சென்னை மாநகரில் 10 ஆண்டுகள் பழமையான 68 இடங்களில் உள்ள போக்குவரத்து சிக்னல்களை மாற்ற டெண்டர் அறிவிப்பை காவல் துறை வெளியிட்டுள்ளது.
இதில், 4.76 கோடி மதிப்பீட்டில் 10 ஆண்டுகள் பழமையான 68 போக்குவரத்து சிக்னல்கள் மாற்றி அமைக்கப்பட உள்ளன. சென்னையில் சேதமடைந்து பயனற்று கிடந்த போக்குவரத்து சிக்னல்கள் தொடர்பாக கடந்த செப்டம்பர் 2ஆம் தேதி நியூஸ் 7 தமிழ் கள ஆய்வு மேற்கொண்டு செய்தி வெளியிட்டிருந்தது.
சென்னை மாநகரில் முக்கிய பிரதான பகுதிகளாக இருக்கும் ராயப்பேட்டை, தி.நகர், ஜி.என் செட்டி சாலை, மேற்கு மாம்பழம் உள்ளிட்ட பகுதிகளில் சேதமடைந்து கிடந்த போக்குவரத்து சிக்னல்கள் தொடர்பாக விபத்து ஏற்படும் அபாயம் குறித்து செய்தி வெளியிட்டிருந்தது நியூஸ் 7 தமிழ்.
கடந்த 2021 ஆம் ஆண்டு தேசிய குற்ற ஆவண காப்பகம் வெளியிட்ட அறிக்கையின் படி, சென்னையில் 5 ஆயிரத்திற்கும் மேற்பட்ட சாலை விபத்து மரணங்கள் நடந்துள்ளதை சுட்டிக்காட்டி போக்குவரத்து சிக்னல்கள் சேதம் அடைந்து கிடக்கும் செய்தி வெளியிடப்பட்டது. இந்நிலையில், சென்னை மாநகரில் 10 ஆண்டுகள் பழமையான 68 இடங்களில் உள்ள போக்குவரத்து சிக்னல்களை மாற்ற டெண்டர் அறிவிப்பை காவல் துறை வெளியிட்டுள்ளது.
-ம.பவித்ரா
