தமிழில் வெளியாகி 100 நாட்களை கடந்து வெற்றிப் படமாக கருதப்பட்ட லவ் டுடே படத்தின் இந்தி ரீமேக்கின் புதிய அப்டேட்டை படக்குழு வெளியிட்டுள்ளது.
கோமாளி படத்தை இயக்கிய இயக்குநர் பிரதீப் ரங்கநாதன் லவ் டுடே படத்தை இயக்கி ஹீரோவாக நடித்திருந்தார். ஏஜிஎஸ் நிறுவனத்தின் தயாரிப்பில் உருவான இந்தப் படம் ரசிகர்களிடம் மிகுந்த வரவேற்பைப் பெற்றது. இப்படம் ரூ. 100 கோடி வசூலைக் குவித்ததாக அதிகாரப்பூர்வமாக அறிவிக்கப்பட்டது. இந்தப் படத்தில் நடிகர் சத்யராஜ் முக்கிய வேடத்தில் நடித்திருந்தார். நடிகை இவானா கதாநாயகியாகவும், ராதிகா சரத்குமார், யோகிபாபு உள்ளிட்டோர் சிறப்பு வேடங்களிலும் நடித்திருந்தனர்.
கடந்த ஆண்டு நவம்பர் 4ஆம் தேதி வெளியான இத்திரைப்படத்தின் 100-வது நாள் வெற்றி விழா பிப்ரவரி மாதம் கொண்டாடப்பட்டது. கடந்த நவம்பர் மாதம் தெலுங்கிலும் இப்படம் வெளியானது. நெட்பிளிக்ஸ் ஓடிடி தளத்தில் டிசம்பர் 2-ம் தேதி வெளியாகி ரசிகர்களின் வரவேற்பை பெற்றுள்ளது.
இந்நிலையில், லவ் டுடே படத்தின் இந்தி ரீமேக் குறித்த அதிகாரப்பூர்வ அறிவிப்பு ஏற்கனவே வெளியாகி இருந்தது. பிரபல தயாரிப்பு நிறுவனமான Phanton Studios நிறுவனம் இந்தி ரீமேக் உரிமையை வாங்கியுள்ளது. மேலும், இந்தி ரீமேக்கில் ஏஜிஎஸ் நிறுவனமும் இணைந்துள்ளது. விரைவில் படக்குழு குறித்த விவரம் அறிவிக்கப்படும் என அர்ச்சனா கல்பாத்தி தெரிவித்திருந்த நிலையில் லவ்டுடே படம் குறித்த முக்கிய அப்டேட்டை படக்குழு வெளியிட்டுள்ளது.
லவ் டுடே படத்தின் இந்தி ரீமேக்கில் நடிக்க பாலிவுட்டில் முக்கிய நடிகையாக திகழ்ந்த ஸ்ரீதேவியின் இரண்டாவது மகளான குஷி ஒப்பந்தமாகி உள்ளார். லவ் டுடே படத்தின் இந்தி ரீமேக் மூலம் குஷி நடிகையாக அறிமுகமாகிறார். மேலும் படத்தின் கதாநாயகனாக பாலிவுட் நட்சத்திர நடிகரான அமீர்கானின் மூத்த மகன் ஜுனைத் நடிக்க உள்ளதாகவும் தகவல்கள் வெளியாகி உள்ளது. இந்தப் படம் 2024ஆம் ஆண்டு தியேட்டர்களில் ரிலீஸாகும் என எதிர்பார்க்கப்படுகிறது.
