கேரள மாநிலம் கொச்சியில், CJP அமைப்பின் சார்பில் ‘கொச்சியில் ஜந்தர் மந்தர்’ (Jantar Mantar at Kochi) என்ற பெயரில் போராட்டம் நடைபெற்றது. இன்று (நவம்பர் 7) சனிக்கிழமை மாலை சுமார் 5.30 மணியளவில் மரைன் டிரைவ் பகுதியில் தொடங்கிய இந்தப் பேரணிக்கு நடிகர் பிரகாஷ் ராஜ் தலைமை தாங்கினார். வாக்காளர் பட்டியலின் சிறப்பு தீவிர திருத்தத்தை (SIR) திரும்பப் பெற வேண்டும், தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்பன உள்ளிட்ட கோரிக்கைகளை வலியுறுத்தி இந்தப் போராட்டம் நடைபெற்றது.
கைது செய்யப்பட்டாலும் தேசியக் கொடியை ஏந்திச் செல்வேன்!
இந்தப் போராட்டத்தின்போது பேசிய CJP அமைப்பின் நிறுவனர் அபிஜீத் டிப்கே, “கைது செய்யப்பட்டாலும் நாட்டின் ஒவ்வொரு பகுதிக்கும் தேசியக் கொடியை ஏந்திச் செல்வேன்” என்று தெரிவித்தார். மேலும் பேசிய அவர், “இந்தியாவைச் சீர்குலைப்பதற்காக வெளிநாட்டு சக்திகள் CJP அமைப்பைக் கட்டுப்படுத்துவதாகக் கூறுகிறார்கள். நான் மோடியிடம் ஒரு கேள்வி கேட்க விரும்புகிறேன். டிரம்ப்பிடம் சரணடைந்தது யார்? டிரம்ப்பின் வற்புறுத்தலின் பேரில் ரஷ்யாவிடமிருந்து எண்ணெய் வாங்குவதை நிறுத்த ஒப்புக்கொண்டது யார்? இந்தியாவுக்கு 18 சதவீத வரி விதிக்கப்படும் என்றும், அதற்குப் பதிலாக இந்தியா 0 சதவீத வரி விதிக்க வேண்டும் என்றும் ஒப்பந்தம் செய்துகொண்டது யார்? இந்த நாட்டைக் காட்டிக்கொடுத்தது நீங்கள்தான்; நாங்கள் அல்ல. நாட்டை டிரம்ப்பிடம் விற்றது நீங்கள்தான்; நாங்கள் அல்ல. யாரிடம் நாட்டை விற்றீர்களோ, அந்த நபர் இன்று சிக்கலில் மாட்டிக்கொண்டுள்ளார்” என்று விமர்சித்தார்.
13 கோடி வாக்காளர்களின் பெயர்கள் நீக்கம் – டிப்கே குற்றச்சாட்டு!
போராட்டப் பேரணிக்கு முன்னதாக விமான நிலையத்தில் செய்தியாளர்களிடம் பேசிய அபிஜீத் டிப்கே, SIR நடவடிக்கையின்போது நாடு முழுவதும் வாக்காளர்களின் பெயர்கள் நீக்கப்படுவதாகக் குற்றம்சாட்டினார். கேரளாவிலும் வாக்காளர் பட்டியல் திருத்தத்தின்போது பெயர்கள் நீக்கப்பட்டுள்ளதா என்று செய்தியாளர்கள் கேட்டதற்கு, “நாடு முழுவதும் வாக்குகள் நீக்கப்பட்டு வருகின்றன. வாக்குகள் நீக்கப்படாத மாநிலம் என்று ஒன்று கூட இல்லை” எனத் தெரிவித்தார். மேலும், 13 கோடிக்கும் அதிகமான வாக்காளர்களின் பெயர்கள் நீக்கப்பட்டுள்ளதாகக் கூறிய அவர், “பதிவு செய்யப்பட்ட வாக்காளர்களில் 13 முதல் 14 சதவீதம் பேர் நீக்கப்பட்டுள்ள நிலையில், தேர்தல் சுதந்திரமாகவும் நியாயமாகவும் நடைபெறுகிறது என்று எப்படி எதிர்பார்க்க முடியும்?” என்றும் கேள்வி எழுப்பினார்.
தேர்தல் ஆணையத்தின் நடுநிலைமை குறித்துக் கேள்வி!
கேரள மாநிலத்தின் முன்னாள் தலைமைத் தேர்தல் அதிகாரி, அம்மாநில முதலமைச்சரின் செயலாளராக நியமிக்கப்பட்டது குறித்தும் அபிஜீத் டிப்கே கருத்துத் தெரிவித்தார். இதுபோன்ற நியமனங்கள் தேர்தல் நடைமுறையின் நடுநிலைமை குறித்த சந்தேகங்களை எழுப்புவதாகக் குறிப்பிட்டார். இதேபோன்ற சம்பவம் மேற்கு வங்கத்திலும் நடைபெற்றதாகக் கூறிய அவர், பாஜக மாநிலத் தேர்தலில் வெற்றி பெற்ற பிறகு, தேர்தல் ஆணையராக இருந்த ஒருவர் முதலமைச்சரின் தலைமைச் செயலாளராக நியமிக்கப்பட்டதாகக் குற்றம்சாட்டினார். மேலும், கொச்சியில் நடைபெறும் பேரணியில் ஏராளமான இளைஞர்கள் பங்கேற்பார்கள் என்று நம்பிக்கை தெரிவித்தார். CJP அமைப்பின் உறுப்பினர் பதிவுத் தரவுகளின்படி, அதிக எண்ணிக்கையிலான பதிவு செய்யப்பட்ட உறுப்பினர்கள் கேரள மாநிலத்தைச் சேர்ந்தவர்கள் என்றும் அவர் குறிப்பிட்டார்.
‘ஞானேஷ் குமார் பதவி விலக வேண்டும்’ – CJP முழக்கம்!
இதற்கிடையே, CJP அமைப்பு தனது அதிகாரப்பூர்வ எக்ஸ் தளப் பக்கத்தில் ‘கொச்சியில் ஜந்தர் மந்தர்’ என்ற தலைப்பில் பதிவிட்டதுடன், ‘ஞானேஷ் குமார் பதவி விலக வேண்டும்’ என்ற முழக்கத்தையும் முன்வைத்தது. பேரணியின்போது போக்குவரத்தை ஒழுங்குபடுத்தவும், சாலை மறியல் ஏற்படுவதைத் தடுக்கவும் காவல்துறையினர் பாதுகாப்புப் பணியில் ஈடுபடுத்தப்பட்டிருந்தனர்.
டெல்லியில் தொடரும் போராட்டம் தொடர்பான கைது நடவடிக்கைகள்!
தலைநகர் டெல்லியில் CJP அமைப்பின் தலைவர்களுக்கும் டெல்லி காவல்துறைக்கும் இடையே போராட்டங்கள் தொடர்பாகத் தொடர்ந்து மோதல் போக்கு நிலவி வரும் சூழலில் இந்தப் பேரணி நடைபெற்றுள்ளது. டெல்லியில் ஜந்தர் மந்தர் பகுதிக்குள் அத்துமீறி நுழைந்ததாகக் கூறி CJP தலைவர்களான சௌரவ் தாஸ் மற்றும் அசுதோஷ் ரங்கா ஆகியோர் கைது செய்யப்பட்டனர். டெல்லியில் அமைப்பு அறிவித்திருந்த தேசியக் கொடி பேரணிக்கு முன்னதாக அபிஜீத் டிப்கேவும் காவல்துறையினரால் தடுத்து வைக்கப்பட்டார். மேலும், தலைநகரில் நடைபெற்ற போராட்டங்கள் தொடர்பாகப் பதிவு செய்யப்பட்ட வழக்குகள் குறித்து CJP தலைவர்களிடம் டெல்லி காவல்துறையின் குற்றப்பிரிவு அதிகாரிகள் சமீபத்தில் விசாரணை நடத்தியதும் குறிப்பிடத்தக்கது.
