மாவீரன் படத்தில் சிறப்பு தோற்றத்தில் பிரபல நடிகர் ஒருவர் நடித்துள்ளதாகவும், அவர் யார் என்பதை படக்குழு ரகசியமாக காப்பாற்றி வருகிறது என்றும் தகவல் வெளியாகியுள்ளது.
சிவகார்த்திகேயன், அதிதி ஷங்கர் நடிக்கும் படம், ‘மாவீரன்’. இந்த படத்தை ‘மண்டேலா’ பட இயக்குனர் மடோன் அஸ்வின் இயக்குகிறார். இயக்குநர் மிஷ்கின் வில்லனாகவும், நடிகை சரிதா முக்கிய வேடத்திலும் நடிக்கின்றனர். விது அய்யனார் ஒளிப்பதிவு செய்ய ஃபிலோமின்ராஜ் எடிட்டிங் பணிகளை கவனிக்கிறார். இந்தப் படம் தமிழ், தெலுங்கில் பைலிங்குவல் படமாக உருவாகி வருகிறது.
தெலுங்கில் இந்தப் படத்துக்கு ‘மாவீருடு’ என தலைப்பிடப்பட்டுள்ளது. இப்படத்திற்கு ‘ஆடை’, ‘மண்டேலா’ ஆகிய படங்களுக்கு இசையமைத்த பரத் ஷங்கர் இசையமைக்கிறார். இப்படத்தின் முதல் பாடலான ‘சீன் ஆ.. சீன்..ஆ’ சமீபத்தில் வெளியாகி ரசிகர்களிடையே கவனம் பெற்றது. தற்போது இப்படத்தின் இறுதிகட்ட பணிகள் மும்முரமாக நடைபெற்று வருகின்றன. வரும் ஜூலை 14-ம் தேதி அன்று படம் திரையரங்குகளில் வெளியாகும் என அறிவிக்கப்பட்டது.
இதனிடையே, இப்படத்தை ரெட் ஜெயண்ட் மூவீஸ் நிறுவனம் தமிழ்நாட்டில் வெளியிடுகிறது என்பதை படத்தின் தயாரிப்பு நிறுவனம் அதிகாரப்பூர்வமாக ட்விட்டரில் அறிவித்தது. கடந்த ஜீலை 2-ம் தேதி இந்த படத்தின் ட்ரெய்லர் வெளியாகி ரசிகர்களிடையே பெறும் வரவேற்பை பெற்றது.
இந்நிலையில், இப்படத்தில் சிறப்புத் தோற்றத்தில் பிரபல நடிகர் ஒருவர் நடித்திருப்பதாக தகவல் வெளியாகியுள்ளது. முதலில், இது நடிகர் ரஜினியாக இருக்கும் என பலர் சமூக வலைதளங்களில் பதிவிட்டு வந்தனர். ஆனால், ரஜினி இல்லை என்பது உறுதியாகியுள்ளது. மேலும் அந்த சிறப்பு தோற்ற நடிகர் யாராக இருக்கும் என்கிற ரகசியத்தை சிரத்தையுடன் படக்குழுவினர் காப்பாற்றி வருகின்றனர் என தகவல் வெளியாகியுள்ளது.
