சியான் விக்ரம் நடிக்கும் “கோப்ரா” திரைப்படத்தின் ரிலீஸ் தேதியை படக்குழு இன்று அதிகாரப்பூர்வமாக அறிவித்துள்ளது.
டிமாண்டி காலனி, இமைக்கா நொடிகள் ஆகிய படங்களுக்குப் பிறகு கோப்ரா திரைப்படத்தை இயக்குநர் அஜய் ஞானமுத்து இயக்கியுள்ளார். இப்படத்தின் நாயகியாக கேஜிஎஃப் ஸ்ரீநிதி ஷெட்டி நடிக்கிறார். மேலும், இர்பான் பதாந், கே.எஸ்.ரவிகுமார், மியா ஜார்ஜ், மிருணாளினி ரவி, மீனாட்சி உள்ளிட்டோர் நடிக்கிறார்கள். ஏ.ஆர் ரஹ்மான் இசையமைத்துள்ளார்.
தயாரிப்பாளர் லலித்குமார் தயாரித்துள்ள கோப்ரா படத்தின் படப்பிடிப்பு கடந்த 2019-ஆம் ஆண்டு மே மாதம் தொடங்கியது. சமீபத்தில் இப்படத்தின் படப்பிடிப்பு நிறைவடைந்துள்ளது. விக்ரம் பல்வேறு கெட்டப்புகளில் இப்படத்தில் நடித்துள்ளதால் இப்படத்துக்கான எதிர்பார்ப்பு ரசிகர்கள் மத்தியில் அதிகரித்துள்ளது.
இந்நிலையில், ‘கோப்ரா’ வரும் ஆகஸ்ட் 11ஆம் தேதி தியேட்டர்களில் வெளியாகிறது என்று படக்குழு அதிகாரப்பூர்வமாக அறிவித்திருக்கிறது. இந்த அறிவிப்பு விக்ரம் ரசிகர்களிடையே மிகுந்த மகிழ்ச்சியை ஏற்படுத்தியுள்ளது.
