சிதம்பரம் நடராஜர் கோயில் நிர்வாகம் தொடர்பாகத் தொடரப்பட்ட பல்வேறு வழக்குகளை விசாரித்த சென்னை உயர் நீதிமன்றம், ஒரு அதிரடி உத்தரவைப் பிறப்பித்துள்ளது. இவ்வழக்குகள் தொடர்பான விசாரணை நீதிபதிகள் ஜி. ஜெயச்சந்திரன், இ. மனோகரன் ஆகியோர் அடங்கிய அமர்வில் இன்று (அக்.30) வெள்ளிக்கிழமை நடைபெற்றது. இறுதியில், சிதம்பரம் நடராஜர் கோயிலை நிர்வகிக்க 5 பேர் கொண்ட நிர்வாக குழு ஒன்றினை அமைத்து சென்னை உயர் நீதிமன்றம் தீர்ப்பை வழங்கியது.
5 பேர் கொண்ட நிர்வாகக் குழு
கோயிலின் நிர்வாகத்தைக் கவனிக்க அமைக்கப்பட்டுள்ள இந்த 5 பேர் கொண்ட குழுவுக்கு, ஓய்வுபெற்ற நீதிபதிகளான வி. பாரதிதாசன் மற்றும் ஆர். சுரேஷ்குமார் ஆகியோர் தலைமை வகிப்பார்கள். மேலும், ஓய்வுபெற்ற அரசு அதிகாரி சி. ராஜேந்திரன், பொது தீட்சிதர்கள் அமைப்பின் செயலாளர் மற்றும் இந்து சமய அறநிலையத்துறை செயலாளர் ஆகியோர் குழுவில் உறுப்பினர்களாக இடம்பெற்றுள்ளனர்.
2014-ல் தீட்சிதர்களிடம் ஒப்படைக்கப்பட்ட நிர்வாகம்
சிதம்பரம் நடராஜர் கோயில், தமிழக அரசின் இந்து சமய அறநிலையத்துறையின் நேரடி நிர்வாகத்தின் கீழ் இல்லாமல், பொது தீட்சிதர்களின் நிர்வாகத்தில் இருந்து வந்தது. கடந்த 2014-ம் ஆண்டு உச்ச நீதிமன்ற உத்தரவின்படி கோயில் நிர்வாகம் பொது தீட்சிதர்களிடம் ஒப்படைக்கப்பட்டது. இதற்கு முன்பு திமுக ஆட்சிக் காலத்தில் கோயிலை அரசின் கட்டுப்பாட்டின் கீழ் கொண்டுவர முயற்சி மேற்கொள்ளப்பட்டது. ஆனால், இதற்கு பொது தீட்சிதர்கள் எதிர்ப்பு தெரிவித்ததுடன், கோயிலின் வரவு செலவு கணக்குகளையும் அறநிலையத்துறை அதிகாரிகளிடம் பகிர மறுத்ததாகக் கூறப்படுகிறது. மேலும், கோயிலுக்கு வரும் பக்தர்களுக்குப் போதிய வசதிகள் இல்லை என்றும், நிர்வாகத்தினர் முறையாக நடந்துகொள்வதில்லை என்றும் புகார்கள் எழுந்தன. குறிப்பாக, கருவறைக்கு முன்புள்ள புனிதமான கனகசபையில் நின்று வழிபடுவதற்கும் பக்தர்களுக்கு அனுமதி மறுக்கப்பட்டதாகக் குற்றச்சாட்டுகள் எழுந்தன.
கோயில் வரவு செலவு கணக்குகள் குறித்து நீதிபதிகள் அதிருப்தி
இந்த வழக்கை விசாரித்த நீதிபதிகள், கோயிலின் வருமானம் மற்றும் பராமரிப்பு தொடர்பாகத் தீவிர அதிருப்தியை வெளிப்படுத்தினர். இதுகுறித்து நீதிபதிகள் பிறப்பித்த உத்தரவில், “12 ஆண்டுகளுக்கும் மேலாக கோயிலின் ஒட்டுமொத்த வருமானமும் பொது தீட்சிதர்களின் கட்டுப்பாட்டில் இருந்து வருகிறது. ஆனால், கோயிலுக்குக் கிடைக்கும் வருமானம் குறித்த முழுமையான உண்மையான கணக்குகளை அவர்கள் வழங்கத் தயாராக இல்லை. பழமையான கோயில் கட்டடம் முறையாகப் பராமரிக்கப்படாமல் சேதமடைந்துள்ள விதம் வேதனையளிக்கிறது” என்று குறிப்பிட்டனர்.
கணக்குகளை ஒப்படைக்கவும் உத்தரவு
கோயிலின் நிர்வாகத்தைச் சீரமைப்பதுடன், அதன் சொத்துகளை மீட்டெடுக்கவும் உடனடி நடவடிக்கைகள் தேவை என நீதிபதிகள் தெரிவித்தனர். இதற்காக வருவாய்த்துறை மற்றும் பொதுப்பணித்துறை அதிகாரிகள், நிர்வாகக் குழுவுக்குத் தேவையான உதவிகளைச் செய்ய வேண்டும் என்றும் உத்தரவிட்டனர். அதேநேரத்தில், கோயிலின் அன்றாட பூஜைகள், சடங்குகள் மற்றும் குறிப்பிட்ட காலங்களில் நடைபெறும் திருவிழாக்களை ஏற்பாடு செய்வதற்கான முழு உரிமையும் பொது தீட்சிதர்களிடமே தொடரும் என்றும் நீதிமன்றம் தெளிவுபடுத்தியுள்ளது.
மேலும், கோயில் வருமானத்தில் செய்யப்பட்டுள்ள நிலையான வைப்புத்தொகைகள் உள்ளிட்ட முதலீடுகள் வழக்கம்போல் பொது தீட்சிதர்களின் கட்டுப்பாட்டிலேயே இருக்கும். இருப்பினும், கோயிலின் வரவு செலவு கணக்குகளின் நகலை ஒவ்வொரு மாதமும் 5-ம் தேதிக்குள் நிர்வாகக் குழுவிடம் சமர்ப்பிக்க வேண்டும் என்றும் உத்தரவிட்டுள்ளனர். கோயிலின் நிர்வாகத்தில் உள்ள குறைபாடுகள் சரிசெய்யப்படும் வரை, புதிதாக அமைக்கப்பட்டுள்ள நிர்வாகக் குழு கோயிலின் நிர்வாகப் பொறுப்புகளை ஏற்று செயல்படும் என நீதிபதிகள் தெரிவித்துள்ளனர். இதன் மூலம், நீண்டகாலமாக பொது தீட்சிதர்களின் நிர்வாகத்தில் இருந்து வந்த சிதம்பரம் நடராஜர் கோயிலின் நிர்வாகத்தில் முக்கிய மாற்றம் ஏற்பட்டுள்ளது.
