நடிகர் சரத்பாபுவின் உடல் தி.நகரில் உள்ள அவரது இல்லத்திற்கு கொண்டுவரப்பட்டது. பொதுமக்களின் அஞ்சலிக்கு பின் மாலை நல்லடக்கம் செய்யப்பட உள்ளது.
பிரபல நடிகர் சரத்பாபு திடீர் உடல்நலக்குறைவு காரணமாக கடந்த மாதம் மருத்துவமனையில் அனுமதிக்கப்பட்டார். பெங்களூரில் உள்ள தனியார் மருத்துவமனையில் தொடர்ந்து அவருக்கு சிகிச்சை அளிக்கப்பட்டு வந்தது. இதையடுத்து அவர் மேல் சிகிச்சைக்காக ஐதராபாத்தில் உள்ள தனியார் மருத்துவமனையில் அனுமதிக்கப்பட்டார்.
தொடர்ந்து சிகிச்சை பெற்று வந்த நடிகர் சரத்பாபுவின் உடல்நிலை மிகவும் மோசமாக உள்ளதாக மருத்துவமனை சார்பில் தகவல் வெளியானது. சரத்பாபுவின் கல்லீரல், சிறுநீரகம் மற்றும் நுரையீரல் ஆகியவை அதிக அளவில் பாதிக்கப்பட்டுள்ளதாகவும் மருத்துவர்கள் தகவல் தெரிவித்திருந்தனர். அவருக்கு வென்டிலேட்டர் மூலம் சிகிச்சை அளிக்கப்பட்டு வந்த நிலையில், அவர் சிகிச்சை பலனின்றி உயிரிழந்தார்.
நடிகர் சரத்பாபுவின் மறைவுக்கு பிரபலங்கள் பலரும் இரங்கல் தெரிவித்துவருகின்றனர். அந்த வகையில் நடிகர்கள் கமல்ஹாசன் மற்றும் ரஜினிகாந்த் இரங்கல் தெரிவித்தனர். சரத் பாபுவின் மறைவு தமிழ் மற்றும் தெலுங்கு திரையுலகினரை சோகத்தில் ஆழ்த்தியுள்ளது.
இந்த நிலையில் நடிகர் சரத்பாபுவின் உடல் நேற்று ஹைதராபாத் ஃபிலிம் சேம்பரில் மக்கள் பார்வைக்கு வைக்கப்பட்டு இரவு ஒன்பது முப்பது மணிக்கு மேல் அஞ்சலி செலுத்துவதற்கு ஏற்பாடு செய்யப்பட்டது. தெலுங்கு திரைப் பிரபலங்கள் பலரும் அவருக்கு அஞ்சலி செலுத்தினர்.
அதனைத் தொடர்ந்து நேற்று இரவே ஹைதராபாத்திலிருந்து சென்னைக்கு சாலை வழியாக கொண்டு அவரது உடல் கொண்டு வரப்பட்டு சென்னை தி நகரில் உள்ள அவரது இல்லத்தில் பொதுமக்கள் பார்வைக்கு அஞ்சலி செலுத்த வைக்கப்பட உள்ளது. பிறகு மாலையில் கிண்டியில் உள்ள சுடுகாட்டில் தகனம் செய்யப்படும் என அவரது சகோதரர்கள் கிஷோர் மற்றும் சந்தோஷ் தெரிவித்துள்ளனர்.
