ஆசியக் கோப்பை கிரிக்கெட் தொடருக்கு இந்திய அணியின் கே.எல்.ராகுலை விக்கெட் கீப்பர் பேட்ஸ்மேனாக பயன்படுத்துவது சிறந்த முடிவாக இருக்கும் என இந்திய அணியின் முன்னாள் வீரர் சஞ்சய் பங்கார் தெரிவித்துள்ளார்.
ஆசிய கோப்பை கிரிக்கெட் போட்டி ஆகஸ்ட் 30ஆம் தேதி தொடங்க உள்ளது. உலக கோப்பைக்கு தேவையான இறுதிக்கட்ட அணியை தேர்வு செய்வதற்கு உதவும் இந்த தொடரில் பங்கேற்கவுள்ள இந்திய அணியின் விளையாட்டு வீரர்களை பிசிசிஐ அண்மையில் அறிவித்தது. இந்த தொடர் செப்டம்பர் 17-ஆம் தேதி வரை நடைபெற உள்ளது.
இந்த போட்டிகளில் ரோகித் சர்மா கேப்டன் ஆக நியமனம் செய்யப்பட்டுள்ள நிலையில் இந்திய அணியில் விராட் கோலி, சுப்மன் கில், ஸ்ரேயாஸ் ஐயர், கே.எல்.ராகுல், சூரியகுமார் யாதவ் , திலக் வர்மா, இஷான் கிஷான், ஹர்திக் பாண்டியா, ரவீந்திர ஜடேஜா, அக்சர் பட்டேல், ஷர்துல் தாக்கூர், பும்ரா, முகமது ஷமி, சிராஜ், குல்தீப் மற்றும் பிரசித் கிருஷ்ணா ஆகியோர் உள்ளனர்.
இந்நிலையில் தொலைக்காட்சி நிகழ்ச்சி ஒன்றில் கலந்து கொண்ட இந்திய அணியின் முன்னாள் வீரர் சஞ்சய் பங்கார் பேசியதாவது:
“ஆசியக் கோப்பை கிரிக்கெட் தொடரில் இந்திய அணியில் கே.எல்.ராகுல் மிக முக்கிய பங்காற்ற உள்ளார். இந்திய அணிக்கு விக்கெட் கீப்பர் பேட்ஸ்மேன் மிகவும் முக்கியம். இந்திய அணியில் முதல் 5 இடங்களில் களமிறங்கும் வீரர்கள் பந்து வீசப் போவதில்லை. ஒரு வேளை இந்திய அணிக்கு 6 பேர் பந்துவீசும் விதத்தில் தேவைப்பட்டால் முதல் 5 இடங்களில் உள்ளவர்களில் யாரேனும் பந்துவீச்சாளராக இருக்க வேண்டும் அல்லது விக்கெட் கீப்பர் பேட்ஸ்மேனாக இருக்க வேண்டும்.
கே.எல்.ராகுல் விக்கெட் கீப்பர் பேட்ஸ்மேனாக விளையாடும் பட்சத்தில் அணியின் சமநிலை சரியாக இருக்கும் என நான் உணர்கிறேன். ஒருவேளை கே.எல்.ராகுல் சரியாக பேட் செய்யவில்லை என்றால் இஷான் கிஷன் உள்ளார். அவரை விக்கெட் கீப்பர் பேட்ஸ்மேனாக பயன்படுத்தலாம். 50 ஓவர் கிரிக்கெட்டைப் பொருத்தவரையில் இந்திய அணிக்கு முழு உடல் தகுதியுடன் உள்ள விக்கெட் கீப்பர் பேட்ஸ்மேன் கண்டிப்பாக தேவை.
அதனால், இந்திய அணி சரியான விக்கெட் கீப்பர் பேட்ஸ்மேனை தேர்வு செய்ய வேண்டும். போதிய உடல்தகுதி இல்லாமல் விக்கெட் கீப்பர் பேட்ஸ்மேன் தேர்வு செய்யப்பட்டால் காயங்கள் ஏற்பட வாய்ப்புள்ளது” இவ்வாறு அவர் தெரிவித்தார்.
