லோகேஷ் கனகராஜ் இயக்கத்தில் நடிகர் விஜய் நடிக்கும் தளபதி 67 படத்தில், பிரபல கன்னட நடிகர் இணைவதாக தகவல்கள் வெளியாகியுள்ளன.
நடிகர் விஜய்யின் வாரிசு திரைப்படம், பொங்கல் பண்டிகையை முன்னிட்டு கடந்த ஜனவரி 11ஆம் தேதி வெளியானது. கலவையான விமர்சனங்களைப் பெற்ற இப்படம் தொடர்ந்து திரையரங்குகளில் வெற்றிகரமாக ஓடி வருகிறது. மேலும் வெளியான 5 நாட்களில் உலகளவில் 150 கோடிக்கும் மேல் வசூலித்து சாதனை படைத்துள்ளது.
வாரிசு கொண்டாட்டத்தில் இருக்கும் விஜய் ரச்கர்கள், தளபதி 67 படத்தின் அப்டேட்டிற்காக காத்துக் கொண்டிருக்கின்றனர். அண்மையில் தளபதி 67 படத்தின் இயக்குநர் லோகேஷ் கனகராஜ், அப்படத்தின் அப்டேட் விரைவில் வரும் என்று தெரிவித்தார்.
தளபதி 67 படத்தில் த்ரிஷா, பாலிவுட் நடிகர் சஞ்சய் தத், கவுதம் மேனன், மிஷ்கின், பிரியா ஆனந்த் உள்ளிட்ட பல திரை நட்சத்திரங்கள் நடித்து வருவதாக தகவல்கள் வெளியானது. மேலும், கேங்ஸ்டர் படமாகவும் ஆக்சன் படமாகவும் உருவாகும் தளபதி 67 படத்தின் படப்பிடிப்பும் தொடங்கியுள்ளது.
இந்நிலையில், தளபதி 67 திரைப்படத்தில், 777 சார்லி படத்தில் கதாநாயகனாக நடித்துப் பிரபலமான ரக்ஷித் ஷெட்டியும் இணைவதாக தகவல்கள் வெளியாகியுள்ளன. தளபதி 67 படத்தில் நடிப்பது குறித்து ரக்ஷித் ஷெட்டியை, படக்குழு அணுகியதாகவும் சினிமா வட்டாரங்கள் தெரிவிக்கின்றன. ஆனால் ரக்ஷித் ஷெட்டி, தளபதி 67 படத்தில் நடிப்பதற்கு ஒப்புக்கொண்டதாக எந்தவித அதிகாரப்பூர்வ தகவல்களும் இதுவரை வெளியாகவில்லை.
