தி உக்ரைன் போலி போர் காட்சிகளை தயாரித்து வருவதாகவும் எழுதினர். ஒரு பேஸ்புக் பயனர் இவ்வாறு எழுதினார் , “உக்ரைன் வீரர்கள் போரினால் பாதிக்கப்பட்டவர்களாகத் தங்களைக் காட்டிக்கொள்ள போலியான போரை தயாரிக்கின்றனர். இதன்மூலம் அமெரிக்காவின் நிதியை தொடர்ந்து பெற முயற்சிக்கிறார்கள். இதைப் பற்றி நீங்கள் என்ன நினைக்கிறீர்கள்? என பதிவிட்டிருந்தார்.
இந்த வைரல் காணொலி, உக்ரேனிய கலைஞர்களான மிஷா ஸ்கார்பியன் மற்றும் விட்சிக் ஆகியோரின் இசை காணொலியிலிருந்து திரைக்குப் பின்னால் படமாக்கப்பட்ட காட்சிகள் என்பதை இந்தியா டுடே உண்மைச் சரிபார்ப்பு கண்டறிந்துள்ளது.
உண்மை சரிபார்ப்பு :
வைரலான பதிவில் , பலர் இந்த காணொலி போர் மண்டலத்திலிருந்து எடுக்கப்பட்டது அல்ல, மாறாக ஒரு இசை வீடியோவிலிருந்து எடுக்கப்பட்டது என்று சுட்டிக்காட்டினர் . கருத்துகளில், உக்ரேனிய இசைக் கலைஞர்களான மிஷா ஸ்கார்பியன் மற்றும் விட்சிக் ஆகியோரின் “பிரதர்ஸ்” என்ற பாடலுக்கான இசை வீடியோவின் இணைப்பையும் நாங்கள் கண்டோம். இந்த வீடியோ இந்த ஆண்டு பிப்ரவரி 25 அன்று யூடியூப்பில் பதிவேற்றப்பட்டது. இந்த காணொலி போர் மண்டலத்தில் உக்ரேனிய வீரர்களின் போராட்டங்களை சித்தரிக்கிறது.
2022 ஆம் ஆண்டில், உக்ரைன் மீதான ரஷ்யாவின் படையெடுப்பு தொடங்கிய சிறிது நேரத்திலேயே, உக்ரைன் போலி போர் வீடியோக்களை தயாரிப்பதாகக் குற்றம் சாட்டி இதேபோன்ற பல கூற்றுகள் வைரலானது குறிப்பிடத்தக்கது . அந்த நேரத்தில், இந்தியா டுடே ஃபேக்ட் செக் இந்தக் கூற்றுக்களை மறுத்தது.
எனவே, வைரலான காணொலியில், உக்ரேனிய வீரர்கள் அமெரிக்காவிடம் பணம் கேட்க போலியான போர் காட்சிகளை உருவாக்கவில்லை என்பது தெளிவாகிறது.
Note : This story was originally published by ‘India Today’ and Translated by ‘News7 Tamil’ as part of the Shakti Collective.
