தங்கும் விடுதிகள் என்றாலே பிரம்மாண்ட கட்டடங்கள், அவற்றின் பளபளப்பான தோற்றங்கள்தான் பெரும்பாலும் நம் கண் முன்னாள் வந்து நிற்கும். ஆனால் இந்த பிம்பத்திற்கு மாறாக பல விநோதமான ஓட்டல்கள் உலகில் உள்ளன. எதிலும் ஒரு மாறுபட்ட அனுபவத்தை தேடும் நபர்களுக்காக வடிவமைக்கப்பட்டுள்ள அந்த புதுமையான ஓட்டல்கள் சிலவற்றை இங்கே காண்போம்.
1) கடலுக்கு அடியில் ஓட்டல்
கடற்கரையோரம் உள்ள ஓட்டலில் ரூம் எடுத்து, ஜன்னல் வழியே கடல் அழகை ரசிப்பது ஒரு அலாதியான அனுபவமாக இருக்கும். அப்படியே கடலுக்கு அடியிலேயே சென்று தங்கி கடல் அழகை ரசித்தால் எப்படி இருக்கும். அதையும் சாத்தியமாக்கும் வகையில் உலகில் கடலுக்கு அடியிலேயே சில ஓட்டல்கள் இயங்குகின்றன. உலக சுற்றுலா பயணிகளின் சொர்க்கபுரியாக திகழும் மாலத் தீவில் உள்ள தி முராக்கா ஓட்டல் கடலுக்கு அடியில் இயங்கும் ஓட்டல்களில் பிரபலமானது. கடலுக்கு அடியில் 16 அடி ஆழத்தில் அமைக்கப்பட்டுள்ள இந்த ஓட்டலில் படுக்கை அறை, குளியல் அறை, சமையல் அறை, உடற்பயிற்சி கூடம், மசாஜ் சென்டர் என தனிதனியாக வசதிகள் உள்ளன. இங்கு தங்கும் சுற்றுலா பயணிகளுக்கு சமையல் செய்துகொடுப்பதற்கென்றே தனியாக சமையல் கலைஞர் ஒருவரும் நியமிக்கப்டுகிறார். சுற்றிலும் காணப்படும் பவளப் பாறைகளின் அழகையும், மீன்களும், சுறாக்களும் துள்ளிவிளையாடும் அழகையும் ரசித்துக்கொண்ட கடல் அழகில் மெய்மறந்து இங்கு தங்கலாம்.
2) ஐஸ் ஓட்டல்
கனடாவின் கியூபெக் நகரில் அமைந்துள்ள ஓட்டல் டி கிளாஸ் 30 ஆயிரம் டன் உறைபனியாலும், 500 டன் பனிக் கட்டிகளாலும் உருவாக்கப்பட்ட ஐஸ் ஓட்டலாகும். 44 அறைகள், பிரம்மாண்ட ஹால், தேவாலயம், பொழுதுபோக்கு அம்சங்களுக்கான இடம் என அனைத்தும் பனிக்கட்டியாலேயே உருவாக்கப்பட்டுள்ளது ஹோட்டல் டி கிளாஸ். அறைக்கு வெளியே மைனஸ் 30 டிகிரி அளவிற்கு குளிர் இருந்தால்கூட அறைக்குள் இருப்பவர்களுக்கு அதனால் பாதிப்பு ஏற்படாத அளவிற்கு இந்த ஓட்டலில் வசதிகள் செய்யப்பட்டுள்ளன. மேலும் ஓட்டல் முழுவதும் ஆங்காங்கே கண்ணைக் கவரும் பனிச் சிற்பங்களும் சுற்றுலா பயணிகளை சுண்டி இழுக்கும் வகையில் அமைக்கப்பட்டுள்ளன. பனிச் சறுக்கில் ஆர்வம் உள்ளவர்களுக்கு அந்த ஆவலை தீர்க்க இந்த ஓட்டலில் சிறப்பு வசதிகள் ஏற்படுத்தப்பட்டுள்ளன. குளிர்காலத்தில் கனடாவின் லாரென்டைன் மலைப்பிரதேசத்தின் இயற்கை எழிலை ரசிக்க நினைப்பவர்களுக்கு இந்த ஓட்டல் டி கிளாஸ் ஓட்டல் ஒரு வரப்பிரசாதமாக கருதப்படுகிறது.
3) விமானத்தில் ஓட்டல்
சுவிடனின் ஸ்டாக்ஹோமில் விமானத்திற்குள்ளேயே ஒரு சொகுசு ஓட்டல் இயங்குகிறது. அதுவும் விமானம் நிலையம் அருகிலேயே. ஸ்டாக்ஹோம் நகரின் ஆர்லான்டா விமான நிலையம் அருகே உள்ள ஜம்போ ஹோட்டல்தான் அது. தனது ஓட்டத்தை நிறுத்திக்கொண்ட போயிங் 747 ரக பிரம்மாண்ட விமானம் ஒன்றை வாங்கி அதனையே ஓட்டலாக மாற்றி அமைத்து அதில் 25 அறைகளையும் உருவாக்கியிருக்கிறார்கள். வித்தியாசமான தங்கும் அனுபவத்தை விரும்பும் சுற்றுலா பயணிகளை இந்த ஓட்டல் மிகவும் கவர்ந்துள்ளது. அதே நேரம் ஆர்லான்டா விமான நிலையத்தில் விமானம் ரத்து ஆவதால் அவதி அடையும் விமானப் பயணிகளும் அடுத்த விமானம் ஏற்பாடாகும் வரை இந்த ஜம்போ ஓட்டலில் தங்கிவிட்டுச் செல்கின்றனர்.
4) தலைகீழாக தொங்கும் அறையில் தங்கலாம்
வித்தியாச விரும்பிகளுக்காகவே முற்றிலும் உருவாக்கப்பட்ட ஓட்டல் ஒன்று ஜெர்மனியின் பெர்லின் நகரில் உள்ளது. புரபொல்லர் ஐஸ்லேண்ட் சிட் லாட்ஜ் என அழைக்கப்படும் அந்த ஓட்டலில் மொத்தம் 30 அறைகள் உள்ளன. ஒவ்வொன்றும் ஒவ்வொரு விதம். ஒரு அறை சவப்பெட்டியில் தூங்குவது போன்ற உணர்வை கொடுக்கும், இன்னொரு அறை மருத்துவமனையில் நோயாளியாக இருப்பது போன்ற உணர்வை கொடுக்கும். இன்னொரு அறை மகிழ்ச்சியின் வெளிப்பாடாக நடனம் ஆடுவது போன்ற உற்சாகத்தை கொடுக்கும். இப்படி ஒவ்வொருவரும் தாங்கள் விரும்பும் உணர்களுக்கு ஏற்ற வகையில் அறைகளை தேர்ந்தெடுத்துக்கொள்ளலாம். அதில் ஒரு அறை மிகவும் வித்தியாசமான வடிவமைப்பில் கட்டமைக்கப்பட்டுள்ளது. அங்கு சென்றால் நீங்க தலைகீழாக தொங்குவது போன்ற எண்ணம் உங்களுக்கு ஏற்படும். டேபிள், மேஜை எல்லாம் மேற்கூரையிலிருந்து தலைகீழாக தொங்கும். சுருக்கமாக சொன்னால் அந்த அறையே தலைகீழாக தொங்குவது போன்ற உணர்வு உங்களுக்கு ஏற்படும்.
5) பழங்கால குகையில் ஐந்து நட்சத்திர ஓட்டல்
துருக்கியின் புகழ்பெற்ற சுற்றுலா தலங்களில் ஒன்றான கேப்படோசியா பகுதியில் 5 மற்றும் 6ம் நூற்றாண்டைச் சேர்ந்த மலைக் குகைகளிலேயே பிரம்மாண்ட ஓட்டல் ஒன்று அமைக்கப்பட்டுள்ளது. ஐந்து நட்சத்திர அந்தஸ்து பெற்ற அந்த யுனாக் எவ்லரி ஓட்டலில் பழங்கால குகைகளே அதன் பழமை மாறாமல் சொகுசு அறைகளாக மாற்றப்பட்டுள்ளன. மொத்தம் 40 டீலக்ஸ் அறைகள் இந்த ஓட்டலில் அமைக்கப்பட்டுள்ளன. பழங்கால இடங்களையும், வரலாற்று சுவடுகளையும் தேடி தேடிச் சென்று ரசிப்பதில் ஆர்வமுள்ள சுற்றுலா பயணிகளிடையே இந்த ஓட்டல் மிகவும் பிரபலம்.
6) ரோபாட்டுக்கள் உபசரிக்கும் ஓட்டல்
ஜப்பானின் நாகசாகி நகரில் உள்ள ஹியூஸ் டென் பாஸ்க் தீம் பார்க்கில் அமைந்திருக்கும் ஹென்னா ஓட்டல்தான் உலகிலேயே முதல்முறையாக ரோபாட்டுக்களை பணியாளர்களாக அமர்த்திய ஓட்டல். அங்கு பணியாற்றும் வரவேற்பாளர் முதல் ரூம் சர்வீஸ் ஊழியர் வரை எல்லாருமே ரோபோட்டுக்கள்தான். ஆங்கிலத்திலும், ஜப்பானிய மொழியிலும் வாடிக்கையாளர்களுடன் உரையாடுகின்றன அந்த ரோபோக்கள். தோற்றத்திலும் மனிதர்களைப் போன்றே அவை இருக்கின்றன. இங்கு மனிதர்களும் பணிக்கு அமர்த்தப்படுவதுண்டு ஆனால் அவர்கள், ரோபோக்கள் எந்திரக் கோளாறுகளால் வேலை செய்ய முடியாமல் போனால் மட்டுமே களம் இறக்கப்படுவார்களாம்.
7) ஓட்டல் அறைகளாக மாறிய கழிவு நீர் தொட்டிகள்
ஆஸ்திரியாவில் உள்ள ஓட்டன்ஷெய்ம் நகரில் உள்ள நோ பிரில் டாஸ் பார்க் ஓட்டலின் அறைகள் பயன்படுத்தப்படாத கழிவு நீர் தொட்டிகளை கொண்டு உருவாக்கப்பட்டுள்ளன. பயன்படுத்தப்படாமல் இருக்கும் பிரம்மாண்ட கழிநீர் தொட்டிகளுக்குள் டபுள்பெட் படுக்கை, மின் விளக்கு, கதவு, ஜன்னல் உள்ளிட்ட வசதிகளை ஏற்படுத்தி அதனை அறைகளாக மாற்றியிருக்கிறார் ஆன்ட்ரியாஸ் ஸ்டாரஸ் என்கிற ஆர்கிடெக்.
