அஜித் குமார் – எச்.வினோத் கூட்டணியில் உருவாகும் AK61 திரைப்படத்தின் அடுத்தகட்ட படப்பிடிப்பு நாளை விசாகப்பட்டினத்தில் தொடங்குகிறது.
அஜித் தனது 61-வது படத்தில் மீண்டும் இயக்குநர் ஹெச்.வினோத்துடன் இணைந்துள்ளார். இந்தப் படத்திற்கு தற்காலிகமாக ‘அஜித் 61’ மற்றும் ‘ஏகே 61’ என்று பெயரிடப்பட்டுள்ளது. பிரபல இயக்குநரும், தயாரிப்பாளருமான போனி கபூர் இப்படத்தை படத்தை தயாரித்து வருகிறார். வங்கி கொள்ளையை மையப்படுத்தி எடுக்கப்படும் த்ரில்லர் படமான இப்படத்தில், அஜித் இரட்டை வேடத்தில் நடிக்கிறார். அவருடன் மஞ்சு வாரியர், வீரா, ஜான் கொக்கன், அஜய் மற்றும் சில பிரபலமான நட்சத்திரங்கள் முக்கிய வேடங்களில் நடிக்கின்றனர். இந்தப் படத்தின் மூலம் ஜிப்ரான் முதன்முறையாக அஜித்திற்கு இசையமைக்கிறார்.
இப்படத்தின் ஹைதராபாத் ஷெட்யூல் ஜூன் தொடக்கத்தில் முடிந்த பின்னர் படத்தின் முக்கிய படப்பிடிப்பு நிறுத்தி வைக்கப்பட்டுள்ளது. கிட்டத்தட்ட ஒரு மாதமாக படப்பிடிப்புக்கு பிரேக் எடுத்திருந்த அஜித் மீண்டும் விசாகப்பட்டினத்தில் நாளை நடைபெறவுள்ள படப்படிப்பில் கலந்துகொள்ளவுள்ளதாக தகவல் வெளியாகியுள்ளது. இதில், அஜித் பங்கேற்கும் காட்சிகள் படமாக்கப்படுகின்றன.
‘அஜித் 61’ படம் முதலில் 2022 தீபாவளிக்கு வெளியிடத் திட்டமிடப்பட்டது. ஆனால் படப்பிடிப்பில் ஏற்பட்ட தாமதம் காரணமாக திரைப்படத்தின் ரிலீஸ் தேதி தள்ளிவைக்கப்பட்டுள்ளது. இதையடுத்து, படம் டிசம்பரில் வெளியாகும் என எதிர்பார்க்கப்படுகிறது.
-ம.பவித்ரா
