சினிமாவிற்கு முழுக்குபோட்டுவிட்டதாக வெளியான தகவலை நடிகர் நாசர் மறுத்துள்ளார். தமது மூச்சு இருக்கும் வரை நடித்துக்கொண்டிருப்பேன் என்றும் அவர் உறுதிபட தெரிவித்துள்ளார்.
தமிழ் திரையுலகம் மட்டுமல்லாது தெலுங்கு உள்ளிட்ட பிற மொழி படங்களிலும் சிறந்த குணச்சித்திர நடிகராக வலம் வருபவர் நாசர். பாகுபலி போன்ற பிரம்மாண்ட படங்களிலும் அதே நேரம் சிறிய பட்ஜெட் படங்களிலும் தனது நடிப்புத் திறனை திறம்பட வெளிப்படுத்துபவர் நாசர். உச்ச நட்சத்திரங்கள், இயக்குநர்கள் படங்களில் ஒரு புறம் நடித்தாலும் மறுபுறம் அறிமுக நடிகர்கள், இயக்குனர்கள் படங்களிலும் ஆர்வமுடன் நடிப்பார். நாசர் சினிமாவை விட்டு விலகப்போவதாக கடந்த சில தினங்களாக செய்திகள் வெளிவந்து கொண்டிருக்கின்றன. வயதான காரணத்தால் அவர் சினிமாவுக்கு முழுக்கு போடுவதாகவும், ஏற்கனவே ஒப்புக்கொண்ட படங்களில் மட்டுமே நடித்து வரும் நாசர், அந்த படங்களின் படப்பிடிப்பு முடிந்தவுடன் நடிப்பிற்கு முற்றுப்புள்ளி வைக்கப் போவதாகவும் செய்தி வெளியாகின.
இந்நிலையில் இந்த தகவலை நாசர் மறுத்துள்ளார். இது தொடர்பாக அவர் வெளியிட்டுள்ள அறிக்கையில் கீழ்க்கண்டவாறு கூறப்பட்டுள்ளது.
நான் நடிகனாகத் தான் வேண்டும் என்று தீர்மானிக்கப்பட்ட பின், அதைத் தீவிரமாக எடுத்துக் கொண்டு முறையாகப் பயிற்சி பெற்றுதான் சினிமாவிற்கு வந்தேன். வலைத்தளங்களில் சமீபமாக வலம் வந்து கொண்டிருக்கும் என் தொழிலிலிருந்து ஓய்வு என்ற செய்தி என்னால் சொல்லப்பட்டது அல்ல; புனைவு. நான் நடித்துக் கொண்டிருப்பேன்; நடிப்பேன். அடையாளம் இல்லாதவர்கள் வலைத்தளங்களில் பதிவிடுவதை விட மக்களால் நம்பப்படுகின்ற நான் மதிக்கின்ற பொறுமையோடும் நட்போடும் பழகுகின்ற ஊடகங்களே அதை வெளியிடுவதுதான் வருத்தமளிக்கிறது. எளிதாக தொடர்பு கொள்ளும் விதத்தில்தான் நான் பழகியிருக்கிறேன். சொந்த விஷயம் ஆகட்டும் தொழில் சார்ந்த விஷயம் ஆகட்டும், சம்பந்தப்பட்டவர்களின் ஒப்புதல் அல்லது விளக்கம் இல்லாது தயவு செய்து தவறான பதிவு செய்ய வேண்டாம். என் மூச்சு இருக்கும் வரை நான் நடித்துக் கொண்டே தான் இருப்பேன்.
இவ்வாறு நடிகர் நாசர் தான் வெளியிட்டுள்ள அறிக்கையில் கூறியுள்ளார்.
