ஜப்பானில் உள்ள ஆய்ச்சி-நகோயா பகுதியில் 20-வது ஆசிய விளையாட்டுப் போட்டி 2026 நடைபெற்று வருகிறது. இதில் கிரிக்கெட், தொடர் ஓட்டம், வில்வித்தை உள்ளிட்ட பல்வேறு விளையாட்டுகளிலும் இந்தியா பதக்கங்களை குவித்து வருகிறது.
இந்த நிலையில், இன்று ஆடவருக்கான ஹாக்கி போட்டியின் இறுதி ஆட்டம் இந்தியா – மலேசியா இடையே நடைபெற்றது. இந்தியா தொடக்கத்திலேயே சிறப்பாக விளையாடியது. நான்காவது நிமிடத்தில் முதல் முறையாக எதிரணியின் வட்டத்துக்குள் நுழைந்தது. இரண்டு நிமிடங்களுக்குப் பிறகு விவேக்கிற்கு ஒரு வாய்ப்பு கிடைத்தாலும், அவரது ரிவர்ஸ் ஹிட் இலக்கைத் தவறியது.
தொடர்ந்து தாக்குதல் ஆட்டத்தை முன்னெடுத்த இந்தியா, 12-வது நிமிடத்தில் முதல் பெனால்டி கார்னரைப் பெற்றது. ஹர்மன்ப்ரீத் சிங் தனது சிறப்பான டிராக்ஃப்ளிக் மூலம் கோல் அடித்து இந்தியாவை முன்னிலை பெறச் செய்தார். மலேசியா 14-வது நிமிடத்தில் ஒரு கோல் அடித்து ஆட்டத்தை 1-1 என சமன் செய்தது.
ஆட்டத்தின் 23-வது நிமிடத்தில் ஜுக்ராஜ் சிங், பெனால்டி கார்னர் வாய்ப்பை சிறப்பாகப் பயன்படுத்தி ஒரு கோல் அடித்தார். இதனையடுத்து, 43-வது நிமிடத்தில் ஒரு கோலும், 53, 55 மற்றும் 57-வது நிமிடங்களில் அடுத்தடுத்து கோல்களும் அடித்து இந்தியா அதிரடியான ஆட்டத்தை வெளிப்படுத்தியது. இறுதி வரை மலேசியாவால் கோல் அடிக்க முடியாததால், 5-1 என்ற கோல் கணக்கில் இந்திய அணி வெற்றி பெற்று தங்கப் பதக்கத்தைத் தட்டிச் சென்றது.
இதன் மூலம், கண்ட அளவிலான போட்டியில் தொடர்ந்து இரண்டாவது முறையாக இந்தியா தங்கப் பதக்கத்தைக் கைப்பற்றியுள்ளது. இதன் மூலம், ஆசிய விளையாட்டுப் போட்டிகளில் இந்தியாவின் மொத்த பதக்க எண்ணிக்கை 85 ஆக உயர்ந்துள்ளது. இதில் 21 தங்கம், 27 வெள்ளி மற்றும் 37 வெண்கலப் பதக்கங்கள் அடங்கும். மேலும், இந்திய அணி 2028 லாஸ் ஏஞ்சல்ஸ் ஒலிம்பிக் போட்டிக்கும் தகுதி பெற்றுள்ளது.
2022 மற்றும் 2026 ஆகிய ஆண்டுகளில் தொடர்ந்து தங்கம் வென்றதன் மூலம், ஆசிய விளையாட்டுப் போட்டிகளில் தனது தங்கப் பதக்கத்தை முதல் முறையாகத் தக்கவைத்த அணி என்ற வரலாற்றுச் சாதனையை இந்திய ஆண்கள் ஹாக்கி அணி படைத்தது.
மேலும், ஒரே ஆசிய விளையாட்டுப் போட்டியில் இந்திய ஆண்கள் மற்றும் பெண்கள் ஹாக்கி அணிகள் இரண்டும் தங்கம் வென்றது இதுவே முதல் முறையாகும்.
