சிவகார்த்திகேயன் நடித்துள்ள ’மாவீரன்’ திரைப்படத்தின் ட்ரெய்லர் ஜூலை 2 ஆம் தேதி வெளியாகும் என படக்குழு அறிவித்துள்ளது.
சிவகார்த்திகேயன், அதிதி ஷங்கர் நடிக்கும் படம், ‘மாவீரன்’. ‘மண்டேலா’ படத்தை இயக்கிய மடோன் அஸ்வின் இப்படத்தை இயக்கியுள்ளார். இயக்குநர் மிஷ்கின் வில்லனாகவும், நடிகை சரிதா முக்கிய வேடத்திலும் நடித்துள்ளனர். விது அய்யனார் ஒளிப்பதிவு செய்ய ஃபிலோமின்ராஜ் எடிட்டிங் பணிகளை கவனித்துள்ளார். இந்தப் படம் தமிழ், தெலுங்கு என பைலிங்குவல் படமாக உருவாகியுள்ளது.
தெலுங்கில் இந்தப் படத்துக்கு ‘மாவீருடு’ என தலைப்பிடப்பட்டுள்ளது. இப்படத்திற்கு ‘ஆடை’, ‘மண்டேலா’ ஆகிய படங்களுக்கு இசையமைத்த பரத் ஷங்கர் இசையமைத்துள்ளார். இப்படத்தின் முதல் பாடலான ‘சீன் ஆ.. சீன்..ஆ’ வெளியாகி ரசிகர்களிடையே கவனம் பெற்றது. தற்போது இப்படத்தின் இறுதிகட்ட பணிகள் மும்முரமாக நடைபெற்று வருகின்றன. வரும் ஜூலை 14-ம் தேதி அன்று படம் திரையரங்குகளில் வெளியாகும் என அறிவிக்கப்பட்டது.
இதனிடையே, இப்படத்தை ரெட் ஜெயண்ட் மூவீஸ் நிறுவனம் தமிழ்நாட்டில் வெளியிடுகிறது என்பதை படத்தின் தயாரிப்பு நிறுவனம் அதிகாரப்பூர்வமாக ட்விட்டரில் அறிவித்தது. இதன் தொடர்ச்சியாக ’வண்ணாரபேட்டையில’ என்கிற இரண்டாம் சிங்கிள் பாடல் கடந்த 14-ஆம் தேதி அன்று வெளியானது.
தொடர்ந்து ஜூலை 2 ஆம் தேதி, மாவீரன் திரைப்படத்தின் Pre-Release நிகழ்ச்சி சென்னையை அடுத்த தாம்பரத்தில் உள்ள ஸ்ரீசாய்ராம் பொறியியல் கல்லூரியில் நடைபெறும் அறிவிக்கப்பட்டிருந்தது. இந்நிலையில், மாவீரன் திரைப்படத்தின் ட்ரெய்லரும் ஜூலை 2 ஆம் தேதி வெளியாகும் என படக்குழு அறிவித்துள்ளது.
