உலகக்கோப்பை கால்பந்து தொடரின் நாக் அவுட் சுற்றில் இன்று ஸ்பெயின்-மொராக்கோ அணிகளும், போர்ச்சுகல்-ஸ்விட்சர்லாந்து அணிகளும் மோதுகின்றன.
உலக கோப்பை கால்பந்து போட்டி கடந்த மாதம் 20-ம் தேதி கத்தாரில் தொடங்கியது. இதில் 32 நாடுகள் பங்கேற்றன. அவை 8 பிரிவாக பிரிக்கப்பட்டன. ஒவ்வொரு பிரிவிலும் 4 அணிகள் இடம்பெற்றன. லீக் சுற்று முடிவில் ஒவ்வொரு பிரிவிலும் முதல் 2 இடங்களை பிடித்த அணிகள் நாக்-அவுட் ரவுண்டான 2-வது சுற்றுக்கு நுழையும்.
அதன்படி, 16 அணிகள் 2வது சுற்றுக்கு தகுதிபெற்றுள்ள நிலையில், 2வது சுற்று போட்டிகள் நடைபெற்று வருகிறது. இந்த சுற்றில் இதுவரை நெதர்லாந்து, அர்ஜெண்டினா, பிரான்ஸ், இங்கிலாந்து, குரோஷியா, பிரேசில் ஆகிய அணிகள் காலிறுதிக்கு தகுதிபெற்றுள்ளன.
இந்நிலையில் இன்று 2 போட்டிகள் நடைபெற உள்ளது. முதல் போட்டியில் ஸ்பெயின் அணி, மொராக்கோ அணியை எதிர்கொள்கிறது. இந்த இரு அணிகள் இடையேயான ஆட்டம் இன்று இரவு 8.30 மணிக்கு தொடங்குகிறது.
இரண்டாவது போட்டியில் போர்ச்சுகல் மற்றும் ஸ்விட்சர்லாந்து அணிகள் பலப்பரீட்சை நடத்துகின்றன. இரு அணிகள் மோதும் ஆட்டம் நள்ளிரவு 12.30 மணிக்கு தொடங்குகிறது.
