ஹிமாசல பிரதேசத்தில் ஹிந்து கோயிலில் நடைபெற்ற இஸ்லாமிய ஜோடியின் திருமணம் அனைவரது கவனத்தையும் ஈர்த்துள்ளது.
சிம்லா மாவட்டம், ராம்பூரில் உள்ள சத்யநாராயணா கோயிலில் இஸ்லாமிய ஜோடி திருமணம் செய்துள்ளனர். மணமகன் கட்டடப் பொறியாளா். மணமகள் எம்.டெக் பட்டதாரி ஆவாா். இந்தக் கோயிலின் அருகே மசூதி ஒன்றும் உள்ளது. இந்நிலையில், மணமகன் மற்றும் மணப்பெணின் வீட்டார் இருதரப்பிநரும் ஹிந்து கோயிலில் இவர்களது திருமணத்தை நடத்த விரும்பினா்.
விஸ்வ ஹிந்து பரிஷத் அமைப்பினரால் நடத்தப்பட்டு வரும் இக்கோயில் வளாகத்தில் ஆா்எஸ்எஸ் அமைப்பின் அலுவலகமும் உள்ளது. இந்தத் திருமணத்தில் ஹிந்து, இஸ்லாமிய மதத்தைச் சோ்ந்தவா்கள் மற்றும் மற்ற மதங்களைச் சோ்ந்தவா்களும் பங்கேற்று மணமக்களை வாழ்த்தினா். இஸ்லாமிய மதகுரு இந்தத் திருமணத்தை நடத்தி வைத்தாா். இரு வழக்குரைஞா்கள், இரு சாட்சிகள் இத்திருமணத்தில் பங்கேற்றனா்.
இதையும் படிக்க: பாஜகவின் பி-டீம் அரசியலை சிராக் பாஸ்வான் தமிழ்நாட்டில் செய்ய வேண்டாம் – ஆ.ராசா எம்.பி காட்டம்
இதுகுறித்து, கோயில் நிா்வாகி வினய் சா்மா கூறுகையில், ‘மத நல்லிணக்கத்துக்கு சிறந்த எடுத்துக்காட்டாக இத்திருமணம் நடைபெற்றுள்ளது. இந்த ஜோடிக்கு இஸ்லாமிய மத வழக்கப்படி ஹிந்து கோயிலில் திருமணம் நடத்தி வைக்கப்பட்டுள்ளது. இதுபோன்ற நிகழ்வுகள் மூலம் நாட்டில் மதங்களுக்கும், மக்களுக்கும் இடையே நல்ல பிணைப்பு உருவாகும்’ என்றாா்.
-ம.பவித்ரா
