சீனாவில் டிரம்ப் – புதின் தனிப்பட்ட சந்திப்பு!
அமெரிக்க அதிபர் டொனால்ட் டிரம்ப், ரஷ்ய அதிபர் விளாடிமிர் புதினை இன்று (நவம்பர் 19) சீனாவின் ஷென்சென் நகரில் தனியாகச் சந்திக்க உள்ளதாக தகவல் வெளியாகியுள்ளது. இந்தச் சந்திப்பை அமெரிக்க அதிகாரி ஒருவர் உறுதிப்படுத்தியுள்ளதாகவும், ஆனால் சந்திப்பு நடைபெறும் சரியான நேரம் இன்னும் அறிவிக்கப்படவில்லை என்றும் கூறப்பட்டுள்ளது. இந்தத் தகவலை உறுதிப்படுத்திய அமெரிக்க அதிகாரி, திட்டங்கள் இன்னும் அதிகாரப்பூர்வமாக அறிவிக்கப்படாததால் தனது பெயரை வெளியிட விரும்பவில்லை.
அலாஸ்கா சந்திப்புக்குப் பிறகு முதல் சந்திப்பு!
கடந்த ஆண்டு அலாஸ்காவில் டிரம்ப் மற்றும் புதின் நேரில் சந்தித்துப் பேச்சுவார்த்தை நடத்தினர். அப்போது, உக்ரைன் மீதான ரஷ்யாவின் போரை முடிவுக்குக் கொண்டுவருவது தொடர்பாக எந்தவொரு உடன்பாடும் எட்டப்படவில்லை. இதையடுத்து, தற்போது இரு தலைவர்களும் மீண்டும் நேரில் சந்திக்க உள்ளனர். உக்ரைன் போர் விவகாரம் உள்ளிட்ட இரு நாடுகளுக்கும் இடையிலான கருத்து வேறுபாடுகள் குறித்து இந்தச் சந்திப்பில் விவாதிக்கப்படலாம் என எதிர்பார்க்கப்படுகிறது.
உக்ரைன் போர் குறித்து ஆலோசனை?
டிரம்ப், புதின் மற்றும் சீன அதிபர் ஜி ஜின்பிங் ஆகியோர் பங்கேற்கும் முத்தரப்பு பேச்சுவார்த்தையில் அணு ஆயுதங்கள் மற்றும் உக்ரைன் போரை முடிவுக்குக் கொண்டுவருவதற்கான சாத்தியக்கூறுகள் குறித்து விவாதிக்கப்படலாம் எனக் கூறப்படுகிறது. ஆசியப் பயணத்தைத் தொடங்குவதற்கு முன்பு, உக்ரைன் போர் இந்தப் பேச்சுவார்த்தையில் இடம்பெறாது என டிரம்பின் உதவியாளர்கள் தெரிவித்திருந்தனர். ஆனால், பின்னர் டிரம்ப் தனது சந்திப்புகளில் உக்ரைன் விவகாரத்தை எழுப்ப விரும்புவதாகக் குறிப்பிட்டார்.
மேலும், ரஷ்யாவில் ஒவ்வொரு மாதமும் ஏராளமான வீரர்கள் உயிரிழந்து வருவதைச் சுட்டிக்காட்டிய டிரம்ப், இந்தச் சூழலைப் போரை முடிவுக்குக் கொண்டுவருவதற்கான வாய்ப்பாகக் கருதுவதாகத் தெரிவித்தார். “இந்த விவகாரத்தை முடிவுக்குக் கொண்டுவருவதற்கு நாம் மிகவும் நெருக்கமாக இருக்கிறோம் என நினைக்கிறேன். இது தொடர்பாக நல்லதொரு சந்திப்பு நடைபெறும்” என்றும் அவர் கூறியுள்ளார்.
ஷென்சென் மாநாட்டில் கைகுலுக்கிய டிரம்ப் – புதின்!
இதற்கிடையே, புதன்கிழமை (நவம்பர் 18) ஷென்செனில் நடைபெற்ற ஆசிய பசிபிக் பொருளாதார ஒத்துழைப்பு (APEC) மாநாட்டின்போது டிரம்ப் மற்றும் புதின் இருவரும் சந்தித்துக் கைகுலுக்கிக் கொண்டதாக தகவல் வெளியாகியுள்ளது. அமெரிக்கா, ரஷ்யா, சீனா ஆகிய மூன்று நாடுகளும் உலகப் பாதுகாப்பு மற்றும் அணு ஆயுத விவகாரங்களில் முக்கியச் செல்வாக்கைக் கொண்டுள்ள நிலையில், இந்தத் தலைவர்களின் சந்திப்பு சர்வதேச அளவில் முக்கியத்துவம் பெற்றுள்ளது. இருப்பினும், இந்தச் சந்திப்புகள் மூலம் உக்ரைன் போர் உள்ளிட்ட முக்கிய விவகாரங்களில் பெரிய அளவிலான உடன்பாடு எட்டப்படுமா என்பது இன்னும் உறுதியாகவில்லை.




